Read dyu Cidenw ka kɛwaliw kitabu 12 Bible Online

Cidenw ka kɛwaliw kitabu 12 - dyu bible

Cidenw ka kɛwaliw kitabu 12

¹O waati la, masacɛ *Erɔdi ye Krista ka jama mɔgɔ dɔw minɛ k'u tɔɔrɔ.

²A ye Zan kɔrɔcɛ Zaki kuun tigɛ.

³A y'a ye k'o diyara zuwifuw ye minkɛ, a ye Piyɛri fana minɛ. (O kɛra *Buru funubali ɲanagwɛ waati la.)

⁴ Piyɛri minɛnin kɔ, Erɔdi ye sɔlidasikulu naani bila a kɔlɔsili la, kulu kelen kelen bɛɛ mɔgɔ naani naani. Erɔdi tun ko ni *Hɔrɔnya ɲanagwɛ tɛmɛna, a tun bena bɔ ni Piyɛri ye k'a kiti jama ɲana.

⁵Ka Piyɛri datugunin to kaso la, Krista ka jama kɔni tun be Ala daalil'a ye dɔrɔn.

⁶*Erɔdi tun bena Piyɛri kiti sini ɲɔgɔn. Sufɛ Piyɛri tun be sinɔgɔra sɔlidasi fila cɛma, jɔrɔkɔw tun donnin b'a la, k'o siri sɔlidasi nunu na. O y'a sɔrɔ kɔlɔsilikɛbaga dɔw fana tun be daa la.

⁷O tuma na, Matigi ka mɛlɛkɛ dɔ donna, o yɔrɔnin bɛɛ, kasobon kɔnɔna bɛɛ sinna ka kɛ yeelenba ye. Mɛlɛkɛ ye Piyɛri gosi a gɛrɛn na ko a ka wili joona. Jɔrɔkɔ nunu tigɛra ka bɔ a bolow la o yɔrɔnin bɛ.

⁸Mɛlɛkɛ y'a fɔ a ye ko a k'a cɛɛ siri k'a ka sanbara don. Piyɛri sɔnna k'o kɛ. Mɛlɛkɛ y'a fɔ a ye tugu k'a k'a ka fani don ka tugu ale kɔ.

⁹A bɔra ka tugu mɛlɛkɛ kɔ. Koo min tun be kɛra, Piyɛri tun ma la a la k'o ye tiɲɛ ye. A ɲana ko ale be sikora le.

¹⁰U nana tɛmɛ kɔlɔsilikɛbaga fɔlɔw, ni filananw na, nigɛkon be daa min na n'o sinnin be dugu kɔnɔna ma, u sera o ma, a yɛlɛla a yɛrɛ ma. U bɔra, u tagara se sirakun dɔ la, mɛlɛkɛ tununa Piyɛri la.

¹¹Piyɛri ye hakili sɔrɔ tuma min na, a y'a fɔ ko: «Sisan, ne y'a lɔn ko tiɲɛ lo Matigi y'a ka mɛlɛkɛ dɔ ci ka na ne bɔsi Erɔdi la, ka ne kisi zuwifuw daa ma.»

¹²Zan min be wele ko Mariki, Piyɛri ɲaa yɛlɛla, a tagara o bamuso ka soo. Mɔgɔ caaman lajɛnnin tun be yen n'u be Ala daalila.

¹³A ye bulonda kɔkɔ, sunguru dɔ tɔgɔ ko Ɔrɔdi, ale tagar'a filɛ.

¹⁴A ye Piyɛri kumakan lɔn. Nisɔndiya fɛ, a yɛrɛ ma daa yɛlɛ, a bolila ka taga fɔ soo kɔnɔ mɔgɔw ye ko Piyɛri lo be bulonda la.

¹⁵U ko a ma: «Faa le b'i la wa?» O bɛɛ n'a ta, sunguru nin ma sɔn. U ko n'o lo, Piyɛri mɛlɛkɛ lo.

¹⁶Piyɛri kɔni tora ka daa kɔkɔ. U dɛsɛra ka taga daa yɛlɛ, k'a ye ko Piyɛri lo. U ma la a la ni tiɲɛ lo.

¹⁷Piyɛri y'a bolo kɛ k'u ka je. U jera, Matigi y'a bɔ kaso la cogo min na, a y'o bɛɛ ɲafɔ u ye. O kɔ, a y'a fɔ u ye k'u ka taga o kibaru fɔ Zaki, ni balima tɔw ye. A y'o fɔ ka ban, a bɔra ka taga yɔrɔ dɔ la.

¹⁸Dugu nana gwɛ, a kɛra hakiliɲagami ye sɔlidasiw fɛ. Piyɛri kɛra cogo min na, u m'a lɔn.

¹⁹Erɔdi ye mɔgɔw bila ka Piyɛri yɔrɔ ɲini ka dɛsɛ. A nana dɛsɛ ka kasobon daa kɔlɔsibagaw le kiti, o kɔ, k'u k'u faga. O bɛɛ kɔ, ale Erɔdi bɔra Zude ka taga tile fila kɛ Sezare.

²⁰Kɛlɛjugu dɔ tun be *Erɔdi ni Tiri ni Sidɔnkaw cɛ. Olu bɛnn'a la k'u be taga Erɔdi daali. O la, u ye Erɔdi ka sibon labɛnbaga kɛ u teri ye fɔlɔ, o tɔgɔ tun ko Bilasitusi. U ka sɔrɔ ka taga bɛɛn ɲini. Fɔɔ bɛɛn tun ka ɲini bari olu ka jamana ka balofɛn caaman tun be bɔ Erɔdi ka jamana le kɔnɔ.

²¹Loon min sigira, o nana se. Erɔdi y'a ka masafaniw don ka na sigi a ka masasigilan kan ka kuma daminɛ.

²²Mɔgɔw tora ka pɛrɛn ko: «Nin te mɔgɔ kumakan ye, batofɛn kumakan lo.»

²³Erɔdi sɔnna u y'a boɲa i n'a fɔ Ala minkɛ, o le y'a to Matigi ka mɛlɛkɛ dɔ nan'a gosi. Tumu donna a la, a sara.

²⁴Ala ka kuma tun be jɛnsɛn ka taga dɔrɔn.

²⁵Cii min tun donna Barinabasi ni Sɔli bolo k'a kɛ Zeruzalɛmu, u tilara o la tuma min na, u kɔsegira Antiyɔsi. U kɔsegitɔ, u tagara ni Zan ye, o be min wele ko Mariki.