Read dyu Cidenw ka kɛwaliw kitabu 18 Bible Online

Cidenw ka kɛwaliw kitabu 18 - dyu bible

Cidenw ka kɛwaliw kitabu 18

¹O kɔ, Pɔli bɔra Atɛni ka taga Korɛnti.

²A ye zuwifu dɔ kunbɛn, min tɔgɔ ko Akilasi, a tun be bɔ Pɔn mara la, n'a muso, ale tɔgɔ ko Pirisili. U bɔtɔ tun lo Itali jamana na bari Ɔrɔmu masacɛ Kulodi tun y'a ŋaniya ta ka zuwifuw bɛɛ gwɛn ka bɔ Ɔrɔmu dugu kɔnɔ. Pɔli sigira u fɛ ka jɛn n'u ye,

³ka baara kɛ, bari u bɛɛ tun ye fanibugudilanbagaw ye.

⁴Lafiɲɛlon o lafiɲɛlon, Pɔli tun be mɔgɔw waaju kalanso kɔnɔ. A tun be jija waasa ka se zuwifuw ni girɛkiw kɔrɔ.

⁵Silasi ni Timote nana yen ka bɔ Maseduwani tuma min na, Pɔli y'a ka baara bɛɛ kɛ Yezu koo fɔli dama ye, k'a yira zuwifuw la ko Yezu le ye Ala ka Mɔgɔ wolomanin ye.

⁶Zuwifuw tun te sɔnna Pɔli ka kuma na. U tora k'a nɛni. O la, Pɔli tora k'a ka faniw furanfuran [1] k'a fɔ u ye ko: «N daa t'aw ka koo la tugu. N'aw halakira sini, o y'aw kunko ye. Ne kɔni niin t'o la tugu. Ayiwa, ne bena taga siya wɛrɛw le waaju sisan.»

⁷A bɔra yen ka taga jigi cɛɛ dɔ fɛ min tɔgɔ ko Titusi Zusitusi. Ale tun be Ala bato. A ka soo gunnin tun be kalanso la.

⁸O kalanso kuntigi tɔgɔ tun ko Kiripusi, ale n'a ka somɔgɔw bɛɛ lara Matigi la. Korɛntika minw tun be Pɔli lamɛn, u caaman lara Matigi la, u batizera.

⁹Loon dɔ, Matigi y'a yɛrɛ yira Pɔli la sufɛ k'a fɔ a ye ko: «Pɔli, kana siran. To ka ne koo fɔ, kan'a dabila.

¹⁰Bari ne be n'i ye. Mɔgɔ si tena se ka kojugu kɛ i la, bari mɔgɔ caaman be ne fɛ dugu nin kɔnɔ.»

¹¹Pɔli tora yen ka mɔgɔw kalan Ala ka kuma na saan kelen ni kalo wɔɔrɔ.

¹²Galiyɔn tun ye Akayi mara masacɛlankan ye tuma min na, zuwifuw wilila Pɔli kama. U y'a minɛ ka taga n'a ye kititigɛlaw fɛ

¹³k'a fɔ ko: «Cɛɛ nin b'a fɛ ka mɔgɔw bila Ala batocogokura la min ni sariya te bɛn.»

¹⁴Pɔli tun b'a fɛ ka dɔ fɔ o kuma nin na. Galiyɔn ye kuma ta k'a fɔ zuwifuw ye ko: «N'a tun kɛra ko cɛɛ nin tun ye kojuguba dɔ kɛ, ne tun bena sɔn aw zuwifuw ka kuma nin na.

¹⁵Nga nin ye zuwifuw dama ka koo ye, bari aw be ɲɔgɔn sɔsɔra kalanko ni tɔgɔ koow ani sariya koow le la. Aw y'o ɲanabɔ aw ni ɲɔgɔn cɛ. Ne te se ka o koo nunu ɲɔgɔn kiti tigɛ.»

¹⁶A y'u gwɛn ka bɔ kiti tigɛyɔrɔ la.

¹⁷Sɔsitɛni tun ye kalanso kuntigi ye o waati la. U jɛnna a kan k'a bugɔ kititigɛlaw ɲana. Nga Galiyɔn ma foyi fɔ.

¹⁸ Pɔli tora Korɛnti ka waatijan kɛ. O kɔ, a ye sira ɲini o yɔrɔ balimaw fɛ, ale ni Akilasi n'a ka muso Pirisili ye kurun ta k'u kuun sin Siri jamana ma. Pɔli tun y'a kuun li Sankere bari a tun ye dajuru ta Ala ye.

¹⁹U sera Efɛzi tuma min na, a y'a taamaɲɔgɔnw to yen ka ta'a kelen kalanso kɔnɔ ka baro kɛ ni zuwifuw ye.

²⁰Olu y'a ɲini a fɛ ko a ka lafila kɛ olu fɛ. A ma sɔn o la.

²¹Nga a ye sira sɔrɔ u fɛ tuma min na, a y'a fɔ u ye ko ni Ala sɔnna, ale bena segi ka na u filɛ. O kɔ, a bɔra Efɛzi, ka kurun ta.

²²A sera Sezare tuma min na, a tagara bɔ Zeruzalɛmu ka Krista ka jama fo. A sɔrɔla ka bɔ o yɔrɔ la ka taga Antiyɔsi.

²³A ye waati dɔɔni kɛ yen. O kɔ, a bɔra ka Galati ni Firizi mara nunu yaalayaala k'a ka kalandenw ladi k'u jaa gwɛlɛya.

²⁴Zuwifu dɔ nana Efɛzi, a tɔgɔ tun ko Apolɔsi, a wolola Alɛkisandiri. A daa tun ka di kosɔbɛ, a tun be Ala ka kuma lɔn.

²⁵A kalannin tun lo Matigi ka sira koo la dɔɔni fana. A tun be mɔgɔw kalan Yezu ka koo la ni timinadiya ye, k'a sɔrɔ a tun be Zan ka batizeli dɔrɔn le lɔn.

²⁶A hakili sigininba ye kuma daminɛ kalanso kɔnɔ. Akilasi ni Pirisili y'a lamɛn ka ban tuma min na, u y'a wele danna. A tun te min lɔn Ala ka sira koo la, u y'o fɔ a ye k'a gwɛ.

²⁷Apolɔsi tun b'a fɛ k'a kuun sin Akayi minkɛ, balima minw tun be Efɛzi, olu ye sɛbɛ ci u badenw ma, ko ni Apolɔsi sera, k'u k'a minɛ ka ɲa. A sera o yɔrɔ la tuma min na, a ye dɛmɛ don u ye kosɔbɛ Ala barika la.

²⁸A bolo lanin tun be Ala ka kuma kan kosɔbɛ. O sababu fɛ, a tun be zuwifuw ka kuma kɔɔ kari jama ɲana ko Yezu le ye Ala ka Mɔgɔ wolomanin ye.