Read dyu Cidenw ka kɛwaliw kitabu 19 Bible Online

Cidenw ka kɛwaliw kitabu 19 - dyu bible

Cidenw ka kɛwaliw kitabu 19

¹Ka Apolɔsi to Korɛnti, Pɔli ye Azi jamana kuluyɔrɔ cɛtigɛ ka taga se Efɛzi. A ye kalanden dɔw sɔrɔ yen.

²A y'u ɲininga ko: «Aw lara Yezu la tuma min na, aw ye Nii Senuman sɔrɔ wa?» U y'a jaabi ko: «Nii Senuman wa? An m'ale koo mɛn ka ye.»

³Pɔli y'u ɲininga tugu ko: «O tuma na, aw batizera cogo di?» U ko: «Zan tun be mɔgɔw batize cogo min na, an ta fana kɛra ten.»

⁴ O la, Pɔli ko: «Mɔgɔ minw sɔnna ka nimisa ka faran u ka kojuguw la, Zan tun be olu batize. A tun b'a ɲini jama fɛ ko mɔgɔ min bena na ale kɔ, ko u k'u jigi la ale kan. O ye Yezu ye.»

⁵U ye Pɔli lamɛn ka ban tuma min na, u batizera Matigi Yezu tɔgɔ la.

⁶Pɔli y'a bolo lala u kuun na, Nii Senuman jigira u kan, u y'a daminɛ ka siyakan wɛrɛw fɔ, ani ka kirayakuma fɔ.

⁷Olu tun be mɔgɔ tan ni fila ɲɔgɔn bɔ.

⁸O kɔ, Pɔli tora ka taga kalanso kɔnɔ, ka to yen n'a be mɔgɔw kalan Ala ka masaya koo la fɔɔ kalo saba. A tun be jija waasa ka se a lamɛnbagaw kɔrɔ.

⁹O bɛɛ n'a ta, dɔw tun ye tulogwɛlɛnw ye jama cɛma, olu y'a daminɛ ka to ka Matigi ka sira lɔgɔbɔ mɔgɔ bɛɛ ɲana. O la, Pɔli ye olu ye k'u to yen ka taga n'a ka kalandenw ye danna ka to k'u kalan loon o loon Tiranɔsi ka kalanso kɔnɔ.

¹⁰A y'a kɛ ten saan fila fɔɔ Azi jamana mɔgɔw bɛɛ, zuwifu fara girɛkiw kan, u bɛɛ ye Matigi ka kibaru diman mɛn.

¹¹Ala tun be Pɔli dɛmɛ ka kabakow kɛ kosɔbɛ,

¹²fɔɔ mɔgɔw tun be na ni musɔrɔw, walima faniw ye waasa k'o maga Pɔli la, ka taga o maga banabagatɔw la, u be kɛnɛya. Ni jinatɔ lo, jina be bɔ.

¹³Zuwifu dɔw tun be yaalayaala k'olu be jinaw gwɛn ka bɔ mɔgɔw la, u tun b'a fɛ ka jina gwɛn ka bɔ mɔgɔ dɔw la ni Matigi Yezu tɔgɔ ye. U y'a fɔ jinaw ye ko: «Pɔli be Yezu min koo fɔ, ale barika la, an b'a fɔ aw ye ko aw ka bɔ mɔgɔ nunu na.»

¹⁴Mɔgɔ minw y'o kɛ, olu tun ye sarakalasebaga Seva ka dencɛ wolonwula ye.

¹⁵Nga jina y'u jaabi ko: «Ne be Yezu lɔn, n be Pɔli fana lɔn. Nga aw do? Aw ye jɔnw ye?»

¹⁶Jinatɔ nin girinna u kan, a fanga sera u bɛɛ kɔrɔ. A y'u mandimi fɔɔ u bɛɛ lakolon bɔra ka boli.

¹⁷Efɛzikaw bɛɛ y'o kibaru mɛn, zuwifu fara girɛkiw kan. U bɛɛ siranna. O seen fɛ, mɔgɔw ye boɲa la Matigi Yezu tɔgɔ kan.

¹⁸Mɔgɔ minw tun lara Yezu la Efɛzi, u caaman tun be na u ka kojugukɛninw fɔ jama ɲana k'a yira k'u te o kɛ tugu.

¹⁹Minw tun be jinamoriya kɛ, olu caaman nana n'u ka sɛbɛ ye k'u jɛni jama bɛɛ ɲana. U y'o sɛbɛ nunu sɔngɔ jati, k'a ye ko a be warigwɛ deen waa bi duuru bɔ.

²⁰Matigi ka kuma tun be yiriwa a yɛrɛ ka sebagaya fɛ ten.

²¹O kɛnin kɔ, Pɔli y'a ŋaniya ta ko a be taga Maseduwani ani Akayi mara la, ka sɔrɔ ka segi Zeruzalɛmu. A tun ko n'ale tagara o yɔrɔ nunu na ka ban, ko a ka kan ka se Ɔrɔmu fana.

²²A y'a dɛmɛbaga fila ci Maseduwani mara la. Olu tun ye Timote ni Erasiti ye. Nga ale Pɔli tora Azi mara la ka lafila kɛ tugu.

²³O waati yɛrɛ la, mankanba wilila Matigi ka sira koo la.

²⁴Cɛɛ dɔ le tun be yen, a tɔgɔ ko Demetiriyusi, numu tun lo. Efɛzikaw ka joba min tɔgɔ ko Aritemi, ale tun b'o batoso jaa fitinimanw dilan ni warigwɛ ye. Minw tun b'o baara nin na a fɛ, u tun be nafa sɔrɔ kosɔbɛ.

²⁵A ye baaraden nunu lajɛn, ani minw bɛɛ tun b'o baara nin ɲɔgɔn kɛ dugu kɔnɔ, k'a fɔ u ye ko: «N badenw, aw yɛrɛ b'a lɔn ko an ka hɛrɛ be bɔ baara nin le la.

²⁶Nga Pɔli tɔgɔla nin be min fɔra, ani a be min kɛra, aw b'o mɛnna, aw b'o yera fana. A ko adamadenw be fɛɛn minw lalaga n'u bolo ye, k'olu te batofɛn ɲanamanw ye. A jijara fɔɔ ka mɔgɔ caaman kuun yɛlɛma n'o ye. Efɛzi kɔnɔ yan dɔrɔn tɛ! Nga a be ɲini ka Azi mara bɛɛ sɔrɔ!

²⁷O bena kɛ sababu ye k'an ka baara nagasi, a tena dan o dɔrɔn ma, nga a bena kɛ sababu ye fana k'an ka joba Aritemi sanga burun. K'a sɔrɔ Azi mara bɛɛ, ani diɲɛ bɛɛ b'a bato.»

²⁸Mɔgɔ nunu y'o mɛn dɔrɔn, u dimininba y'a daminɛ ka to ka pɛrɛn ko: «An Efɛzikaw ka Aritemi bɔɲɔgɔnko joba te sɔrɔ!»

²⁹Mankan nin boɲana fɔɔ ka dugu bɛɛ ɲagami. Mɔgɔw tora ka mankan ci ka girin ka dugu ɲɔgɔnlajɛnyɔrɔba sɛgɛrɛ. U ye Pɔli taamaɲɔgɔn fila dɔ minɛ ka taga n'u ye. O tun ye Gayusi ani Arisitaraki ye. Maseduwanikaw tun lo.

³⁰O la, Pɔli tun b'a fɛ ka taga yɛrɛ di, nga kalandenw y'a bali.

³¹Hali mara nin mɔgɔbaba minw tun ye Pɔli teriw ye, u ye cii sama a ma ko a kana taga ɲɔgɔnlajɛnyɔrɔba nin na, ko farati b'a la.

³²Mɔgɔ ka fɔtaw tun te kelen ye. Mankan boɲana haali! Caman yɛrɛ ma ɲɔgɔnlajɛn nin kuun lɔn.

³³Zuwifuw ye Alɛkisandiri tɔgɔ dɔ bila u ɲafɛ janko a ka dɔ fɔ u ye. Alɛkisandiri nana a bolo kɛ, k'u ka je. A y'a daminɛ ko a be kuma jama fɛ,

³⁴mɔgɔw nana a lɔn ko zuwifu lo minkɛ, u ye mankan daminɛ tugu. Bɛɛ tora ka pɛrɛn ko: «An Efɛzikaw ka Aritemi bɔɲɔgɔnko joba te sɔrɔ!» U tora k'o kaan kelen nin fɔ fɔɔ lɛrɛ fila ɲɔgɔn.

³⁵Cɛɛ min tun be to ka dugu ɲɔgɔnyebaw kunnafoniw sɛbɛn, ale sera ka mɔgɔw mala u jera. A ye kuma ta k'a fɔ ko: «N badenw, an ka joba, min ye Aritemi ye, mɔgɔ jumɛn be yen n'a t'a lɔn ko a juu maranin tɛ an Efɛzikaw fɛ? A jaa min bɔra sankolo la ka ben an fɛ yan, jɔn t'o kala ma Efɛzi?

³⁶Ni bɛɛ b'o lɔn, n'o sɔsɔbaga te yen, aw y'aw dusu suma, an kana koo dɔ kɛ an ma miiri min na.

³⁷Aw ye mɔgɔ nunu minɛ ka na n'u ye yan ka sɔrɔ u ma cɛnni kɛ an ka jobonw si kɔnɔ, u ma kumajugu fɔ an ka joo koo la fana.

³⁸Ni koo dɔ le be Demetiriyusi n'a ka baarakɛɲɔgɔnw ni mɔgɔ dɔ cɛ, kiti tigɛlon be yen, faamaw be yen, u ka kan ka taga u ka koo ɲanabɔ olu le fɛ.

³⁹Ni kuma wɛrɛ le do be aw fɛ n'an ka kan k'o ɲanabɔ, aw be na an ka ɲɔgɔnyeba kɛlon na.

⁴⁰N'an m'an yɛrɛ minɛ, u bena an jalaki bii koo nin kama, bari, kuun te an ka ɲɔgɔnlajɛn nin na, n'a ɲaa be se ka fɔ mɔgɔ ye.»

⁴¹A y'o kuma fɔ ka ban minkɛ, a ko jama ka jɛnsɛn.