Read dyu Cidenw ka kɛwaliw kitabu 2 Bible Online

Cidenw ka kɛwaliw kitabu 2 - dyu bible

Cidenw ka kɛwaliw kitabu 2

¹ *Pantekɔti loon na, kalandenw bɛɛ lajɛnnin tun be boon kelen na.

²Mankanba dɔ barila ka bɔ sankolo la. Mankan nin tun be i n'a fɔ fɔɲɔba mankan. U tun be boon min kɔnɔ, o bɛɛ fara mankan nin na.

³U ye fɛɛn dɔw ye i n'a fɔ tasuma, a tilantilanna ka jigi u kelen kelen bɛɛ kuun na.

⁴U bɛɛ fara Nii Senuman na. U y'a daminɛ ka siyakan wɛrɛw fɔ Nii Senuman barika la.

⁵O y'a sɔrɔ, zuwifu minw tun be siran Ala ɲa kosɔbɛ, olu caaman nanin tun be Zeruzalɛmu, ka bɔ diɲɛ faan bɛɛ.

⁶U ye mankan mɛn minkɛ, u girinna ka taga yɔrɔ fa. U kabakoyara kosɔbɛ, bari Yezu ka cidenw tun be kuma minw fɔra, u bɛɛ tun b'o mɛnna u yɛrɛ ka kaan na.

⁷U kabakoyara fɔɔ k'a dama tɛmɛ n'u be ɲɔgɔn ɲininga ko: «Mɔgɔ minw be kumana wo, u bɛɛ te Galilekaw ye wa?

⁸A do kɛra di n'an bɛɛ b'u ka kuma mɛnna an ka kaan na?

⁹An dɔw bɔra Pariti jamana na, dɔw bɔra Mɛdi, ni Elamu, ni Mezopotami ani Zude. Dɔw bɔra Kapadɔsi, ni Pɔn, ni Azi,

¹⁰ni Firizi ani Panfili. Dɔw bɔra Ezipiti, ni Libi, ni Sirɛni faan fɛ ani Ɔrɔmuka minw be yan.

¹¹Zuwifuw ani minw y'u yɛrɛ kɛ zuwifuw ye, ani Kɛrɛtikaw, ni arabuw, an bɛɛ be Ala ka koba kɛninw mɛnna an ka kaanw na!»

¹²O y'u kabakoya fɔɔ u hakili ɲagamina n'u be ɲɔgɔn ɲininga ko: «Nin kɔrɔ ye mun ye?»

¹³Nga dɔw tun b'u lɔgɔbɔ ka to k'a fɔ ko: «Ayi! Ayi! Nunu fanin lo duvɛn na.»

¹⁴O la, Piyɛri tor'a tɔɲɔgɔn tan ni kelen nunu cɛma k'a kaan kɔrɔta ka kuma jama fɛ ko: «Aw zuwifuw, ani aw minw bɛɛ siginin be Zeruzalɛmu, a y'aw tulo malɔ ka ɲa ka n ka kuma lamɛn.

¹⁵Aw be min fɔra ko nunu fanin lo duvɛn na, u ma fa duvɛn na dɛ, bari tile ma gwan fɔlɔ.

¹⁶Nga kira Zowɛli tun ye kuma min fɔ, o le be kɛra. A tun y'a fɔ ko:

¹⁷Matigi ko: ‹Ni laban tuma sera, n bena n ka Nii di bɛɛ ma. Aw dencɛw n'aw denmusow bɛɛ bena kiraya kɛ. Aw ka kanbelenninw bena yelifɛnw ye. Aw ka cɛkɔrɔbaw bena sikow kɛ.

¹⁸Tiɲɛ na, o waati la n bena n ka Nii di n ka baarakɛlaw ma, cɛɛ fara musow kan. U bena kiraya kɛ.

¹⁹N bena kabakow kɛ sankolo la, ka taamasiɲɛw kɛ dugukolo kan, joli, tasuma ani sisi.

²⁰Tile bena dibi, kalo bena wulen i ko joli, sanni Matigi ka loon ka se. Lonba lo min ɲɔgɔn te yen.

²¹ O tuma na, mɔgɔ o mɔgɔ mana Matigi tɔgɔ wele, o tigi bena kisi.›

²²«Ayiwa, Isirayɛli jama, n bena kuma minw fɔ sisan, aw ye u lamɛn dɛ! Ala ye Nazarɛtika Yezu ci aw fɛ, ka see d'a ma ka kabakow kɛ aw ɲana. Aw yɛrɛ y'o lɔn.

²³ Ala tun y'a ka koo latigɛ cogo min na, a kɛra ten fana. Aw y'a don kojugukɛlaw bolo janko u k'a faga, olu y'a gwengwen lɔgɔ kan k'a faga.

²⁴ Nga Ala y'a kunun a faganin kɔ ka bɔ saya tɔɔrɔ la, bari a tun man kan ka to saya bolo.

²⁵Masacɛ Dawuda yɛrɛ tun y'a koo fɔ ko: ‹Ne ɲaa be Matigi la tuma bɛɛ n ɲafɛ. A be ne fɛ minkɛ, n hakili tena ɲagami.

²⁶O la, ne nisɔn diyanin be ka to ka dɔnkili la. Ne jigi siginin bena lafiɲɛ.

²⁷Bari e tena ne to lahara. Ne min y'i ka mɔgɔ senuman ye, i ten'a to ne suu be toli.

²⁸ Mɔgɔ be to nii na sira min kan, i y'o don ne seen kɔrɔ. I be ne nisɔn diya kosɔbɛ i ɲakɔrɔ.›

²⁹«Ayiwa n balimaw, ne ka kan ka an bɛmacɛ Dawuda ka koo ɲafɔ aw ye ka gwɛ. A sara, u y'a suu don, halibi a suturayɔrɔ lɔnnin lo.

³⁰ Kira tun lo. A tun y'a lɔn ko Ala y'a daa di ko a ben'a ka deen dɔ sigi a nɔɔ na masaya la.

³¹A tun kɔnna ka Ala ka Mɔgɔ wolomanin kununko lɔn, o la a y'a fɔ ko Ala m'a to lahara, ko a suu ma toli.

³²Ala ye Yezu kunun a sanin kɔ, anw kɔni y'a ye.

³³A y'a wele k'a sigi a yɛrɛ kɔrɔ masaya la. A tun y'a daa di ko a bena Nii Senuman di. A y'o sɔrɔ a Faa fɛ k'o di anw ma. Aw b'o le ka sebagaya kuma mɛnna, ani k'a ka seko ye.

³⁴Masacɛ Dawuda ma yɛlɛ sankolo la, nga a tun ye Krista koo le fɔ ko: ‹Matigi Ala y'a fɔ ne Matigi ye ko a ka sigi ale kinibolo fɛ,

³⁵ ko fɔɔ a k'a juguw cɔnkɔn a seen kɔrɔ.›

³⁶Ayiwa, aw Isirayɛli jama, aw k'a faamu kosɔbɛ ko aw ye Yezu min faga lɔgɔ kan, Ala y'ale lo woloma k'a kɛ an Matigi ye.»

³⁷Jama ye Piyɛri ka kuma nunu lamɛn minkɛ, u hakili ɲagamina. U ye Piyɛri n'a tɔɲɔgɔn cidenw ɲininga ko: «Balimaw, an ka kan ka mun kɛ?»

³⁸Piyɛri y'u jaabi ko: «Aw ye nimisa ka faran aw ka hakɛw la, an b'aw batize Yezu Krista tɔgɔ la janko aw k'aw ka hakɛw yafa sɔrɔ. O la, aw bena Nii Senuman sɔrɔ,

³⁹bari Matigi y'a daa di aw, n'aw deenw ma, ani Matigi an ka Ala bena mɔgɔ minw bɛɛ wele ka bɔ yɔrɔjan na.»

⁴⁰Piyɛri y'a fɔ u ye fana ko: «Aw ye jija k'aw ka kɛwaliw yɛlɛma janko aw ni mɔgɔjugu nunu kana kɛ kelen ye.» A ye kuma wɛrɛw fɔ k'u jaa gwɛlɛya.

⁴¹Olu lara Piyɛri ka kuma na o tuma na. U y'u batize. Minw farala kalandenw kan o loon na, u tun be mɔgɔ waa saba bɔ.

⁴²Kalandenw tun be taga cidenw ka kalan lamɛn tuma bɛɛ. U tun be jɛn k'u ka koo bɛɛ kɛ balimaya la. U tun be dumuni senuman [1] tilantilan ɲɔgɔn fɛ, ka Ala daali.

⁴³Cidenw tun be kabako caaman kɛ, o siranya tun ye mɔgɔ bɛɛ minɛ.

⁴⁴ Mɔgɔ minw bɛɛ tun lara Yezu la, u tun jɛnnin be k'u ka fɛɛn bɛɛ kɛ foroba ye,

⁴⁵k'u bololafɛnw ni u ka forow feere k'o sɔngɔ tilan ka kɛɲɛ n'u kelen kelen bɛɛ ka makoyako ye.

⁴⁶U tun be taga Alabatosoba kɔnɔ loon o loon ka Ala bato. U tun be dumuni senuman tilantilan ɲɔgɔn fɛ soo kɔnɔ, ka to ka dumuni kɛ ni ɲɔgɔn ye nisɔndiya la. U si tun t'u yɛrɛ boɲa.

⁴⁷U tun be Ala tanu, mɔgɔ bɛɛ tun b'u filɛ ni ɲaɲuman ye. Matigi tun ye mɔgɔ minw kisi, a tun be olu ladon jɛnkulu nin kɔnɔ loon o loon.