Read dyu Cidenw ka kɛwaliw kitabu 22 Bible Online

Cidenw ka kɛwaliw kitabu 22 - dyu bible

Cidenw ka kɛwaliw kitabu 22

¹«N faaw, ani n balimaw, n bena min fɔ sisan waasa ka n yɛrɛ ka koo gwɛ aw ye, aw k'aw tulo malɔ o la ka ɲa.»

²U y'a ye ko Pɔli be kumana u fɛ eburukan na minkɛ, yɔrɔ sumana tɛtɛtɛ fɔɔ ka ɲa.

³ A ko: «Ne ye zuwifu ye, n wolola Tarisi, Silisi mara la, nga n lamɔna dugu nin kɔnɔ yan. Gamaliyɛli le ye n kalan kosɔbɛ an faaw ka sariyaw la. N ka Alako tun ka gwɛlɛ kosɔbɛ, i n'a fɔ aw fana ta be cogo min na bii.

⁴Ne tun be sirakura nin taamabagaw tɔɔrɔ, ka dɔw faga, cɛɛ fara musow kan, ne tun b'u minɛ ka jɔrɔkɔ kɛ u la, k'u don kaso la.

⁵ Sarakalasebagaw kuntigiba ni cɛkɔrɔbaw ka jɛnkulu be se k'a fɔ ni galon lo, walima ni tiɲɛ lo. Loon dɔ la, ne ye sɛbɛ sɔrɔ olu fɛ ko n ka taga di an balimaw ma Damasi, ka Yezu kɔmɔgɔw minɛ ka na n'u ye Zeruzalɛmu k'u tɔɔrɔ.

⁶«Ka n to sira kan, n tun surunyana Damasi la tilegwan fɛ, yeelenba dɔ bɔra sanfɛ ka na ne lamini.

⁷N bɔra ka ben, kumakan dɔ bɔra, k'a fɔ n ye ko: ‹Sayuli, Sayuli, [1] mun na i be ne tɔɔrɔla ten?›

⁸Ne ye kumakan nin jaabi ko: ‹E ye jɔn ye, Matigi?› Kumakan nin ko: ‹Ne Nazarɛtika Yezu lo i be min tɔɔrɔla.›

⁹N taamaɲɔgɔn nunu kɔni tun ye yeelen nin ye nga u ma kumakan nin mɛn.

¹⁰Ne ko: ‹N ka kan ka mun kɛ Matigi?› A ye ne jaabi ko: ‹Wili ka taga Damasi, e ka kan ka min kɛ, u bena o fɔ i ye.›

¹¹Yeelen nin boɲa kojugu fɛ, n ɲaa bɔsira n na, n taamaɲɔgɔnw le ye n bolo minɛ ka taga Damasi.

¹²«Cɛɛ dɔ tun b'o yɔrɔ la, a tɔgɔ tun ko Ananiyasi, a tun be Ala ka sariyaw bato kosɔbɛ, a tɔgɔɲuman tun be zuwifuw bɛɛ daa la o yɔrɔ la.

¹³Ale nana ne sɔrɔ, k'a fɔ ne ye ko: ‹N balima Sayuli, i ɲaa ka yɛlɛ.› O yɔrɔnin bɛɛ ne ɲaa yɛlɛla.

¹⁴A y'a fɔ ne ye ko: ‹An faaw ka Ala y'i woloma k'i kɛ a ta ye, janko i k'a sago lɔn, i ɲaa ka la a ka Mɔgɔɲuman kan, ka mɛnni kɛ ale yɛrɛ daa la,

¹⁵bari a b'a fɛ ko i ɲaa ye min ye, an'i tulo ye min mɛn ale fɛ, i ka kɛ ale seere ye k'o lakali mɔgɔw bɛɛ ye.

¹⁶I be mun le kɔnɔ tugu? Wili an b'i batize i ka hakɛw ka yafa ale Yezu barika la.›

¹⁷«Ayiwa, ne tun segira ka na Zeruzalɛmu. Ka ne to Aladali la loon dɔ Alabatosoba kɔnɔ, ne ye fɛɛn dɔ ye.

¹⁸Matigi tun lo, a y'a fɔ n ye ko: ‹Teliya ka Zeruzalɛmu dugu bila, bari i be min fɔra mɔgɔw ye ne ka koo la, u tena la o la.›

¹⁹Ne y'a jaabi ko: ‹Matigi, u b'a lɔn ko ne tun be taga kalansow kɔnɔ k'i kɔmɔgɔw minɛ ka taga u don kaso la ka dɔw bugɔbugɔ ni golokamiw ye.

²⁰ I tericɛ Etiyɛni fagatuma na, ne tun be n'u ye, o tun diyara n ye fana. Ne le tun b'a fagabagaw ka faniw kɔlɔsira.›

²¹A y'a fɔ ne ye ko ale bena ne ci ka taga yɔrɔjan siya wɛrɛw fɛ.»

²²Jama ye Pɔli lamɛn fɔɔ ka na se o kuma nunu ma minkɛ, u pɛrɛnna ka to k'a fɔ ko: «O mɔgɔ sifa nunu ka kan ka faga, a man kan ka to nii na.»

²³Mankan boɲana, u tora k'u ka faniw fili sanfɛ, ka to ka buguri cɛ k'a fili sanfɛ.

²⁴Sɔlidasi kuntigiba y'a fɔ k'u ka don ni Pɔli ye a ka yɔrɔ la kan kɔnɔ, k'u k'a bugɔ, waasa a ka jama murutikun fɔ.

²⁵U ye Pɔli siri k'u b'a bugɔ tuma min na, a y'a fɔ sɔlidasi kuntigi ye ko: «Sira dinin b'aw ma waasa ka Ɔrɔmuka bugɔ ka sɔrɔ a ma kiti wa?»

²⁶Sɔlidasi kuntigi nin y'o mɛn minkɛ, a tagara o ɲafɔ sɔlidasi kuntigiba ye ko cɛɛ nin ye Ɔrɔmuka ye.

²⁷O fana nana Pɔli ɲininga ko: «I ye Ɔrɔmuka ye tiɲɛ na wa?» Pɔli y'a jaabi ko ɔnhɔn.

²⁸Sɔlidasi kuntigiba ko ale ye wariba le sara ka sɔrɔ ka jati Ɔrɔmuka ye. Pɔli y'a jaabi ko ale ye Ɔrɔmuka ye kabini a wololon.

²⁹O tuma na, mɔgɔ minw tun ka kan k'a bugɔ, olu bɛɛ y'a ye k'a to yen. Sɔlidasi kuntigiba nin nan'a lɔn ko ale ye Ɔrɔmuka le siri ten minkɛ, a siranna kosɔbɛ.

³⁰Dugu gwɛra, zuwifuw be Pɔli jalakila kuun min na, sɔlidasi kuntigiba nin tun b'a fɛ k'o lɔn. O la, a ye Pɔli foni ka sarakalasebagaw kuntigiw ni zuwifuw ka kititigɛlaw bɛɛ wele ɲɔgɔnye la. O kɔ, a y'a to Pɔli nana lɔ u cɛma.