Read dyu Cidenw ka kɛwaliw kitabu 3 Bible Online

Cidenw ka kɛwaliw kitabu 3 - dyu bible

Cidenw ka kɛwaliw kitabu 3

¹Loon dɔ, Piyɛri ni Zan tun be tagara Alabatosoba kɔnɔ wulafɛ batoli la.

²Cɛɛ dɔ tun be yen, muruku tun lo kabini a wolotuma. Mɔgɔw tun b'a ta ka taga bila loon o loon Alabatosoba daa dɔ la, u be min wele ko Daa cɛɲuman, janko a ka daalili kɛ donbagaw fɛ.

³A ye Piyɛri ni Zan ye tuma min na, u tun be ɲini ka don Alabatosoba kɔnɔ. A ye daalili kɛ u fɛ.

⁴Piyɛri ni Zan ye cɛɛ filɛ, k'a fɔ a ye ko: «An filɛ ka ɲa.»

⁵Cɛɛ y'a ɲaa basanin to u kan, a ka miiri la ko a bena fɛɛn dɔ sɔrɔ u fɛ.

⁶O la Piyɛri y'a fɔ a ye tugu ko: «Sanu te n fɛ, wari te n fɛ, nga fɛɛn min be n fɛ, ne b'o le d'i ma: Nazarɛtika Yezu Krista tɔgɔ barika la, wili ka taama.»

⁷Piyɛri y'a minɛ a kinibolo ma k'a wili. O yɔrɔnin kelen, cɛɛ seenw kɛnɛyara, a senfasaw ye barika sɔrɔ.

⁸A panna ka cun! A taamana ka don n'u ye Alabatosoba kɔnɔ. A tora ka taama ka panpan, ka barika la Ala ye.

⁹Mɔgɔ bɛɛ y'a taamatɔ ye ka to ka Ala tanu.

¹⁰U y'a lɔn ko ale lo tun be sigi Alabatosoba Daa cɛɲuman kɔrɔ ka daalili kɛ. O ye mɔgɔw kabakoya ka dama tɛmɛ fɔɔ k'u hakili ɲagami.

¹¹Cɛɛ ma sɔn ka bɔ Piyɛri ni Zan kɔ, mɔgɔw hakili ɲagaminin girinna k'u lamini yɔrɔ dɔ la, u be min wele ko Solomani ka bulonda.

¹²Piyɛri y'o ye minkɛ, a y'a kaan to ko: «Isirayɛlidenw, koo min kɛra ten, mun na o b'aw kamanagwan k'aw ɲaa coron anw na ka kɛ i n'a fɔ anw ka sebagaya le ye cɛɛ kɛnɛya, walima an ka Ala ɲasiranya kosɔn le?

¹³ Nga Ibrayima, ni Isiyaka, ani Yakuba ka Ala, ani an bɛmaw ka Ala le ye nɔɔrɔ la a ka baarakɛla Yezu kan, aw banna ale min na k'a don mɔgɔjuguw bolo. Pilati tun b'a fɛ k'a bila, aw ko fewu.

¹⁴ Aw banna Mɔgɔsɔbɛ ni Mɔgɔɲuman na, min y'a yɛrɛ di Ala ma a sago kosɔn. Aw banna ale la ko fɔɔ Pilati ka mɔgɔfagala dɔ le labila.

¹⁵Aw y'a to u ye nii dibaga faga, nga Ala y'a kunun. Anw y'a ye.

¹⁶An lara Yezu tɔgɔ la minkɛ, o le y'a to a ye cɛɛ nin kɛnɛya, aw ɲaa be min na, aw b'a lɔn fana ka kɔrɔ. Tiɲɛ na, anw lara Yezu la minkɛ, o le y'a kɛnɛya aw ɲakɔrɔ ten.

¹⁷«Sisan n balimaw, ne y'a lɔn ko aw, n'aw ka ɲamɔgɔw ye koo nin kɛ, sabu aw tun m'a lɔn.

¹⁸N'o tɛ, Ala tun y'a fɔ a ka kiraw barika la kabini fɔlɔ, ko a bena mɔgɔ min woloma k'a bila ka na, k'o bena tɔɔrɔ. A do kɛra ten.

¹⁹O tuma na, aw ye nimisa ka faran aw ka hakɛw la ka segi Ala ma, janko a k'aw ka hakɛw yafa.

²⁰Aw k'a kɛ ten, o la, yɛlɛmani bena don, lafiya bena sɔrɔ. O seen fɛ Matigi bena segi k'a ka Mɔgɔ wolomanin Yezu ci aw ma tugu, i n'a fɔ a y'a latigɛ cogo min na.

²¹Nga sanni o waati ka se, a siginin bena to Ala kɔrɔ fɔlɔ yanni yɛlɛmani ka don diɲɛ koow bɛɛ la, ka kɛɲɛ ni Ala ka kiraw ka kuma ye, min fɔra kabini tumajan.

²² Musa tun kɔnna k'a fɔ ko: ‹Matigi i ka Ala bena ne bɔɲɔgɔn kira dɔ wili aw balimaw cɛma. A mana kuma o kuma fɔ aw ye, aw ka kan ka mɛnni kɛ a fɛ.

²³ Ni mɔgɔ min banna ka mɛnni kɛ o kira nin fɛ, o tigi bena halaki.›

²⁴Kira minw tɛmɛna ka kɔrɔ, k'a ta Samuyɛli ma, ani minw tugur'a kɔ, olu bɛɛ fana y'an ka bii tile koo fɔ ka tɛmɛ.

²⁵ Aw ye kiraw ka deenw ye. Ala tun ye bɛɛn min kɛ n'aw faaw ye Ibrayima barika la, aw y'o deenw ye. A tun ko: ‹Gwasow bɛɛ bena duba sɔrɔ i kɔmɔgɔ barika la.›

²⁶Ala y'a ka baarakɛla ci aw le ma fɔlɔ, janko a ka hɛrɛ kɛ aw kelen kelen bɛɛ ye k'aw faran ka bɔ aw ka kɛwalijuguw la.»