Read dyu Cidenw ka kɛwaliw kitabu 4 Bible Online

Cidenw ka kɛwaliw kitabu 4 - dyu bible

Cidenw ka kɛwaliw kitabu 4

¹Ka Piyɛri ni Zan to kuma na jama fɛ, sarakalasebagaw ni Alabatosoba ɲamɔgɔ, ani *Saduseɲɛ dɔw sera.

²U y'a ye ko mɔgɔ fila nunu be jama kalanna Yezu ka koow, ani suuw kununko la minkɛ, o ma diya u ye.

³U y'u minɛ ka taga u datugu kaso la fɔɔ a dugusagwɛ, bari tile tun banna.

⁴O bɛɛ n'a ta, mɔgɔ minw tun ye ciden fila nunu ka kuma lamɛn, olu caaman lara Yezu la. Dɔ farala kalandenw kan. Cɛɛw bɛɛ lajɛnnin tagara se mɔgɔ waa duuru ɲɔgɔn ma.

⁵O dugusagwɛ, zuwifuw ka kititigɛla minw be Zeruzalɛmu dugu kɔnɔ, olu ye ɲɔgɔn lajɛn: cɛkɔrɔba fara sariya karamɔgɔw kan.

⁶Sarakalasebagaw kuntigiba Ana n'a ka somɔgɔw bɛɛ tun be yen, ni Kayifu, ni Zan ani Alɛkisandiri.

⁷O tuma na, u nana ni Piyɛri ni Zan ye u cɛma. U y'u ɲininga ko: «Aw ye muruku nin kɛnɛya ni see jumɛn ye, walima aw y'a kɛnɛya tɔgɔ jumɛn barika la?»

⁸O tuma na, Piyɛri tun fanin be Nii Senuman na, a y'u jaabi ko:

⁹«An ka cɛkɔrɔbaw, n'an ɲamɔgɔw, aw y'anw wele kiti la bii, bari an ye koɲuman kɛ. Aw b'an ɲiningana ko an ka muruku nin kɛnɛyacogo fɔ.

¹⁰O la, aw y'aw tulo malɔ ka ɲa ani k'a faamu, Isirayɛli jama bɛɛ fana k'a faamu ko Yezu Krista Nazarɛtika nin barika lo, aw tun ye min gwengwen lɔgɔ kan. Ala y'a kunun. Ale barika la cɛɛ nin kɛnɛyara.

¹¹ Aw bonlɔlaw banna kabakuru min na, o nana kɛ kabakuru barikaman ye, boon nɔnkɔn ta. O ye Yezu ye.

¹²Kisili te se ka sɔrɔ yɔrɔ si n'ale fɛ tɛ. Bari Ala ma mɔgɔ wɛrɛ ci diɲɛ na, adamaden be se ka kisi min tɔgɔ barika la.»

¹³Kititigɛla nunu y'a ye ko Piyɛri ni Zan hakili siginin lo u ka kuma na. U kabakoyara bari u y'u jati mɔgɔ fufafu ye minw ma kalan bɛrɛ kɛ. O kɔ, u nan'a lɔn ko Yezu kɔmɔgɔ dɔw lo.

¹⁴U ye cɛɛ filɛ u gɛrɛfɛ, a dafaninba, fɔta ma sɔrɔ u fɛ.

¹⁵O la, u y'a fɔ u ye ko u ka bɔ kɛnɛma. U dama ye ɲɔgɔn ye koo nin na.

¹⁶U y'a fɔ ko: «An bena mun le kɛ mɔgɔ nunu na? Tiɲɛ kɔni na, u ye koba kɛ. Zeruzalɛmukaw bɛɛ b'a kala ma. A gwɛnin lo, an te se ka ban a ma.

¹⁷Nga, n'an t'a fɛ koo nin kibaru ka jɛnsɛn ka taga ɲa, an ka kan k'u bali, k'u bagabaga k'u kana Yezu tɔgɔ fɔ mɔgɔ si ɲana tugu.»

¹⁸O la, u ye Piyɛri ni Zan wele ka kangari la u ye ko Yezu tɔgɔ kana mɛn u daa la loon si, walima ka mɔgɔw kalan n'a ka koow ye.

¹⁹Nga Piyɛri ni Zan y'u jaabi ko: «Jumɛn ka di Ala ye koo fila nunu na: k'a ka fɔta bato, walima k'aw ka fɔta bato? Aw yɛrɛ k'o jaabi ɲini aw yɛrɛ ma.

²⁰«Anw kɔni fɛ, anw ye min ye, ka min mɛn, anw te se ka to o fɔbali ye.»

²¹U ma bolo layɔrɔ sɔrɔ k'u tɔɔrɔ minkɛ, u sɔngɔna u kan kosɔbɛ, ka sɔrɔ k'u bila. U y'o kɛ jama ɲasiran kosɔn, bari mɔgɔ bɛɛ tun be Ala tɔgɔ tanura u ka kokɛnin nin kama.

²²Cɛɛ min ka kɛnɛya kɛra kabako ye, o sii tun tɛmɛna saan bi naani kan.

²³Piyɛri ni Zan bilanin kɔ, sarakalasebagaw kuntigiw ni cɛkɔrɔbaw ye kuma min bɛɛ fɔ, u segira ka n'o bɛɛ ɲafɔ u tɔɲɔgɔnw ye.

²⁴ Olu y'u ka kuma mɛn. O kɔ, u y'u kaan kɛ kelen ye ka Ala daali ko: «Matigi, e le ye sankolo ni dugukolo ani kɔgɔji, n'u kɔnɔnafɛnw bɛɛ dan.

²⁵E le y'a kɛ i ka baarakɛla an bɛma Dawuda ye kuma nin fɔ Nii Senuman barika la, ko: ‹Mun na siyaw murutira? Mun na u ye ŋaniyafu ta ten?

²⁶ Masacɛw wilila, jamana ɲamɔgɔw y'u kaan bɛn, ka Matigi n'a ka Mɔgɔwolomanin kɛlɛ.›

²⁷ Tiɲɛ na, Pɔnsi Pilati, ni *Erɔdi, ni Isirayɛli jama ani siya wɛrɛw ye ɲɔgɔn lajɛn dugu nin kɔnɔ i ka baarakɛla senuman Yezu kama i ye min kɛ diɲɛ kisibaga ye.

²⁸Ayiwa, i tun ye koo minw bɛɛ latigɛ, u y'o bɛɛ kɛ.

²⁹Sisan kɔni Matigi, i janto u ka bagabagaliw la, a to i ka baarakɛlaw k'i ka kuma fɔ mɔgɔw ye ni jagwɛlɛya ye.

³⁰A to an ka se ka mɔgɔw kɛnɛya, ka kabakow kɛ Yezu tɔgɔ barika la, min y'i ka baarakɛla senuman ye.»

³¹U tun be yɔrɔ min na, daalili bantɔ, o yɔrɔ nin yɛrɛyɛrɛla. U bɛɛ fara Nii Senuman na, ka to ka Ala ka kuma fɔ ni jagwɛlɛya ye.

³² Mɔgɔ minw tun lara Yezu la, u bɛnnin tun lo kosɔbɛ, miiriya kelen le tun b'u bɛɛ fɛ. U si tun t'a fɔ ko: «N ta.» Nga u ka fɛɛn bɛɛ tun ye foroba ye.

³³Cidenw tun be kobabaw kɛ k'a yira ko Matigi Yezu kununna. Ala ka ɲumanya tun be u bɛɛ kan.

³⁴O la fana, dɛsɛ tun te u si kan, bari forow, walima soow tun be minw fɛ, u tun b'u feere ka n'u bɛɛ sɔngɔ di cidenw ma.

³⁵U tun b'o tilan ka kɛɲɛ n'u kelen kelen bɛɛ ka makoya ye.

³⁶O la, Levi kɔmɔgɔ dɔ tun be yen min tɔgɔ ko Yusufu ka bɔ Sipɔrɔ jamana na, cidenw y'a tɔgɔ la ko Barinabasi, o kɔrɔ ko min be mɔgɔ jaa gwɛlɛya. [1]

³⁷Foro dɔ tun be ale fɛ fana. A y'a feere ka n'a wari di cidenw ma.