Read dyu Cidenw ka kɛwaliw kitabu 5 Bible Online

Cidenw ka kɛwaliw kitabu 5 - dyu bible

Cidenw ka kɛwaliw kitabu 5

¹Nga cɛɛ dɔ tun be yen min tɔgɔ tun ko Ananiyasi. A ka muso tɔgɔ tun ko Safira. U bɛnna k'u ka foro dɔ feere,

²ka dɔ bɔ a sɔngɔ la ka sɔrɔ ka taga tɔɔ di cidenw ma.

³O la, Piyɛri y'a fɔ a ye ko: «Ananiyasi, a kɛra di i y'a to Sutana sera i kɔrɔ fɔɔ i be galon tigɛ Nii Senuman ye? Mun na i ye foro nin sɔngɔ dɔ dogo?

⁴E tun te se ka foro nin feereko to yen wa? Hali n'i y'a feere fana, e tun te se ka to n'a sɔngɔ ye i yɛrɛ sago la wa? A kɛra di miiriyajugu nin donna i dusu la? I ma galon tigɛ mɔgɔw ye dɛ, i y'a tigɛ Ala le ye.»

⁵Ananiyasi y'o kuma mɛn dɔrɔn, a benna ka sa. Mɔgɔ minw y'o kibaru mɛn, siranyaba ye olu bɛɛ minɛ.

⁶Kanbelenw nan'a suu koɲa kɛ, ka ta'a suu don.

⁷Lɛrɛ saba ɲɔgɔn tɛmɛnin kɔ, Ananiyasi ka muso sera o yɔrɔ la, nga a tun ma bɔ koo nin kala ma.

⁸Piyɛri y'a ɲininga ko: «Tiɲɛ fɔ n ye. Aw y'aw ka foro feere o daa nin lo la wa?» Muso y'a jaabi ko ɔnhɔn.

⁹O la, Piyɛri y'a fɔ a ye ko: «Mun na aw bɛnna ka Matigi ka Nii darabɔ? Ayiwa, mɔgɔ minw tagara i cɛɛ suu don, u segitɔ filɛ nin ye. U bena taga n'i fana suu ye.»

¹⁰O yɔrɔnin bɛɛ, muso nin benna Piyɛri kɔrɔ ka sa. Kanbelen nunu donna k'a sanin sɔrɔ. U y'a ta k'a taga suu don a cɛɛ ka kaburu gɛrɛfɛ.

¹¹Siranya ye Krista ka jama minɛ kosɔbɛ, mɔgɔ minw bɛɛ fana y'o kibaru mɛn, olu bɛɛ siranna kosɔbɛ.

¹²Cidenw tun be kabako caaman kɛ jama ɲana. U be Alabatosoba donda min wele ko Solomani ka bulonda, kalandenw bɛɛ tun be to ka ɲɔgɔn lajɛn yen ni miiriya kelen ye.

¹³Nga mɔgɔ tɔw si tun te sɔn ka taga jɛn n'u ye. O bɛɛ n'a ta, jama tun b'u tanu.

¹⁴Cɛɛ ni muso caaman tun be lara Matigi la ka fara kalandenw ka jɛnkulu kan.

¹⁵Mɔgɔw tun be bɔ n'u ka banabagatɔw yɛrɛ ye ka na u lala siradaw la dɛbɛ ni kalakaw kan, janko Piyɛri tɛmɛtɔ suma ka kɛ u dɔ kan waasa u ka kɛnɛya.

¹⁶Mɔgɔw tun be bɔ hali Zeruzalɛmu dafɛ duguw la, k'u ka banabagatɔw ni jinatɔw ta ka na. U bɛɛ fana tun be kɛnɛya.

¹⁷O la, sarakalasebagaw kuntigiba n'a ka dakɔrɔsigiw minw ye *Saduseɲɛw ye, u bɛɛ dimininba

¹⁸wilila ka ciden nunu minɛ jama ɲana k'u don kaso la.

¹⁹Nga Matigi y'a ka mɛlɛkɛ ci sufɛ ka na kasobon daa yɛlɛ ka bɔ ni ciden nunu ye k'a fɔ u ye ko

²⁰u ka taga Alabatosoba kɔnɔ, ka kisili kuma fɔ mɔgɔw ye.

²¹U ye mɛlɛkɛ ka kuma bato. Sɔgɔma joona, u sera Alabatosoba kɔnɔ k'a daminɛ ka mɔgɔw kalan. O tuma na, sarakalasebagaw kuntigiba n'a ka dakɔrɔsigiw tagara u ka ɲɔgɔnyeyɔrɔ la. U ye zuwifuw ka kititigɛlaw bɛɛ lajɛn, ka sɔlidasiw bila k'u ka taga cidenw bɔ kaso la ka na n'u ye.

²²Nga u tagara se, u ma cidenw sɔrɔ kasobon kɔnɔ. U segira ka taga o ɲafɔ ko:

²³«An tagara se ka daa yɛlɛ ka don, an ma mɔgɔ si sɔrɔ yen. K'a sɔrɔ dakɔlɔsibagaw tun be daa la, a fana tun sɔgɔnin lo ka ɲa.»

²⁴Alabatosoba kɔlɔsibagaw ɲamɔgɔ, ni sarakalasebagaw kuntigiw y'o kibaru nin mɛn, u bɛɛ kɔnɔnafilila kosɔbɛ. U tora ka ɲɔgɔn ɲininga ko koo nin laban bena kɛ cogo di.

²⁵K'u t'o la, mɔgɔ dɔ nan'a fɔ u ye ko: «A filɛ, aw ye mɔgɔ minw don kaso la, u b'a la ka jama kalan Alabatosoba kɔnɔ.»

²⁶O tuma na, Alabatosoba kɔlɔsibagaw ɲamɔgɔ n'a ka mɔgɔw tagara yen ka cidenw wele. Nga u m'u jagoya, bari u tun be siran ko jama kana na u bon ni kabakuruw ye.

²⁷U nana ni cidenw ye u ka kiti tigɛyɔrɔ la. Sarakalasebagaw kuntigiba y'u ɲininga ko:

²⁸ «An tun ma kangari la aw ye ko aw kana mɔgɔw kalan a ka koo la wa? Nga aw ye Zeruzalɛmukaw tulo fa n'aw ka kalan ye. O tuma na, aw b'a fɛ cɛɛ nin fagako hakɛ ka ben anw kan le wa?»

²⁹O la, Piyɛri ni ciden tɔw y'u jaabi ko: «Anw te se ka ban Ala sago la ka adamadenw ta kɛ.

³⁰Aw tun ye Yezu min gwengwen k'a faga lɔgɔ kan, an bɛmaw ka Ala y'a kunun,

³¹k'a kɛ mɔgɔbaba ye, k'a sigi a yɛrɛ kinibolo la masaya la, ani k'a kɛ kisibaga ye, janko ale sababu la, Isirayɛlidenw ka nimisa ka faran u ka kojuguw la, Ala k'u ka hakɛw yafa.

³²Ala ye koo minw kɛ, an y'o seerew ye ani Nii Senuman, Ala ye min di a sagokɛlaw ma.»

³³Cidenw ka kuma nunu ye kititigɛlaw dusu gwan fɔɔ u y'a fɔ k'u ka kan ka faga.

³⁴Nga *Fariziɲɛ dɔ tun be kititigɛlaw cɛma, a tɔgɔ tun ko Gamaliyɛli, sariya karamɔgɔ tun lo. Bɛɛ tun be boɲa la a kan. Ale wilila k'a fɔ ko cidenw ka bɔ kɛnɛma fɔlɔ.

³⁵O kɔ, a ko: «Eyi! Isirayɛlidenw, aw bena koo min kɛ mɔgɔ nunu na, aw y'a jati minɛ ka ɲa!

³⁶A ma mɛn kosɔbɛ, Tedasi wilila ko ale ye mɔgɔbaba ye. Mɔgɔw tugura a kɔ fɔɔ ka se mɔgɔ kɛmɛ naani ɲɔgɔn ma. U y'a faga tuma min na, a kɔmɔgɔw bɛɛ ma jɛnsɛn ka tunu wa?

³⁷O kɔ, Ɔrɔmukaw tun be jamanadenw jatira tuma min na, Zuda ka bɔ Galile wilila n'a kɔmɔgɔ caaman ye ka muruti. U y'ale fana faga, a kɔmɔgɔw bɛɛ jɛnsɛnna.

³⁸Ayiwa, ne b'a fɔ aw ye, aw kana mɔgɔ nunu ka koo nin ta aw kuun na tugu, aw y'u to. N'o y'a sɔrɔ n'u ka ŋaniya, walima u ka baara bɔra adamadenw na, a bena na cɛn.

³⁹Nga n'o y'a sɔrɔ ni Ala nɔɔ lo, aw tena se ka foyi kɛ u la. An k'an yɛrɛ kɔlɔsi an kana kɛ Ala juguw ye.» Ayiwa, u sɔnna Gamaliyɛli ka kuma na.

⁴⁰U ye cidenw wele k'u bugɔ ni golokamiw ye ka ban, u ye kangari la u ye k'u kana Yezu tɔgɔ wele abada. U y'u bila ka taga.

⁴¹Cidenw nisɔn diyanin bɔra kiti tigɛyɔrɔ la, bari Ala ye boɲa la u kan min kɛra u lɔgɔbɔko ye Yezu tɔgɔ kosɔn.

⁴²Loon o loon, Yezu min ye Ala ka Mɔgɔ wolomanin ye, cidenw tun be to ka taga ale ka kibaru diman fɔ mɔgɔw ye Alabatosoba kɔnɔ, ani u yɛrɛ ka soow kɔnɔ.