Read dyu Cidenw ka kɛwaliw kitabu 6 Bible Online

Cidenw ka kɛwaliw kitabu 6 - dyu bible

Cidenw ka kɛwaliw kitabu 6

¹Kalandenw tora ka caya. Waati dɔ la, zuwifu minw bɔra yɔrɔ wɛrɛ, n'u be girɛkikan fɔ, olu tora ka tɔw kɔrɔfɔ k'u te to k'u mako don olu ka firiyamusow la kosɔbɛ dumuni tilantuma na loon o loon.

²O la, ciden tan ni fila nunu ye kalandenw bɛɛ lajɛnnin wele k'a fɔ u ye ko: «Anw man kan ka to dumuni tilanko la, ka Ala ka kuma fɔko bila gɛrɛfɛ.

³O kama balimaw, aw yɛrɛ ka mɔgɔ wolonwula woloma aw cɛma minw sɔɔn ka ɲi, ni hakili b'u fɛ, ni Nii Senuman. O la, anw bena dumuni tilanko don olu bolo.

⁴Anw kɔni bena to ka Ala ka kuma fɔ, ani ka bila Ala daaliko ɲafɛ.»

⁵O kuma nin diyara jama ye. O tuma na, u ye mɔgɔw woloma, olu tɔgɔw filɛ nin ye: Etiyɛni, min jigi tun be Ala kan kosɔbɛ Nii Senuman tun b'a fɛ, ni Filipu, ani Porokɔri, Nikanɔri ni Timɔn, ni Parimenasi, ani Nikola ka bɔ Antiyɔsi, min donna zuwifuya la.

⁶O y'u yira cidenw na, olu y'u bolo la u kuun na kelen kelen ka Ala daali u ye.

⁷Ala ka kuma tora ka jɛnsɛn, kalandenw tora ka caya kosɔbɛ Zeruzalɛmu kɔnɔ. Sarakalasebaga caaman sɔnna ka la Yezu la.

⁸Barika tun be Etiyɛni na, Ala ka nɛɛma tun b'a kan kosɔbɛ. A tora ka kabakobabaw kɛ mɔgɔw ɲana.

⁹O bɛɛ kama, kalanso min be wele ko Jɔnhɔrɔnyaninw ka kalanso, o mɔgɔ dɔw nana sɔsɔli daminɛ ni Etiyɛni ye. Sirɛnikaw ni Alɛkisandirikaw ni Silisikaw, ani Azikaw fana niin tun b'o la.

¹⁰Nga u tun te sera Etiyɛni kɔrɔ, bari a tun be kuma ni hakilitigiya ye Nii Senuman barika la.

¹¹O la, u ye mɔgɔ dɔw kɔnɔnasu k'u k'a fɔ ko a tun be Ala ni Musa tɔgɔ cɛnna.

¹²O kama, cɛkɔrɔbaw ni sariya karamɔgɔw ani jama bɛɛ murutira Etiyɛni kama ka girin k'a minɛ ka taga n'a ye u ka kititigɛlaw fɛ.

¹³U tagara n'u ka galontigɛla dɔw fana ye o yɔrɔ la. Olu y'a fɔ ko: «Cɛɛ nin be to k'a dajugu la an ka yɔrɔ senuman ni sariya kan.

¹⁴An y'a mɛn a daa la ko Nazarɛti Yezu tɔgɔla nin bena yɔrɔ senuman nin ci, sariya min sigira Musa ka waati la, k'o yɛlɛma.»

¹⁵O tuma na, kititigɛlaw bɛɛ ɲaa basanin tun be Etiyɛni kan. A ɲaa kɛra i n'a fɔ mɛlɛkɛ ta u ɲakɔrɔ.