Read dyu Cidenw ka kɛwaliw kitabu 8 Bible Online

Cidenw ka kɛwaliw kitabu 8 - dyu bible

Cidenw ka kɛwaliw kitabu 8

¹Etiyɛni fagako tun diyara Sɔli ye. O loon kelen yɛrɛ la, u y'a daminɛ ka Krista ka jama tɔɔrɔ kosɔbɛ. U bɛɛ ye dugu bila jagoya la, ka jɛnsɛn dugudenninw na, Zude mara, ani Samari mara la, fɔɔ cidenw dɔrɔn.

²Mɔgɔɲuman dɔw ye Etiyɛni suu don k'a sanga kɛ kosɔbɛ.

³ Nga Sɔli kɔni, ale tun tora ka Krista ka jama tɔɔrɔ dɔrɔn, ka to ka taga u minɛ soow kɔnɔ, cɛɛ fara musow kan, ka taga u don kaso la.

⁴Minw tun bolila ka bɔ Zeruzalɛmu, ni olu sera yɔrɔ o yɔrɔ, u tun be Yezu ka kibaru diman fɔ o yɔrɔ la.

⁵O cogo la, Filipu fana sera dugu dɔ la Samari mara la, ka Ala ka Mɔgɔ wolomanin koo fɔ u ye.

⁶Mɔgɔw ye Filipu ka kabakokɛninw kibaru mɛn ani k'u ye fana, u bɛɛ jɛnna k'a lamɛn kosɔbɛ.

⁷Jinatɔ caaman ka jinaw tun be bɔ u la ni kulekan ye. Namaraw, ni senkelennin caaman kɛnɛyara.

⁸Dugu mɔgɔw nisɔn diyara kosɔbɛ.

⁹Cɛɛ dɔ tun be Samari mara la, min tɔgɔ tun ko Simɔn. A tun be jinamoriya kɛ ka mɔgɔw bɛɛ kabakoya, k'a yɛrɛ kɛ mɔgɔbaba ye.

¹⁰Mɔgɔw bɛɛ, denmisɛn fara mɔgɔkɔrɔbaw kan, u bɛɛ tun be mɛnni kɛ Simɔn fɛ, ani k'a boɲa. U tora k'a fɔ ko: «Nin cɛɛ nin ye Ala ka sebagaya ye, min be wele sebagayaba.»

¹¹Mɔgɔw tun be mɛnni kɛ a fɛ, bari a tun b'u dabari ban n'a ka jinamoriya ye kabini tumajan.

¹²Nga, Filipu nana Yezu ka kibaru diman ni Ala ka masaya sigiko fɔ u ye minkɛ, u lara Yezu la. Filipu y'u batize, cɛɛ fara musow kan.

¹³Ale Simɔn yɛrɛ fana lara Yezu la ka batize. O kɔ, a ma sɔn ka bɔ Filipu kɔ tugu. Filipu tun be kabakobaba minw kɛ, olu tun ye Simɔn dabari ban.

¹⁴Cidenw tora Zeruzalɛmu k'a mɛn ko Samarikaw sɔnna Ala ka kuma ma minkɛ, u ye Piyɛri ni Zan ci u fɛ.

¹⁵Olu tagara yen, ka Ala daali u ye, janko u ka se ka Nii Senuman sɔrɔ,

¹⁶bari u tun batizera Matigi Yezu tɔgɔ la dɔrɔn. Nii Senuman tun ma jigi u si kan fɔlɔ.

¹⁷O tuma na, Piyɛri ni Zan y'u bolo la u kelen kelen kuun na, u bɛɛ ye Nii Senuman sɔrɔ.

¹⁸Simɔn y'a ye ko cidenw y'u bolo la mɔgɔ nunu kuun na n'u ye Nii Senuman sɔrɔ minkɛ, a tun b'a fɛ ka wari d'u ma,

¹⁹a y'a fɔ u ye ko: «Aw ka sebagaya nin dɔ di ne ma, waasa ni ne ye n bolo la mɔgɔ min kuun na, o tigi ka Nii Senuman sɔrɔ.»

²⁰Nga Piyɛri y'a jaabi ko: «E n'i ka wari bɛɛ ka halaki, bari i ka miiri la ko Ala ka sebagaya be se ka san.

²¹Ayiwa, niyɔrɔ t'i fɛ koo nin na, lɔyɔrɔ tena d'i ma, bari i kɔnɔ gwɛnin te Ala ɲakɔrɔ.

²²I ka nimisa ka yafa daali Matigi fɛ i ka miirijugu nin kosɔn, n'a sɔrɔ a bena yafa i ma.

²³N'o tɛ, i sɔɔn ka jugu, halibi i kɛnin be kojugu ka jɔɔn ye.»

²⁴O la, Simɔn ko: «Aw yɛrɛ ka Matigi daali ne ye, waasa aw ye min fɔ, o kana n sɔrɔ.»

²⁵Piyɛri ni Zan tun be min lɔn Yezu ka koo la, u y'o fɔ mɔgɔw ye ka ban, u kɔsegitɔ Zeruzalɛmu, u tora ka Yezu ka kibaru diman fɔ Samari mara dugu caaman na.

²⁶Matigi ka mɛlɛkɛ kumana Filipu fɛ ko: «Filipu, i labɛn ka taga worodugu ɲafan fɛ. Sira min be bɔ Zeruzalɛmu ka taga Gaza, i k'o minɛ, a taamabagaw man ca.»

²⁷O la, Filipu wilila k'o sira minɛ. A tagara Etiyopika dɔ sɔrɔ sira kan, min tun bɔra Ala batoyɔrɔ la Zeruzalɛmu. O cɛɛ nin tun ye Etiyopi jamana ka masamuso Kandasi ka baaraɲamɔgɔw dɔ ye. Ale tun be masamuso ka nafolo bɛɛ kunna.

²⁸A segitɔ, a tun siginin be a ka wotoro kɔnɔ ka to ka kira Ezayi ka kitabu kalan.

²⁹Nii Senuman y'a fɔ Filipu ye ko a ka gwɛrɛ wotoro nin na.

³⁰Filipu bolila ka gwɛrɛ, k'a ye ko cɛɛ be kira Ezayi ka kitabu kalanna. A y'a kaan to a ma ko: «I be yɔrɔ min kalanna ten wo, i b'a kɔrɔ lɔn wa?»

³¹A y'a jaabi ko: «N be se k'a kɔrɔ lɔn cogo di ni mɔgɔ ma n dɛmɛ?» O la, a y'a ɲini Filipu fɛ ko a ka yɛlɛ ka sigi ale gɛrɛfɛ.

³²A tun be yɔrɔ min kalanna, o filɛ nin ye: «A kɛra i ko saga, u be tagara ni min ye fagayɔrɔ la. A jera i ko sagaden, a sii tigɛbaga bolo, a ma foyi fɔ.

³³ Yɛrɛmajigi fɛ, a ma joo sɔrɔ. Jɔn ben'a tɔgɔ wele tugu? Bari a ye diɲɛ to a ma sii sɔrɔ, k'a bila a kɔ.»

³⁴Cɛɛ nin y'a fɔ Filipu ye ko: «O tuma na, kira nin be kuma jɔn le koo la? Sabali k'o fɔ ne ye. A yɛrɛ koo lo wa, walima mɔgɔ wɛrɛ ta?»

³⁵O la, Filipu y'a bolo tintin o yɔrɔ nin kan, ka Yezu ka kibaru diman fɔ cɛɛ ye.

³⁶K'u to sira kan, u sera jii dɔ yɔrɔ la. Cɛɛ ko: «Jii filɛ nin ye, mun be se k'i bali ka ne batize?» [

³⁷Filipu y'a jaabi ko: «N'i lara Yezu la kosɔbɛ, ne be se k'i batize.» Cɛɛ ko: «Ne lara a la ko Yezu Krista ye Ala Deen ye.»]

³⁸A y'a fɔ ko wotoro bolibaga ka wotoro lalɔ. Ale ni Filipu jigira ka don jii kɔnɔ, Filipu y'a batize.

³⁹U bɔra jii kɔnɔ tuma min na, Matigi ka Nii ye Filipu ta ka bɔ yen. Cɛɛ m'a ye tugu. Nga a nisɔn diyanin tagara n'a ka sira ye.

⁴⁰Filipu nan'a ye ko ale be Azɔti. A tora ka taga duguw la, ka kibaru diman fɔ o yɔrɔw la, fɔɔ ka na se Sezare.