Read dyu Ɔrɔmukaw 1 Bible Online

Ɔrɔmukaw 1 - dyu bible

Ɔrɔmukaw 1

¹Ne Pɔli min ye Yezu Krista ka jɔɔn ye, ne welela ka kɛ ciden ye, ne wolomana ka kɛ Ala ka kibaru diman fɔbaga ye.

²Ala yɛrɛ tun y'o kibaru diman nin koo fɔ a ka kuma na a ka kiraw barika la,

³o y'a Dencɛ ka koo ye, ale min wolola Dawuda kɔmɔgɔw fɛ ka kɛɲɛ ni adamadenya ye.

⁴Nii Senuman y'a yira ko an Matigi Yezu Krista ye Ala Dencɛ ye, o sebagaya lɔnna a kununni fɛ a sanin kɔ.

⁵Ne ye nɛɛma sɔrɔ ale lo barika la ka kɛ ciden ye, waasa ka siya wɛrɛw dɛmɛ u k'u jigi la Krista kan ka mɛnni kɛ a fɛ, janko a tɔgɔ ka boɲa.

⁶Yezu Krista ye minw wele, aw fana ye u dɔw ye.

⁷Ala ye aw minw wele ka kɛ a ka jama ye, n'aw koo ka d'a ye n'aw be Ɔrɔmu dugu kɔnɔ, ne be bataki nin ci aw bɛɛ ma. An Faa Ala n'an Matigi Yezu Krista ka nɛɛma ni hɛrɛ kɛ aw ye.

⁸Ne be n ka Ala fo Yezu Krista barika la, aw bɛɛ kosɔn, bari aw tɔgɔ sera yɔrɔ bɛɛ la ko aw lara Krista la.

⁹Ne be baara kɛ Ala min ye ni n dusu ye k'a Dencɛ koo fɔ, o min ye kibaru diman ye, ale ye ne seere ye ko ne be to k'aw ka koo miiri

¹⁰ne ka daalili la tuma bɛɛ. N b'a ɲini a fɛ ko n'a kɛra a sago ye, a ka sira di ne ma ka se ka taga aw fɛ sisan.

¹¹Bari ne b'a fɛ kosɔbɛ k'aw ye, ka Nii Senuman ka seko dɔ fɔ aw ye waasa aw ka se ka fanga sɔrɔ,

¹²walima, ka ɲɔgɔn jaa gwɛlɛya an jigi barika la.

¹³ N badenw, ne t'a fɛ k'aw to o lɔnbaliya la, ko siɲɛ caaman ne y'a latigɛ ko ne bena taga aw fɛ, waasa ka se ka baara sabatinin kɛ aw cɛma i n'a fɔ n b'a kɛ siya wɛrɛw cɛma cogo min na, nga ne te sira sɔrɔla.

¹⁴Ne ka kan ka baara kɛ mɔgɔw cɛma minw ɲaa yɛlɛla, ni minw ta ma yɛlɛ, ani kolɔnbagaw ni kolɔnbaliw cɛma.

¹⁵O la, a ka di ne ye kosɔbɛ ka kibaru diman fɔ aw Ɔrɔmukaw ye fana.

¹⁶ Ne te maloya ka kibaru diman fɔ, bari Ala ka sebagaya koo lo, mɔgɔ minw be l'a la, kisili ye olu ta ye, k'a daminɛ zuwifu ma fɔlɔ, o kɔ siya wɛrɛw.

¹⁷ Kibaru diman le b'a yira ko Ala be mɔgɔ jati mɔgɔtilennin ye a jigi kosɔn, a be to o tilenninya la jigi barika la, i ko a fɔra cogo min na Ala ka kuma na ko: «Mɔgɔtilennin bena kisi lanaya barika la.»

¹⁸Ka Ala to sankolo la, a be dimi mɔgɔw fɛ minw te siran a ɲa, n'u be tilenbaliyako kɛ ka tiɲɛ dogo.

¹⁹Bari adamaden be se ka Ala ka koo minw faamu, olu yirala u la ka gwɛ: Ala yɛrɛ le y'o yira u la.

²⁰Tiɲɛ na, k'a ta diɲɛ dantuma na, adamadenw be Ala ka koo yebaliw ye ka gwɛ a ka baara fɛ, o min ye a ka sebagaya banbali n'a ka Alaya ye. O la, tiɲɛ sɔrɔsira t'u fɛ tugu.

²¹ Bari u ye Ala lɔn, nga u ma sɔn k'a bato i n'a fɔ Ala, ani u ma sɔn ka barika la a ye a cogo la. U filila u ka miiriyaw la ka kɛ nalomanw ye ka tunu dibi la.

²²U b'u yɛrɛ jati kolɔnbagaw ye nga u ye nalomanw ye.

²³ Nɔɔrɔtigi Ala min te sa, u m'ale bato fɔɔ adamaden min be sa, ale jaa ni kɔnɔw, ni sennaanifɛnw ni fɛɛn minw be fofo duguma.

²⁴O le y'a to Ala y'u to u ka nigɛjuguw la, fɔɔ u be kakalaya kɛ k'u yɛrɛ dɔgɔya u ni ɲɔgɔn cɛ.

²⁵U ye Ala ka tiɲɛ to yen, ka tugu galon kɔ, ka danfɛnw le bato ka baara kɛ u ye, u ma Danbaga bato, ale min ka kan ka boɲa tuma bɛɛ. Amiina.

²⁶O le y'a to, Ala y'u to yen nigɛjuguw la min ye malobaliyako ye. U ka musow te cɛko kɛ n'a ɲaa ye tugu. Olu yɛrɛ be la ni ɲɔgɔn ye.

²⁷O cogo kelen na, cɛɛw te musow ɲini tugu fɔɔ u b'u cɛɲɔgɔnw. O le ka di u ye. U be malobaliyako kɛ, k'o sara sɔrɔ u yɛrɛ ma, min bɛnnin bɛ u ka fili ma.

²⁸U ma sɔn ka Ala lɔn minkɛ, Ala fana y'u to u ka miiriyajugu la. A kɛra ten, u man kan ka min kɛ, u b'o le kɛ.

²⁹Tilenbaliyako sifa bɛɛ b'u kɔnɔ: u be kojugu kɛ, u kɛra wasabaliw ni mɔgɔjuguw ye, ɲagoya fana b'u la, ɲɔgɔnfagako le b'u kɔnɔ, ni kɛlɛko, ni benkanni, ni juguya, ani u be galon la mɔgɔw kan k'u jalaki.

³⁰U be ɲɔgɔn tɔgɔjugu fɔ, Ala juguw lo, u b'u yɛrɛ boɲa ka kɛlɛw tigɛ, u daa ka ca, u be se kojugu la kosɔbɛ, u murutinin be u wolobagaw ma.

³¹U kɛra nalomanw ye, u te lɔ kelen kan, u ka koo ka gwɛlɛ, u fana te makari ɲɔgɔn na.

³²U be Ala ka koo latigɛnin lɔn, ko ni mɔgɔ min b'o koo ɲɔgɔn kɛ, o tigi ka kan ni saya ye. O bɛɛ n'a ta, u be to k'o kɛ, ka sɔn o kɛbagaw ta ma fana.