Read dyu Ɔrɔmukaw 10 Bible Online

Ɔrɔmukaw 10 - dyu bible

Ɔrɔmukaw 10

¹N balimaw, min be ne dusu la, ani n be min ɲini Ala fɛ Isirayɛlidenw ye, o ye u ka kisiliko ye.

²Bari ne be se k'a fɔ k'u jijanin be kosɔbɛ Ala koo la, u jijanin be kɔni, nga lɔnniyasɔbɛ t'u fɛ.

³Tilenninya min be sɔrɔ Ala fɛ, u m'o koo faamu, o la, o tun be tilenninya nin ɲini u yɛrɛ ka fanga la. O le y'a to tilenninya min be sɔrɔ Ala fɛ, u ma se k'u yɛrɛ majigi Ala ye ka mɛnni kɛ o koo la.

⁴Tiɲɛ na, sariya dafanin ye Krista ye, janko ni mɔgɔ min lara Krista la, Ala k'o tigi jati mɔgɔtilennin ye.

⁵ Musa fana y'a sɛbɛn tilenninya koo la min be sɔrɔ sariya batoli barika la ko: «Ni mɔgɔ min be sariya sira taama, o tigi bena balo o barika la.»

⁶ Tilenninya min be sɔrɔ jigi barika la, ale b'a ɲini i fɛ: «I kana miiri ko: ‹Jɔn le bena yɛlɛ sankolo la?› N'i y'o miiri, i b'a fɛ Krista ka kɔsegi ka na le.

⁷Walima ‹Jɔn bena jigi dingɛ dibiman kɔnɔ?› » O ye Krista ka kununko ye tugu.

⁸Mun le be fɔ tugu? «Kuma nin b'i tulo kɔrɔ, a b'i daa la ani a b'i kɔnɔ.» An be kuma min fɔra, o ye jigi koo ye.

⁹N'i sɔnna k'a fɔ ko Yezu ye Matigi ye ani ka l'a la ko Ala y'a kunun a sanin kɔ, e bena kisi.

¹⁰Tiɲɛ na, n'i lar'a la i dusu la, Ala b'i jati mɔgɔtilennin ye, n'a bɔra i daa la, i be kisi.

¹¹ Bari a fɔra Ala ka kuma na ko: «Ni mɔgɔ min lara Ala la, o tigi tena maloya.»

¹²O la, danfara te zuwifuw ni siya wɛrɛw cɛ, u bɛɛ ka Matigi ye kelen ye, min man'a daali, a be o tigi ta ɲa kosɔbɛ.

¹³ Bari: «Mɔgɔ o mɔgɔ mana Matigi tɔgɔ wele, o tigi bena kisi.»

¹⁴U be se ka kɛ cogo di ka Matigi daali, n'u ma l'a la? U fana be se ka l'a la cogo di, n'u m'a koo mɛn? U fana be se k'a koo mɛn cogo di, ni mɔgɔ m'a fɔ u ye?

¹⁵ Mɔgɔ fana be se k'a koo fɔ cogo di, n'u ma ci? O la, a fɔra Ala ka kuma na ko: «Mɔgɔ minw be kibaru diman fɔ,» ko: «Olu yenin be mɔgɔ nisɔndiya!»

¹⁶ Nga mɔgɔ bɛɛ ma sɔn kibaru diman ma, o le kosɔn Ezayi y'a fɔ ko: «Matigi, jɔn le lara an ka waajuli la?»

¹⁷O la, mɔgɔ be waajuli mɛn ka sɔrɔ ka la Krista la, waajuli le ye Krista ka koo ɲafɔli ye.

¹⁸ O la, ne be n yɛrɛ ɲininga ko u m'o mɛn wa? U kɔni y'o mɛn. A fɔra Ala ka kuma na ko: «Waajulikɛlaw kaan do mɛnna yɔrɔ bɛɛ la, u ka kuma sera fɔɔ diɲɛ daan na.»

¹⁹ Ne be n yɛrɛ ɲininga tugu ko: «Isirayɛlidenw tun ma nin faamu wa?» Musa kɔnna ka Ala ka kuma nin fɔ ko: «Siya min te foyi ye, ne bena olu kɛ ka keliya don aw la. Hakili te siya min fɛ, ne ben'a kɛ aw be dimi olu kosɔn.»

²⁰ Ezayi tagara ɲa k'a fɔ yɛrɛ ko Ala y'a fɔ ko: «Mɔgɔ minw tun te ne yɔrɔ ɲinina, olu ye ne ye. Mɔgɔ minw tun te foyi ɲinina ne fɛ, ne ye n yɛrɛ yira olu la.»

²¹ Nga Isirayɛlidenw koo la, a y'a fɔ ko Ala ko: «Ne tilera ka n bolo di siya murutinin nin ma, olu minw tulo ka gwɛlɛ.»