Read dyu Ɔrɔmukaw 11 Bible Online

Ɔrɔmukaw 11 - dyu bible

Ɔrɔmukaw 11

¹ Ne be n yɛrɛ ɲininga k'o tuma na, Ala y'a ka Isirayɛli jama fili wa? Ayi dɛ! Ne fana y'u dɔ ye, Ibrayima deen dɔ, ka bɔ Bɛnzamɛn kɔmɔgɔw la.

²Ala m'a ka jama bila. N'aw be Ala ka kuma kalan Eli koo fɔra yɔrɔ min na, a ye Ala daali Isirayɛlidenw ye cogo min na, aw m'o faamu wa?

³ A ko: «Matigi, u y'i ka kiraw faga k'i ka sarakabɔyɔrɔw bɛɛ cɛn, ne kelenpe le tora, u fana b'a fɛ ka ne faga.»

⁴ Nga Ala y'a jaabi ko di? A y'a fɔ a ye ko: «Ne ye mɔgɔ waa wolonwula (7 000) mara ne yɛrɛ ye, olu minw ma u kunbiri gwan *Baali kɔrɔ.»

⁵O cogo la, bii fana dɔw be yen minw kɛra u tɔɔ ye, Ala ye nɛɛma kɛ minw ye k'u woloma.

⁶Nga ni wolomani nin be kɛ Ala ka nɛɛma barika la, kɛwali niin t'o la tugu, n'o tɛ, o te kɛ nɛɛmako ye tugu.

⁷An bena mun le fɔ? Isirayɛlidenw tun be fɛɛn min ɲinina, u m'a sɔrɔ, nga minw wolomana, olu y'a sɔrɔ, tɔɔ nunu dusu gwɛlɛyara

⁸ ka kɛɲɛ ni Ala ka kuma ye ko: «Ala y'u kɛ hakilitanw ye, ka ɲaa d'u ma, u te se ka yeli kɛ ni minw ye, ka tulo d'u ma, u te se ka mɛnni kɛ ni minw ye fɔɔ ka na se bii ma.»

⁹Masacɛ Dawuda fana y'a fɔ ko: «U ka dumuni ka kɛ jaan ye u fɛ, a ka kɛ u minɛjɔ ye. A ka kɛ u ka seen talonfɛn ye, ka kɛ u ka baarajugu sara ye!»

¹⁰ Ko: «U ɲaaw ka dibi, u kana yeli kɛ. A kɛ u birinin be to tuma bɛɛ.»

¹¹Ne be n yɛrɛ ɲininga tugu ko Isirayɛlidenw talonna ka ben minkɛ, u bena to ten wa? Ayi dɛ! Nga u filila, o le y'a to siya wɛrɛw sera ka kisili sɔrɔ, o fana kɛra sababu ye ka keliya don Isirayɛlidenw dusu la.

¹²N'u ka filiko kɛra diɲɛ ka hɛrɛ sɔrɔ sababu ye, ani u ka dɛsɛko ka kɛ siya wɛrɛw ka nafa ye, n'u nana segi Ala ma pepewu, o bena kɛ hɛrɛ ye kosɔbɛ.

¹³Ne b'o fɔ aw siya wɛrɛw ye, ne cira ka baara kɛ aw le ye, ne be boɲa la o baara nin kan,

¹⁴waasa ka keliya wili ne ka siya dusu la, janko dɔw ka se ka kisi u cɛma.

¹⁵Ala y'u bila gɛrɛfɛ minkɛ, n'o le kɛra sababu ye diɲɛ mɔgɔw sera ka bɛn ni Ala ye, u ka kɔsegiko ka bɛn ni Ala ye, o tena kɛ i n'a fɔ mɔgɔ le sara ka kunun wa?

¹⁶Sumankun fɔlɔ min mɔna, n'o dira Ala ma, o b'a yira ko a tɔɔ bɛɛ be kɛ Ala ta ye. Ni yiri lili ka ɲi, yiri bolow ka ɲi. [1]

¹⁷Isirayɛlidenw be i n'a fɔ olivuyiri min tutunin bɛ foro kɔnɔ, aw siya wɛrɛw be i n'a fɔ waga kɔnɔ ta. U ye foro kɔnɔ ta bolo dɔw tigɛ, k'aw ta ka nɔrɔ o nɔɔ na janko aw ka nɛɛma sɔrɔ o juu fɛ.

¹⁸O kama, i kana i yɛrɛ boɲa, ka bolo tigɛninw lɔgɔbɔ bari i te yiri juu ye, i ye bolo le ye.

¹⁹I be se k'a fɔ fana ko bolo dɔ nunu tigɛra waasa i ka se ka nɔrɔ juu la.

²⁰O ye tiɲɛ ye, olu tigɛra u ka lanabaliya le kama, aw nɔrɔla lanaya le barika la. O la, aw kana aw yɛrɛ boɲa, aw ka siran le.

²¹Bari ni Ala ma se ka makari yiribolo kɔrɔman nunu na, aw ta tena kɛ ten fana wa?

²²Aw ka Ala ka ɲumanya n'a ka fariyako filɛ, a fariyara Isirayɛlidenw ma olu minw benna, ani a ɲana aw ma. Fɔɔ aw nɔrɔnin ka to a la, n'o tɛ aw bena tigɛ i n'a fɔ dɔ nunu.

²³Olu fana, n'u ma to u ka lanabaliya la, u niin bena don tugu, bari see be Ala ye k'u niin don.

²⁴Aw minw ye siya wɛrɛw ye, n'aw niin donna, minw tun ye siya nin yɛrɛ ye n'u niin bɔra, olu ka kɔsegi ka don, o be kɛ baasi ye wa?

²⁵N balimaw, ne t'a fɛ aw ka to kodogonin nin faamubaliya la, janko aw kana aw yɛrɛ jati kolɔnbagaw ye. Isirayɛliden dɔw bena to u ka dusugwɛlɛya la fɔɔ siya tɔw ka donyɔrɔ sɔrɔ Ala fɛ. [2]

²⁶ O cogo la fana, Isirayɛlidenw bɛɛ bena kisi, i ko a fɔra Ala ka kuma na cogo min na ko: «Min bena mɔgɔw hɔrɔnya, ale bena bɔ *Siyɔn dugu kɔnɔ, a ben'a kɛ Yakuba kɔmɔgɔw be siran Ala ɲa.»

²⁷ «Ni ne y'u ka hakɛw yafa u ma tuma min na, o le ben'a yira ko ne bɛnna ni olu ye.»

²⁸Kibaru diman faan fɛ, u kɛra Ala juguw ye, o kɛra aw siya wɛrɛw ka dagamu ye, nga Ala ka wolomani faan fɛ, u koo ka di Ala ye u faaw kosɔn,

²⁹bari ni Ala ye fɛɛn min di, a t'o minɛ tugu, n'a ye weleli kɛ, a t'o yɛlɛma.

³⁰Fɔlɔfɔlɔ, aw tun te Ala ka kuma bato, sisan olu t'a bato, o le y'a to Ala makarila aw la.

³¹Olu banna k'a ka kuma bato sisan, o le y'a to a makarila aw la. A makarila aw la cogo min na, a bena makari olu la ten fana.

³²Bari Ala ye mɔgɔ bɛɛ to u ka murutili la, janko a ka se ka makari u bɛɛ la.

³³ Ala dafanin lo, hakilitigiya ni lɔnniya la! Mɔgɔ te se k'a ka kolatigɛninw faamu, a ka koo fana te se ka faamu.

³⁴ A fɔra Ala ka kuma na ko: «Jɔn le ye Matigi ka miiriya lɔn? Walima jɔn le kɛr'a ladibaga ye?»

³⁵ Walima: «Jɔn le kɔnna ka Ala sɔn, a ka sɔrɔ k'o sara?»

³⁶ Bari fɛɛn bɛɛ bɔra ale lo la, ale lo y'u bɛɛ dan, u kɛra a ta ye. Boɲa ka la ale kan tuma bɛɛ la! Amiina.