Read dyu Ɔrɔmukaw 3 Bible Online

Ɔrɔmukaw 3 - dyu bible

Ɔrɔmukaw 3

¹O tuma na, ka kɛ zuwifu ye, o tɔnɔ be min sa? Kɛnɛkɛnɛko tɔnɔ ye jumɛn ye?

²O tɔnɔ ka bon cogo bɛɛ la. Ala ka kuma kalifara zuwifuw le ma.

³Ayiwa, ni u dɔw ma kɛ mɔgɔsɔbɛw ye, Ala ka tilenninya be se ka tunu o kosɔn wa?

⁴ Ayi dɛ! Hali ni adamadenw be galon tigɛ, Ala be tiɲɛ fɔ, i ko a fɔra cogo min na ko: «O la, tiɲɛ ka sɔrɔ i fɛ i kuma waati la, i ka see sɔrɔ i ka kiti la.»

⁵Nga ni Ala ka tilenninya be lɔn an ka tilenbaliya barika la, an bena mun le fɔ sa? O kɔrɔ ko ni Ala dimina an kɔrɔ, o ye kojugu ye wa? N be kumana adamadenw kumacogo le la.

⁶Ayi dɛ! N'a kɛra ten, Ala ben'a kɛ cogo di ka diɲɛ kiti?

⁷Ni ne ye galon tigɛ, o min barika la Ala ka tiɲɛ be lɔn kosɔbɛ ani boɲa be la a kan fana, mun na ne be jalaki i n'a fɔ hakɛkɛla?

⁸O la, dɔw b'a fɔ ko: «An ka kojugu kɛ waasa koɲuman ka sɔrɔ o la.» Mɔgɔ dɔw be ne tɔgɔ cɛn ko ne b'o le fɔ. O mɔgɔ nunu ka jalakili ka ɲi.

⁹Nga, mun lo sa? An zuwifuw ka fisa ni tɔw ye wa? Abada, bari ne y'a fɔ ka ban ko zuwifu ni siya wɛrɛw bɛɛ be hakɛ ka fanga kɔrɔ.

¹⁰I ko a fɔra Ala ka kuma na cogo min na ko: «Mɔgɔtilennin si te yen, hali mɔgɔ kelen.

¹¹Hakili te o si fɛ, o si te Ala yɔrɔ ɲini fana.

¹² U bɛɛ filinin lo, u bɛɛ kɛra mɔgɔjuguw ye. U si te koɲuman kɛ, hali mɔgɔ kelen.

¹³ U gɔnɔ ye kaburu dayɛlɛnin ye, u be mɔgɔw lafili n'u daa ye, u ka kuma be i ko fɔnfɔnni ka baga.

¹⁴ Danga ni kumajugu le fanin b'u daa la.

¹⁵U ka teli ka mɔgɔ faga.

¹⁶U be tɛmɛ yɔrɔ o yɔrɔ, u be cɛnni ani bɔnɛ le to yen.

¹⁷ U te hɛrɛ sira lɔn.

¹⁸ U te siran Ala ɲa fewu.»

¹⁹An y'a lɔn ko sariya be fɛɛn minw bɛɛ fɔ, a b'o fɔ mɔgɔw ye minw b'a ka fanga kɔrɔ, janko mɔgɔ si kana se ka foyi fɔ, ani mɔgɔ bɛɛ ka jalaki Ala ɲakɔrɔ.

²⁰ O le y'a to mɔgɔ si te se ka kɛ mɔgɔtilennin ye a ɲakɔrɔ sariya batoli barika la, bari an be hakɛ lɔn sariya le barika la.

²¹Nga sisan, Ala y'a yira ko ale bena mɔgɔw jati mɔgɔtilenninw ye sababu min na, sariya seen t'o la. Sariya ni kiraw ye o le fɔ.

²² Mɔgɔ o mɔgɔ lara Yezu Krista la, Ala be olu bɛɛ jati mɔgɔtilenninw ye, wolomani t'o la.

²³Bari mɔgɔ bɛɛ ye hakɛ kɛ, u yɔrɔ jaɲana Ala ka nɔɔrɔ la.

²⁴Nga Ala ye nɛɛma kɛ u ye k'u jati mɔgɔtilenninw ye Yezu Krista sababu la, ale min y'u kunmabɔ.

²⁵Mɔgɔ minw lar'a la ko a sara olu kosɔn, Ala y'a kɛ hakɛ yafa saraka ye, waasa k'ale Ala yɛrɛ ka tilenninya yira, bari mɔgɔ minw tun ye hakɛ kɛ fɔlɔfɔlɔ, a ma olu jalaki

²⁶a ka muɲuli waati la. O la, Ala y'a ka tilenninya yira sisan. Mɔgɔ minw lara Yezu la, a ye olu kɛ mɔgɔtilenninw ye, janko a ka tilenninya ka ye.

²⁷Adamaden ka yɛrɛboɲayɔrɔ be yen tugu wa? Ayi, a te yen. Mun le ye o kɛ? A ka sariya batoli wa? Ayi, a ka lanaya kosɔn lo.

²⁸Bari an b'a miiri ko adamaden be jati mɔgɔtilennin ye a jigi le barika la. Sariya batoko seen t'o la.

²⁹Walima Ala ye zuwifuw dama ka Ala ye wa? Siya wɛrɛw ka Ala tɛ fana wa? Ɔnhɔn, siya wɛrɛw ta lo fana.

³⁰ Bari Ala kelenpe le be yen ale min bena mɔgɔkɛnɛkɛnɛninw jati mɔgɔtilenninw ye u jigi barika la, ka kɛnɛkɛnɛbaliw jati mɔgɔtilenninw ye o jigi kelen barika la.

³¹A ma kɛ ko an b'a fɛ ka sariya sanga ben jigi kama. Ayi! An b'a fɛ sariya koo ka taga ɲa kosɔbɛ.