Read dyu Ɔrɔmukaw 4 Bible Online

Ɔrɔmukaw 4 - dyu bible

Ɔrɔmukaw 4

¹An bena mun le fɔ an bɛma Ibrayima ka koo la? A ye mun le sɔrɔ adamadenya barika la?

²Ni Ibrayima jatira mɔgɔtilennin ye a ka kɛwaliw barika la, a be se k'a yɛrɛ boɲa, nga a te se k'o kɛ Ala ɲakɔrɔ.

³ Tiɲɛ na, a fɔra Ala ka kuma na ko: «Ibrayima lara Ala la, o la, a jatira mɔgɔtilennin ye.»

⁴Mɔgɔ min ye baara kɛ, ale ka sara te jati boɲafɛn ye, a ka kan n'a ye le.

⁵Nga mɔgɔ min ma kɛwaliɲuman kɛ, k'a sɔrɔ a y'a jigi la Ala kan, ale min be sɔn ka mɔgɔjugu jati mɔgɔtilennin ye, a bena o tigi jati mɔgɔtilennin ye a ka lanaya kosɔn.

⁶Ala be mɔgɔ min jati mɔgɔtilennin ye n'a ma o tigi ka kɛwali jati, masacɛ Dawuda b'o tigi ka dagamuko fɔ ko:

⁷«Mɔgɔ minw ka filiw yafara, n'u ka hakɛw t'u kan tugu, olu dagamunin lo.

⁸ Matigi te mɔgɔ min ka hakɛ jati tugu, o tigi dagamunin lo.»

⁹Dagamu min koo fɔra, ale te dan zuwifuw dama ma, siya wɛrɛw fana niin b'a la. An y'a fɔ ka ban ko Ibrayima lara Ala la, o la, a jatira mɔgɔtilennin ye.

¹⁰A jatira mɔgɔtilennin ye tuma jumɛn? A tun ma kɛnɛkɛnɛ tuma min na wa, walima a kɛnɛkɛnɛni kɔ? O ma kɛ a kɛnɛkɛnɛnin kɔ, o kɛra n'a ma kɛnɛkɛnɛ fɔlɔ.

¹¹ O kɔ, kɛnɛkɛnɛko nana d'a ma ka kɛ taamasiɲɛ ye, k'a yira ko a lara Ala la minkɛ, Ala y'a jati mɔgɔtilennin ye o kosɔn k'a to a ka kɛnɛkɛnɛbaliya la. O cogo la fana, kɛnɛkɛnɛbali minw bɛɛ lara Ala la ni olu fana jatira mɔgɔtilenninw ye Ala fɛ, Ibrayima kɛra u bɛɛ faa ye.

¹²A kɛra mɔgɔkɛnɛkɛnɛninw faa ye fana, olu minw ma kɛnɛkɛnɛ dɔrɔn, nga u y'u jigi la Ala kan i n'a fɔ an faa Ibrayima y'a kɛ cogo min na k'a sɔrɔ a tun ma kɛnɛkɛnɛ fɔlɔ.

¹³ Ala y'a daa di Ibrayima ma ko a bena diɲɛ di ale n'a kɔmɔgɔw ma ka kɛ u ta ye. O ma kɛ sariya batoli kosɔn dɛ, nga Ala y'a jati mɔgɔtilennin ye bari Ibrayima lar'a la.

¹⁴ N'o koo tun be sɔrɔ sariya batoli fɛ, jigiko tun bena kɛ fuu ye, dadili fana tun bena kɛ fuu ye.

¹⁵Bari dusudimi be sɔrɔ sariya sababu la. Sariya siginin te yɔrɔ min na, sariya cɛnko fana te fɔ o yɔrɔ la.

¹⁶ Ayiwa, Ala y'a daa di koo min na, o be sɔrɔ jigi le barika la, janko o ka kɛ nɛɛmako ye, Ibrayima kɔmɔgɔw bɛɛ ka se k'u niyɔrɔ sɔrɔ o la. Mɔgɔ minw be sariya bato, olu dama ka koo tɛ, nga mɔgɔ minw b'u jigi la Ala kan i n'a fɔ an bɛɛ faa Ibrayima, olu fana ta lo.

¹⁷ A fɔra Ala ka kuma na ko: «Ne y'i kɛ siya caaman faa ye.» Ala ɲakɔrɔ, an faa lo a y'a jigi la Ala min kan, ale lo be suuw kunun. Fɛɛn minw tun te yen fɔlɔ, ale lo b'olu dan.

¹⁸ Mɔgɔ tun te se k'a jigi la fɛɛn min kan, a y'a jigi la o kan. O la, a kɛra siya caaman faa ye, ka kɛɲɛ ni Ala ka fɔta ye a ye ko: «I kɔmɔgɔw bena caya ten.»

¹⁹ A tun kɔrɔla kosɔbɛ, a sii tun sera saan kɛmɛ ɲɔgɔn ma, a ka muso Sara fana sii tun tɛmɛna denwolo ma. O bɛɛ n'a ta a jigi ma tigɛ, k'a sɔrɔ a tun surunyana saya ma.

²⁰Ala ka dadili faan fɛ, a jigi ma tigɛ fewu, nga jigi barika la, a ye fanga sɔrɔ ka boɲa la Ala kan.

²¹A lanin tun b'a la kosɔbɛ ko Ala y'a daa di koo min na, ko see b'a ye k'o kɛ.

²²O la, «a jatira mɔgɔtilennin ye.»

²³A fɔra Ala ka kuma na ko: «O le y'a to a jatira,» o kuma nin ma fɔ ale dama kosɔn dɛ.

²⁴Nga an fana niin b'o la, Ala bena an minw jati mɔgɔtilenninw ye bari an lara Ala la ale min y'an Matigi Yezu kunun a sanin kɔ.

²⁵ Yezu fagara an ka hakɛw kosɔn, nga a kununna janko k'an kɛ mɔgɔtilenninw ye.