Read dyu Ɔrɔmukaw 5 Bible Online

Ɔrɔmukaw 5 - dyu bible

Ɔrɔmukaw 5

¹An jatira mɔgɔtilenninw ye jigi barika la, o la, hɛrɛ donna an ni Ala cɛ an Matigi Yezu Krista barika la.

²Ale Yezu barika la fana, an ye niyɔrɔ sɔrɔ nɛɛma nin na an jigi sababu la. An be nisɔndiya Ala ka nɔɔrɔ koo la, bari an jigi b'a la ko an bena o ɲɔgɔn sɔrɔ.

³O dama tɛ, an be nisɔndiya an ka tɔɔrɔkow la, bari an b'a lɔn ko tɔɔrɔ be na ni muɲuli ye.

⁴Muɲuli be na ni sesɔrɔli ye kɔrɔbɔli kan, ni see sɔrɔla, jigi fana be sɔrɔ.

⁵Jigi do te taga ka mɔgɔ to bololakolon, bari Ala y'an kanu cogo min na, o b'an dusu la Nii Senuman barika la, a y'ale min d'an ma.

⁶Tiɲɛ na, tuma min na barika tun te an na, Krista sara mɔgɔjuguw kosɔn o waati latigɛnin na.

⁷A ka gwɛlɛ mɔgɔ dɔ ka sɔrɔ min be sɔn ka sa mɔgɔtilennin kosɔn, nga n'a sɔrɔ dɔ be sɔn ka sa mɔgɔɲuman dɔ kosɔn.

⁸Nga Ala y'a yira an na ko a b'an kanu. K'an to an ka hakɛ la, Krista sara an kosɔn.

⁹An jatira mɔgɔtilenninw ye Krista ka saya barika la minkɛ, siga t'a la, an bena kisi Ala ka dimi ma fana ale kelen barika la.

¹⁰Bari an tun ye Ala juguw ye tuma min na, Ala sɔnna anw ka bɛn n'ale ye a Dencɛ ka saya barika la. An bɛnnin kɔ n'a ye, siga t'a la, an bena kisi a Deen barika la bari a be nii na.

¹¹O dama tɛ, an be nisɔndiya Ala kosɔn an Matigi Yezu Krista barika la, ale min sababu la, anw ni Ala cɛ bɛnna.

¹² Hakɛ daminɛna mɔgɔ kelen le sababu la diɲɛ na, saya fana nana hakɛ sababu la. O cogo la fana, saya sera mɔgɔ bɛɛ ma bari bɛɛ ye hakɛ kɛ.

¹³K'a ta o waati la ka na se sariya sɔrɔwaati ma, hakɛ tun be yen, nga ni sariya te yen, hakɛkɛla te jalaki.

¹⁴O bɛɛ n'a ta, k'a ta Adama ka waati ma fɔɔ ka na se Musa ka tile ma, mɔgɔw tun be sa, hali min ma hakɛ kɛ Adama ta cogo la, ale min banna ka Ala ka kuma bato. Mɔgɔ min tun ka kan ka na, Adama tun ye o tigi jaa ye.

¹⁵Nga hakɛ min kɛra, o ni Ala ka nɛɛma te se ka suma, bari, ni mɔgɔ kelen ka hakɛ kɛnin kosɔn mɔgɔ caaman sara, Ala ka nɛɛma ta te se ka fɔ a y'o min kɛ mɔgɔ caaman ye mɔgɔ kelen barika la, min ye Yezu Krista ye.

¹⁶Ala ka nɛɛma ni mɔgɔ kelen nin ka hakɛ ka baara te kelen ye, bari mɔgɔ kelen ka kojugu kosɔn, Ala ye kiti tigɛ ka jalaki ben mɔgɔw kan, nga kojugu caaman kɛnin kɔ, Ala makarila u la ka cogo di u ma u ka se ka jati mɔgɔtilenninw ye.

¹⁷Ni mɔgɔ kelen ka kojugu kosɔn, saya ye see sɔrɔ, mɔgɔ minw sɔnna Ala ka nɛɛma ma n'a y'u jati mɔgɔtilenninw ye, olu bena to nii na ka see sɔrɔ Yezu Krista kelenpe barika la.

¹⁸Ayiwa, mɔgɔ kelen ka kojugu kosɔn, jalaki sera mɔgɔ bɛɛ ma. O cogo la fana, mɔgɔ kelen ka koɲuman sababu la, mɔgɔ caaman be jati mɔgɔtilenninw ye ka nii sɔrɔ.

¹⁹Mɔgɔ caaman kɛra hakɛkɛlaw ye, mɔgɔ kelen ka murutili kosɔn, o cogo la fana mɔgɔ kelen ye Ala sago kɛ minkɛ, mɔgɔ caaman bena jati mɔgɔtilenninw ye.

²⁰Sariya sigira janko kojugu ka barika sɔrɔ, nga hakɛ barika boɲana yɔrɔ min na, Ala y'a ka nɛɛma boɲa o yɔrɔ la.

²¹Hakɛ tun ye fanga sɔrɔ mɔgɔw kan saya barika la cogo min na, o cogo la fana, tilenninya barika la, Ala ka nɛɛma be fanga sɔrɔ ka nii banbali di mɔgɔw ma an Matigi Yezu Krista barika la.