Read dyu Ɔrɔmukaw 6 Bible Online

Ɔrɔmukaw 6 - dyu bible

Ɔrɔmukaw 6

¹An ka mun le fɔ sa? An ka kan ka to hakɛ la janko Ala ka nɛɛma be boɲa wa?

²Ayi dɛ! An minw kɛra i n'a fɔ suu, hakɛ ta faan fɛ, an be se ka to hakɛ la cogo di?

³Yala aw m'a lɔn ko an minw bɛɛ batizera Yezu Krista tɔgɔ la, ko an batizera ka jɛn n'a ye a ka saya la fana wa?

⁴ An batizera ka jɛn n'a ye a ka saya la minkɛ, an fana suu donna n'a ye janko Krista kununna Faa Ala ka sebagaya barika la cogo min na, an fana jogo ka yɛlɛma ka kɛ kura ye.

⁵Bari n'an jɛnna n'ale ye sɔbɛ la a ka saya la, an fana bena kunun n'a ye.

⁶An ka nin faamu kosɔbɛ, ko an jogokɔrɔ korila ka gwengwen ɲɔgɔn fɛ ni Krista ye, janko o daa ka bila, an fana kana kɛ hakɛ ka jɔɔnw ye tugu.

⁷Bari ni mɔgɔ min sara, o tigi daa te hakɛ la.

⁸N'an jɛnna ni Krista ye ka sa, an be l'a la ko an bena to nii n'a fɛ.

⁹Tiɲɛ na, an y'a lɔn ko Krista kununna, ale te sa tugu, saya te se a kɔrɔ tugu.

¹⁰Bari a sara tuma min na, a sara janko ka hakɛ nagasi tuma bɛɛ, sisan a ɲanaman lo Ala ye.

¹¹O cogo la, aw fana k'aw yɛrɛ jati i n'a fɔ suu, hakɛ ta faan fɛ, ka kɛ mɔgɔ ɲanaman ye Ala ta faan fɛ Yezu Krista barika la.

¹²O la, aw farisogo min bena toli, aw kana sɔn hakɛ ka kuntigiya kɛ ale la tugu. Aw kana sɔn nigɛjugu ma.

¹³Aw kana aw farikolo yɔrɔ si kɛ kojugukɛfɛn ye ka to hakɛ la. Nga aw k'aw yɛrɛ di Ala ma. Aw ka kɛ i n'a fɔ mɔgɔ min sara ka kunun, k'aw farikolo yɔrɔ bɛɛ kɛ koɲumankɛ ta ye.

¹⁴Hakɛ tena see sɔrɔ aw kan tugu. Bari aw te sariya kɔrɔ tugu, nga aw be nɛɛma le kɔrɔ.

¹⁵O tuma na, an ka to ka hakɛ kɛ bari an te sariya kɔrɔ tugu fɔɔ nɛɛma wa? Ayi dɛ!

¹⁶Yala aw m'a lɔn ko n'aw y'aw yɛrɛ di fɛɛn min ma ka kɛ i n'a fɔ a ka jɔɔn, ka to ka mɛnni kɛ a fɛ, aw be kɛ o fɛɛn nin ka jɔɔn ye wa? N'a kɛra hakɛko ye, o laban ye halakili ye. Nga Ala sago kɛli be na ni tilenninya ye.

¹⁷An be barika la Ala ye bari aw tun ye hakɛ ka jɔɔnw ye, nga sisan u y'aw kalan min na, aw sɔnna o la n'aw dusu bɛɛ ye,

¹⁸k'aw yɛrɛ sɔrɔ ka bɔ hakɛ bolo ka kɛ tilenninya ka jɔɔnw ye.

¹⁹Ne be kuma adamaden ka kuma cogo la, bari aw barika ka dɔgɔ. Aw tun y'aw yɛrɛ kɛ konɔgɔninw ni koferekeninw ka jɔɔnw ye, ka muruti Ala ma. Sisan aw ka kɛ tilenninya ka jɔɔnw ye, ka kɛ Ala ta ye pepewu.

²⁰Tuma min na aw tun ye hakɛ ka jɔɔnw ye, tilenninyako tun te aw ka sira la.

²¹Aw ye mun le sɔrɔ o koow la, ni maloya tɛ bii nin na? Bari u laban ye halakili ye.

²²Nga sisan aw y'aw yɛrɛ sɔrɔ ka bɔ hakɛ bolo ka kɛ Ala ka jɔɔnw ye. Aw be fɛɛn min sɔrɔ o la, o ye dusu saniyako ye min laban ye nii banbali ye.

²³Bari hakɛ sara ye halakili ye, nga Ala ka nilifɛn ye nii banbali ye an Matigi Yezu Krista barika la.