Read dyu Ɔrɔmukaw 8 Bible Online

Ɔrɔmukaw 8 - dyu bible

Ɔrɔmukaw 8

¹Sisan kɔni, mɔgɔ minw be ni Yezu Krista ye, jalakiyɔrɔ si te olu la.

²Bari Nii Senuman min be hɛrɛ di Yezu Krista ka jɛnɲɔgɔnya barika la, ale ka see kɛra sababu ye ka ne hɔrɔnya ka bɔ hakɛko ni saya la.

³Sariya siginin tun te se ka koo min kɛ, farisogo ka barikatanya kosɔn, Ala y'o kɛ, a y'a yɛrɛ Dencɛ ci, ale nana wolo i n'a fɔ hakɛkɛla, ka kɛ saraka ye hakɛ sara kosɔn. A ye hakɛ ka baga faga,

⁴janko sariya be tilenninya min fɛ, an ka se k'ale kɛ, an minw te taama ka kɛɲɛ ni farisogo sago ye tugu, nga an be taama ka kɛɲɛ ni Nii Senuman sago ye.

⁵Tiɲɛ na, mɔgɔ min be taama ka kɛɲɛ ni farisogo sago ye, o tigi ka miiriya be to o le kan, nga min be taama ka kɛɲɛ ni Nii Senuman sago ye, o tigi ka miiriya be to Ala ka koo le kan.

⁶Ka sɔn farisogo ka koo ma, o laban ye saya ye, nga ka sɔn Nii Senuman ta ma, o ye balo ni hɛrɛ ye.

⁷Adamadenw ka nigɛjuguw sera mɔgɔ minw kɔrɔ, u ye Ala juguw ye. U te sɔn Ala ka sariya ma, u fana te se k'o kɛ.

⁸Bari ka mɔgɔ to a yɛrɛ bolo, a koo te se ka diya Ala ye.

⁹Aw kɔni, aw t'aw yɛrɛ sago kɛ tugu, aw be Nii Senuman sago le kɛ, bari Ala ka Nii be aw fɛ. Ni Krista ka Nii te mɔgɔ min fɛ, o tigi te Krista ta ye.

¹⁰Aw farisogo bilanin be saya ye hakɛ sababu la, nga ni Krista b'aw dusu la, Nii Senuman b'a kɛ aw be balo bari Ala y'aw jati mɔgɔtilenninw ye.

¹¹ Ala min ye Yezu Krista kunun a sanin kɔ, n'ale ka Nii b'aw la, ale kelen le bena nii don aw farisogo tolita la, a ka Nii Senuman barika la ale min b'aw la.

¹²O la n balimaw, an ka kan ka fɛɛn min kɛ, o te farisogo ka baara ye.

¹³Bari n'aw be taama ka kɛɲɛ ni farisogo sago ye, aw bena sa, nga n'aw y'aw jogo yɛlɛma pepewu Nii Senuman barika la, aw bena balo. [1]

¹⁴Mɔgɔ minw be taama ka kɛɲɛ ni Ala ka Nii sago ye, olu ye Ala deenw ye.

¹⁵ Aw ye Nii min sɔrɔ, ale t'aw bila jɔnya ni siranya la, Nii Senuman lo. Ale lo barika la aw kɛra Ala ka deenw ye, ani ale barika la an b'a fɔ Ala ye ko Baba, an Faa.

¹⁶O Nii Senuman nin b'a yira an na ko an kɛra Ala deenw ye.

¹⁷ N'an kɛra Ala deenw ye, an bena niyɔrɔ fana sɔrɔ Ala fɛ, an ni Krista bena o sɔrɔ ɲɔgɔn fɛ, bari n'an y'a ka tɔɔrɔ ɲɔgɔn sɔrɔ, an fana ben'a ka boɲa ɲɔgɔn sɔrɔ.

¹⁸Ne ka miiri la, boɲa min bena la an kan sini, o te se ka suma ni bii tɔɔrɔ ye.

¹⁹Bari Ala bena boɲa la a ka deenw kan loon min na, diɲɛ kɔrɔtɔnin be k'o loon makɔnɔ.

²⁰ Diɲɛ kɛra fuu ye, o te a yɛrɛ sago ye, nga a Danbaga sago lo. O bɛɛ n'a ta, jigi layɔrɔ be yen.

²¹Ala ben'a bɔ cɛnni bolo, k'a niin don a ka deenw ka yɛrɛsɔrɔ n'u ka boɲa na.

²²An y'a lɔn ko halibi diɲɛ bɛɛ be ŋunanna i n'a fɔ muso min be jigira.

²³ Diɲɛ dama tɛ, nga Ala y'an minw sɔn ni Nii Senuman ye min ye a ka difɛn fɔlɔ ye, an fana kɔnɔ gwannin lo k'an ka kunmabɔli kɔnɔ ka kɛ Ala ka deenw ye.

²⁴Bari an kisira, nga o ye jigiko ye. N'an ɲaa lara fɛɛn kan ka sɔrɔ k'an jigi la o kan, o te jigi ye. E ɲaa be fɛɛn na ka ban, e ben'a fɔ k'o ye jigiko ye cogo di?

²⁵Nga an ɲaa ma la fɛɛn min kan fɔlɔ, n'an y'an jigi la o kan, an bena jija k'o fɛɛn nin makɔnɔ.

²⁶O cogo la fana, Nii Senuman b'an dɛmɛ an ka dɛsɛyɔrɔw la, bari an te daalili cogo lɔn, nga Nii Senuman yɛrɛ le be daalili kɛ an nɔɔ na ni ŋunankan ye min te se ka fɔ.

²⁷Ala min be adamaden dusulako lɔn, ale b'a lɔn Nii Senuman be fɛɛn min fɛ, bari Nii Senuman be daalili kɛ Ala ka mɔgɔw ye ka kɛɲɛ ni Ala sago ye.

²⁸An y'a lɔn ko Ala be baara kɛ ni fɛɛn bɛɛ ye a kanubagaw ka makoɲa kama, a y'o minw wele ka kɛɲɛ n'a ka koo latigɛnin ye.

²⁹Ala kɔnna ka mɔgɔ minw woloma kabini fɔlɔfɔlɔ, a kɔnna k'a latigɛ fana k'olu cogo ka kɛ i n'a fɔ a Dencɛ ta, janko a Dencɛ nin ka kɛ mɔgɔ caaman kɔrɔ ye.

³⁰A kɔnna ka minw ka koo latigɛ, a ye olu wele, a ye minw wele, a ye olu jati mɔgɔtilenninw ye, a ye minw jati mɔgɔtilenninw ye, a ye boɲa la olu kan.

³¹An be mun fɔ tugu? Ni Ala b'an fɛ, jɔn be wili an kama tugu?

³²Ale min ma ban k'a yɛrɛ Dencɛ di ka sa an bɛɛ kosɔn, a be kɛ cogo di n'a tena fɛɛn bɛɛ di an ma ka fara a Dencɛ kan?

³³Ala ye mɔgɔ minw woloma, jɔn bena se ka olu jalaki? Ala yɛrɛ le y'u jati mɔgɔtilenninw ye.

³⁴Jɔn bena u jalaki? Bari Yezu Krista sara, o dama tɛ fana, a kununna, a siginin be Ala kinibolo fɛ, ka to ka Ala daali an ye.

³⁵Mun le be se k'an faran ka bɔ Krista ka kanuya la? Sigɛn, walima hakiliɲagami? Tɔɔrɔ, walima kɔngɔ? Dɛsɛ, walima farati? Walima n'u b'an faga wa?

³⁶ Ka kɛɲɛ ni Ala ka kuma ye, a ko: «E kosɔn, u be tile k'an faga, u b'an jati i ko saga fagataw.»

³⁷Nga o bɛɛ n'a ta, an kɛra sesɔrɔlaw ye kosɔbɛ, Krista barika la, ale min y'an kanu.

³⁸Bari ne jigi b'a la ko hali saya yɛrɛ, walima sijan, walima mɛlɛkɛw, walima jinaw, walima fɛɛn minw be diɲɛ na bii, walima minw bena kɛ yen sini, walima setigiw,

³⁹hali fangatigi minw be sanfɛ, walima minw be dugukolo jukɔrɔ, walima danfɛn wɛrɛw, fɛɛn si te yen min be se k'an faran ka bɔ Ala ka kanuya la min yirala an Matigi Yezu Krista sababu la.