Read dyu Ɔrɔmukaw 9 Bible Online

Ɔrɔmukaw 9 - dyu bible

Ɔrɔmukaw 9

¹Krista ka jɛnɲɔgɔnya barika la ne be min fɔ, o ye tiɲɛ ye, galon tɛ, Nii Senuman yɛrɛ b'a yira ne la ko ne be min fɔ, ko tiɲɛ lo.

²Dusukasi be ne la kosɔbɛ, ne nii tɔɔrɔnin lo tuma bɛɛ.

³Bari ne yɛrɛ b'a fɛ n niin ka bɔ Ala ka koo la ka n faran ka bɔ Krista la, ne balimaw kosɔn, ne ni minw ye siya kelen ye,

⁴ olu minw ye Isirayɛlidenw ye. Ala ye olu minw minɛ k'o kɛ a ka deenw ye, k'a yɛrɛ yira u la, ka bɛn n'u ye siɲɛ caaman, ka sariya sigi u ye k'a yɛrɛ batocogo yira u la, k'a daa di u ma.

⁵Ibrayima ni Isiyaka ani Yakuba le ye u faaw ye. Krista ni olu ye siya kelen ye, a wolola u ka deen dɔ fɛ. Ala be fɛɛn bɛɛ kunna, a ka tanu tuma bɛɛ! Amiina. [1]

⁶O bɛɛ la, Ala ka kuma dafara, hali ni siya min bɔra Yakuba la, o bɛɛ ma kɛ Isirayɛlidensɔbɛw ye.

⁷ Siya min bɔra Ibrayima la, olu bɛɛ ma wele ko a deenw, bari Ala tun y'a fɔ a ye ko: «Isiyaka le kɔmɔgɔw bena wele i deenw.»

⁸O kɔrɔ te ko deen minw wolola ka kɛɲɛ ni farisogo ye, olu ma kɛ Ala deenw ye dɛ. Ayi, fɔɔ deen minw sɔrɔla ka kɛɲɛ ni Ala ka dadili ye, olu le ye Ala deenw ye.

⁹ Bari Ala y'a daa di ko: «Saan wɛrɛ ne bena segi nin waati nin ɲɔgɔn na ka n'a sɔrɔ ni dencɛ be Sara bolo.»

¹⁰O dama tɛ, Erebɛka fana, ye dencɛ fila sɔrɔ an bɛma Isiyaka fɛ.

¹¹Ala tun b'a fɛ a ka koo latigɛnin ka kɛ a ka mɔgɔ wolomani koo la minkɛ, o la, o deen nunu tun ma wolo fɔlɔ, u tun ma sɔrɔ ka koɲuman, walima kojugu kɛ fɔlɔ,

¹² a y'a fɔ Erebɛka ye a deen nunu ka koo la ko: «Kɔrɔcɛma bena baara kɛ dɔgɔcɛma ye.» A y'a yira ten ko ale te mɔgɔ woloma ka kɛɲɛ n'o tigi ka kɛwali ye, fɔɔ a yɛrɛ sago.

¹³ I ko a fɔra Ala ka kuma na cogo min na ko: «Yakuba koo diyara ne ye, Ezawu koo man di ne ye.»

¹⁴An bena mun fɔ sa? O tuma na, Ala ka koo tilennin tɛ wa? Ayi dɛ!

¹⁵ Tiɲɛ na, a y'a fɔ Musa ye ko: «Ne b'a fɛ ka makari mɔgɔ min na, ne bena makari o tigi la, ne b'a fɛ ka hinɛ mɔgɔ min na, ne bena hinɛ o la.»

¹⁶A kɛra ten, o te sɔrɔ mɔgɔ sago la, walima mɔgɔ ka jijali sababu la, nga fɔɔ Ala ka makari.

¹⁷ A kɛra ten fana, Ala y'a fɔ Ezipiti masacɛ ye a ka kuma na ko: «Ne y'i sigi masaya la kuun min na, o ye janko ne ka se ka n ka sebagaya yira, ani ne tɔgɔ ka fɔ diɲɛ faan bɛɛ la.»

¹⁸O le kosɔn, ni Ala b'a fɛ ka makari mɔgɔ min na, a be makari o tigi la, n'a b'a fɛ ka mɔgɔ min dusu gwɛlɛya, a b'o tigi ta gwɛlɛya fana.

¹⁹Dɔw be se k'a fɔ ne ye ko: «Mun na Ala b'an jalaki tugu? Bari mɔgɔ te se ka ban Ala ta ma.»

²⁰ E adamaden, e ye mun ye n'i be sɔsɔli kɛ ni Ala ye? Daga be se k'a fɔ a dilanbaga ye ko: «Mun na e ye n dilan ten wa?»

²¹Bɔgɔmana te dagadilanbaga ta ye wa? A be se k'o bɔgɔ kelen nin ta ka dagaɲuman dilan n'a ye, a be se k'o bɔgɔ kelen nin ta ka daga wɛrɛ dilan n'a ye, min ma ɲi kosɔbɛ.

²²Ala tun b'a fɛ k'a ka sebagaya n'a ka dimi yira, nga a muɲuna o daga nunu kɔrɔ, minw ka kan ka cɛn.

²³A y'o kɛ janko k'a ka ɲumanya dafanin yira dagaw la, a makarila minw na. A tun kɔnna ka olu minw labɛn boɲa kama.

²⁴O kɔrɔ ko a ye an minw wele, a ma weleli kɛ ka bɔ zuwifuw dama cɛma, nga a ye dɔw fana wele ka bɔ siya wɛrɛw cɛma.

²⁵ I ko a fɔra cogo min na Oze ka kitabu kɔnɔ ko: «Mɔgɔ minw tun te ne Ala ka mɔgɔw ye, ne bena olu kɛ n ka mɔgɔw ye, ani minw koo tun man di ne ye, ne bena olu koo diya n yɛrɛ ye.

²⁶ Yɔrɔ min na a tun fɔra u ye ko: ‹Aw te ne ka mɔgɔw ye›, o yɔrɔ kelen na, u bena wele ko Nitigi Ala deenw.»

²⁷Kira Ezayi fana y'a fɔ Isirayɛlidenw ka koo la ko: «Hali ni Isirayɛlidenw cayara i ko kɔgɔjida la cɛncɛn, u tɔɔ dama le bena kisi.

²⁸ Bari Matigi ye kuma min fɔ, a bena o bɛɛ kɛ ka dafa teliya la dugukolo kan.»

²⁹ I n'a fɔ Ezayi tun kɔnna k'a fɔ cogo min na ko: «Ni Matigi, Setigi tun ma dɔɔni to o ka kɛ an sii ye, an tun bena halaki i ko Sodɔmu, an tun bena halaki i ko Gɔmɔri.»

³⁰An bena mun le fɔ? Siya wɛrɛ minw tun ma tilenninya ɲini, olu y'a sɔrɔ, jigi min be la Ala kan, o tilenninya be sɔrɔ o barika la.

³¹Isirayɛlidenw, tun be cogo ɲinina waasa Ala k'u jati mɔgɔtilenninw ye sariya barika la, nga u ma o sɔrɔ.

³²Mun le y'o kɛ? Bari yanni olu ka tilenninya nin ɲini n'u jigi lanin be Ala kan, u y'a ɲini ni kɛwali ye. O la, u talonna kabakuru la.

³³ A fɔra Ala ka kuma na ko: «Ne be talonkabakuru bila *Siyɔn, kabakuru min be mɔgɔ ben, ne y'o bila yen. Ni min lar'a la, o tigi tena maloya.»