Read dyu Korɛntikaw fɔlɔ 1 Bible Online

Korɛntikaw fɔlɔ 1 - dyu bible

Korɛntikaw fɔlɔ 1

¹Ne Pɔli min welela ka kɛ Yezu Krista ka ciden ye Ala sago la, ani an balimacɛ Sɔsitɛni,

² be bataki nin ci Korɛntikaw ma minw lara Ala la, Yezu Krista ye minw wele k'u saniya k'u kɛ Ala ta ye. A cira mɔgɔ bɛɛ ma fana, minw be yɔrɔ bɛɛ la n'u be an Matigi Yezu Krista bato. Olu ka Matigi lo, ani an fana ta lo.

³An Faa Ala n'an Matigi Yezu Krista ka nɛɛma ni hɛrɛ kɛ aw ye.

⁴Ne be barika la Ala ye tuma bɛɛ aw kosɔn, bari a ye nɛɛma kɛ aw ye Yezu Krista barika la.

⁵Ale barika la, aw kɛra fɛɛn bɛɛ tigiw ye, aw be kuma lɔn kosɔbɛ, lɔnniya fana b'aw fɛ.

⁶Bari Krista koo min fɔra aw ye, o ye sigiyɔrɔ sɔrɔ aw kɔnɔ.

⁷K'aw to an Matigi Yezu Krista nalon makɔnɔni na, Ala be seko minw di, aw ma dɛsɛ o si la.

⁸Ala kelen le be barika don aw la fɔɔ ka taga se an Matigi Yezu Krista nalon ma, jalakiyɔrɔ kana sɔrɔ aw la o loon na.

⁹Ala ye kantigi ye. A y'aw wele ka kɛ a Dencɛ an Matigi Yezu Krista jɛnɲɔgɔnw ye.

¹⁰Ne b'aw daali n balimaw, an Matigi Yezu Krista tɔgɔ kosɔn ko aw k'aw daa kɛ kelen ye, farali kana sɔrɔ aw cɛma. Aw ka miiri ka kɛ kelen ye aw ka kolatigɛnin bɛɛ la.

¹¹Bari n balimaw, ne y'a mɛn Kulowe ka somɔgɔw fɛ, ko bɛnbaliya be aw ni ɲɔgɔn cɛ.

¹² O kɔrɔ ko aw dɔw b'a fɔ k'olu ye Pɔli ka kalandenw ye, dɔ wɛrɛw k'olu ye Apolɔsi taw ye, dɔw fana k'olu ye Piyɛri [1] taw ye, dɔ wɛrɛw fana k'olu ye Krista taw ye.

¹³A kɛra ten, Krista tilannin lo wa? Yala Pɔli lo gwengwenna lɔgɔ kan aw kosɔn wa? Aw batizera Pɔli lo tɔgɔ la wa?

¹⁴ Ne be Ala tanu bari ne ma mɔgɔ si batize aw cɛma, fɔɔ Kirisipusi ani Gayusi.

¹⁵O cogo la, mɔgɔ si te se k'a fɔ ko aw batizera ne tɔgɔ la.

¹⁶ Aa! Ne ye Sitefana ka somɔgɔw batize fana, o kɔfɛ sa, ne hakili t'a la ni ne ye mɔgɔ wɛrɛ batize tugu.

¹⁷Bari Krista ma ne ci ka mɔgɔ batize, a ye ne ci ka kibaru diman le fɔ, ne kana o kɛ ni ne yɛrɛ ka hakilitigiyakuma ye, janko Krista ka saya gwengwenlɔgɔ kan kana kɛ gwansan ye.

¹⁸N'u be Krista ka saya koo fɔ gwengwenlɔgɔ kan, o ye fatɔyakuma ye mɔgɔ dɔw fɛ minw be halaki sira kan. An minw be kisili sira kan, an fɛ kɔni, Ala ka sebagayako lo.

¹⁹ Bari a fɔra Ala ka kuma na ko: «Ne bena lɔnnikɛlaw ka lɔnniya cɛn, ka hakilitigiw ka hakilitigiya ban.»

²⁰ Lɔnnikɛla be min? Kalanfa be min? Bii diɲɛ nin lɔnniya ɲinibagaw be min? Ala ma diɲɛ nin ka lɔnniya yɛlɛma k'o kɛ nalomanya ye wa?

²¹Tiɲɛ lo, diɲɛ n'a ka lɔnniya bɛɛ, a ma se ka Ala lɔn a ka lɔnniya barika la. O la, minw lara Ala la, a diyara a ye ka olu kisi, waajuli barika la, o min kɛra nalomanyako ye diɲɛ mɔgɔw fɛ.

²²Zuwifuw, olu mako be kabako kɛli la, girɛkiw, olu be lɔnniya le ɲinina.

²³An be Krista gwengwenko fɔra. O kɛra kunnacɛnko ye zuwifuw fɛ, ka kɛ nalomanyako ye siya wɛrɛw fɛ.

²⁴Nga Ala ye mɔgɔ minw wele, a kɛra zuwifu, wala girɛki ye wo, olu fɛ kɔni, Krista ye Ala ka sebagaya n'a ka lɔnniya le ye.

²⁵Bari Ala ka nalomanya ka fisa ni mɔgɔ ka hakilitigiya ye, Ala ka barikatanya fanga ka bon ni adamaden ka barikatigiya ye.

²⁶Aw k'aw yɛrɛ filɛ n balimaw, aw minw ye Ala ka weleli mɛn ka sɔn a ma, adamaden ka miiriya la, lɔnnikɛla caaman te aw cɛma, ni fangatigiw, ani mɔgɔbabaw.

²⁷Nga koo min kɛra nalomanyako ye diɲɛ mɔgɔw fɛ, Ala y'o le ta ka hakilitigiw malo n'a ye. Barika te fɛɛn minw na diɲɛ na, Ala ye olu le woloma ka fangatigi dabari ban n'o ye.

²⁸Adamadenw te fɛɛn minw jati, ani u be minw dɔgɔya, o minw te foyi ye u ɲana, Ala ye olu le woloma ka fɛɛn jatitaw kɛ fɛɛn gwansan ye,

²⁹waasa adamaden si kana se k'a yɛrɛ boɲa Ala ɲakɔrɔ.

³⁰Nga ale lo barika la aw kɛra Yezu Krista jɛnɲɔgɔnw ye, an ye lɔnniya sɔrɔ ale barika la ka bɔ Ala fɛ, ale fana sababu la, an kɛra mɔgɔtilenninw ye Ala ɲakɔrɔ ka kɛ a ta ye, ani mɔgɔhɔrɔnyaninw.

³¹ A kɛra ten, «ni min be wanso, o ka wanso Matigi barika la,» i ko a fɔra Ala ka kuma na cogo min na.