Read dyu Korɛntikaw fɔlɔ 12 Bible Online

Korɛntikaw fɔlɔ 12 - dyu bible

Korɛntikaw fɔlɔ 12

¹N balimaw, Nii Senuman ye see minw di mɔgɔw ma, ne t'a fɛ aw ka kɛ kolɔnbaliw ye olu faan fɛ.

²Aw y'a lɔn ko aw tun te Ala lɔn tuma min na, aw tun be tugura joow kɔ dɔrɔn minw te se ka kuma yɛrɛ.

³O le y'a to ne b'a fɔ aw ye ko mɔgɔ si te se k'a fɔ Ala ka Nii barika la ko: «Yezu danganin lo,» ani mɔgɔ si te se k'a fɔ fana ko: «Yezu ye Matigi ye» n'o ma kɛ Nii Senuman barika la.

⁴See sifa caaman be yen, nga Nii Senuman kelen le b'o di.

⁵Baara sifa caaman fana be yen, nga Kuntigi kelen le b'o la.

⁶Koo kɛcogo caaman be yen, nga ale Ala kelen lo b'o bɛɛ kɛcogo di bɛɛ ma.

⁷Nii Senuman be seko di mɔgɔ kelen kelen bɛɛ ma, mɔgɔ bɛɛ ka makoɲa kama.

⁸Nii Senuman ye see di dɔ ma ka kuma ni hakilitigiya ye, ka see di dɔ wɛrɛ ma ka koo fɔ ni lɔnniya ye.

⁹O Nii Senuman nin ye jigi di dɔ ma, ka banabagatɔw kɛnɛyali see di dɔ wɛrɛ ma.

¹⁰A ye kabako kɛ see di dɔ ma, ka dɔ wɛrɛ kɛ kira ye, ani ka see di dɔ ma a ka se ka Nii Senuman ka kɛwali faranfasi ka bɔ jinaw ta la. A ye see di dɔ ma ka kaan wɛrɛw fɔ, ka see di dɔ wɛrɛ ma k'o kɔrɔ fɔ.

¹¹ Nga Nii Senuman kelen le b'o koo bɛɛ kɛ see di mɔgɔ kelen kelen bɛɛ ma ka kɛɲɛ n'a yɛrɛ sago ye.

¹² Yɔrɔ caaman be mɔgɔ farikolo la, o bɛɛ n'a ta, u bɛɛ lajɛnnin le ye farikolo kelen ye, hali u n'u caya bɛɛ. Krista be o cogo la fana,

¹³bari an bɛɛ batizera Nii Senuman kelen le barika la, an ka se ka kɛ farikolo kelen ye, k'a ta zuwifu ma wo, walima siya wɛrɛ, jɔɔn, walima hɔrɔn, o Nii Senuman kelen lo be an bɛɛ la.

¹⁴Farikolo yɔrɔw ka ca, yɔrɔ kelen dama tɛ.

¹⁵Ni seen tun y'a fɔ ko ale te bolo ye, o la, ko ale te farikolo yɔrɔ dɔ ye, o be se k'a niin bɔ farikoloya la wa?

¹⁶Ni tulo tun y'a fɔ ko ale tɛ ɲaa ye, o la, k'ale te farikolo yɔrɔ dɔ ye, o be se k'a niin bɔ farikoloya la wa?

¹⁷Ni farikolo bɛɛ tun ye ɲaa ye, a tun bena to ka mɛnni kɛ cogo di? Walima n'a bɛɛ tun ye tulo ye, a tun bena kasa mɛn cogo di?

¹⁸Nga Ala ye farikolo yɔrɔ kelen kelen bɛɛ sigi a la, ka kɛɲɛ n'a yɛrɛ sago ye.

¹⁹Ni mɔgɔ farikolo tun kɛra yɔrɔ kelen ye, a tun te na kɛ fɛɛn dafanin ye.

²⁰Yɔrɔ caaman be farikolo la, nga farikolo kelen lo.

²¹Ɲaa te se k'a fɔ bolo ye k'ale mako te bolo la, ani kungolo fana te se k'a fɔ seenw ye k'ale mako te olu la.

²²Nga farikolo yɔrɔ minw be jati k'u ka dɔgɔ, olu le koo ka gwɛlɛ fana.

²³Farikolo yɔrɔ minw te foyi ye, an be olu le jati kosɔbɛ. Minw koo yɛrɛ te se ka fɔ, an be olu minɛ ni cogoɲuman ye kosɔbɛ,

²⁴k'a sɔrɔ boɲa ka kan ka la minw kan, olu t'a sɔrɔ. Ala ye farikolo dilan ka boɲa di a yɔrɔw ma minw man kan n'a ye,

²⁵waasa farali kana sɔrɔ farikolo la, nga farikolo yɔrɔ kelen kelen bɛɛ ka janto ɲɔgɔn na.

²⁶Ni farikolo yɔrɔ dɔ be tɔɔrɔla, tɔɔ nunu fana be tɔɔrɔ n'a ye. Ni kelen ye boɲa sɔrɔ, tɔw fana be jɛn n'a ye ka nisɔndiya.

²⁷Aw kɛra Krista farikolo ye, aw y'a farikolo yɔrɔw ye, kelen kelen bɛɛ n'a ta.

²⁸ Ala ye mɔgɔ minw sigi a ka jama cɛma, o ye nunu ye: a fɔlɔ, cidenw, a filanan, kiraw, a sabanan, karamɔgɔw, o kɔ, kabako kɛli see dira minw ma, ani banabagatɔw kɛnɛyali, ni mɔgɔ dɛmɛli, ni ɲamɔgɔya, ani see dira minw ma ka kaan wɛrɛw fɔ.

²⁹Mɔgɔ bɛɛ le ye cidenw ye wa? U bɛɛ le ye kiraw ye wa? U bɛɛ le ye karamɔgɔw ye wa? Walima u bɛɛ le be se ka kabakow kɛ wa?

³⁰U bɛɛ le be se ka banabagatɔw kɛnɛya wa? U bɛɛ le be se ka kuma kaan wɛrɛw la wa? Walima u bɛɛ le be se k'o kaan wɛrɛw kɔrɔ fɔ wa?

³¹Ala ka seko minw ka fisa, aw k'o ɲini. Sisan, ne bena sira dɔ yira aw la min ka fisa.