Read dyu Korɛntikaw fɔlɔ 15 Bible Online

Korɛntikaw fɔlɔ 15 - dyu bible

Korɛntikaw fɔlɔ 15

¹N balimaw, sisan ne b'a fɛ k'aw hakili jigi kibaru diman la, ne ye min fɔ aw ye, aw sɔnna min ma k'aw jigi bɛɛ la a kan.

²Aw bena kisi ale barika la, n'aw y'a minɛ i ko ne y'a fɔ aw ye cogo min na. N'o tɛ, aw y'aw jigi la a kan fu.

³ Ne kɔnna k'a fɔ aw ye i n'a fɔ ne fana tun y'a sɔrɔ cogo min na, ko Krista sara an ka hakɛw kosɔn, ka kɛɲɛ ni Ala ka kuma ye.

⁴ U y'a suu don, a tile sabanan loon, a kununna, ka kɛɲɛ ni Ala ka kuma ye.

⁵ A y'a yɛrɛ yira Piyɛri la, o kɔ, a y'a yɛrɛ yira a ka ciden tan ni fila la fana.

⁶O kɔ, yɔrɔnin kelen a y'a yɛrɛ yira an balimaw na minw tun be tɛmɛ mɔgɔ kɛmɛ duuru kan. Olu dɔw sara, nga u caaman be nii na halibi.

⁷O kɔ fana, a y'a yɛrɛ yira Zaki la, ani cidenw bɛɛ la.

⁸ O bɛɛ kɔfɛ, a y'a yɛrɛ yira ne la, ne min kɛra u bɛɛ kɔmɔgɔ ye, i n'a fɔ deen min wolo waati ma se, a wolo la.

⁹ Bari ne ye cidenw bɛɛ la fitini ye, ne man kan ka wele ko ciden yɛrɛ, bari minw lara Ala la ne ye olu tɔɔrɔ.

¹⁰Nga ne be yɔrɔ min na sisan, o ye Ala ka nɛɛma nɔɔ ye. O nɛɛma nin te gwansan ye ne faan fɛ. Ne ye baara kɛ ka tɛmɛ olu bɛɛ kan. O te ne yɛrɛ seko ye, o ye Ala ka nɛɛma nɔɔ ye.

¹¹A kɛra ne ye wo, walima olu wo, an be min fɔra, o lo, ani aw sɔnna o le ma fana.

¹²Ni Krista ka kununko waajuli be kɛ, mun na mɔgɔ dɔw b'a fɔ aw cɛma ko suu tena kunun?

¹³Ni suuw tena kunun, o kɔrɔ ko Krista fana ma kunun.

¹⁴Ni Krista do ma kunun, an ka waajuli ye fu ye ani aw jigi be min kan, o be kɛ fu ye fana.

¹⁵Ka fara o kan, ni suuw ka kununbaliya ye tiɲɛ ye, o kɔrɔ ko an be galon tigɛra k'a la Ala kan, bari an b'a fɔra ko Ala ye Krista kunun a sanin kɔ k'a sɔrɔ o ma kɛ.

¹⁶Ni suuw tena kunun, Krista fana ma kunun.

¹⁷Ni Krista do ma kunun, aw jigi lanin be min kan, o ye fu ye, aw ka hakɛw ma yafa.

¹⁸O la, mɔgɔ minw sara k'u jigi lanin to Krista kan, olu ta cɛnna.

¹⁹N'a kɛra ko an jigi be Krista kan an ka diɲɛlatigɛ dama kosɔn, an kɛra makaritɔw ye ka tɛmɛ mɔgɔ tɔw kan.

²⁰Nga tiɲɛ na, Krista kununna. K'a yira k'a gwɛya ko mɔgɔ minw sara, olu bena kunun.

²¹Saya sera an ma mɔgɔ kelen barika la minkɛ, o cogo la fana, mɔgɔ kelen barika la, suuw bena kunun.

²²Mɔgɔ bɛɛ be sa Adama barika la cogo min na, o cogo kelen na, mɔgɔ bɛɛ fana bena kunun Krista barika la.

²³Nga o bena kɛ bɛɛ n'a lɔyɔrɔ: Krista le kɛra fɔlɔ ye, o kɔ, mɔgɔ minw kɛra a ta ye. A be kɛ ten a natuma na.

²⁴O kɔ, koo bɛɛ laban bena se. Krista bena kuntigi yebaliw bɛɛ ka kuntigiya cɛn, ni fangatigiw ta, ani setigiw ta, ka sɔrɔ ka masaya di Faa Ala ma.

²⁵ Bari a ka kan ka kuntigiya kɛ fɔɔ k'a juguw bɛɛ ben ka bɔ a ɲa fɛ.

²⁶A jugu laban min bena cɛn, o ye saya ye.

²⁷ Bari «Ala ye fɛɛn bɛɛ majigi a ye.» N'a fɔra ko fɛɛn bɛɛ majigir'a ye, Ala min ye fɛɛn bɛɛ majigi a ye, ale niin t'o fɛɛn nunu la dɛ.

²⁸Ni fɛɛn bɛɛ majigira Krista ye ka ban, o tuma na ale min ye Dencɛ ye, a ben'a yɛrɛ majigi Ala ye ale min ye fɛɛn bɛɛ majigi a ye. O la, Ala bena kuntigiya kɛ fɛɛn bɛɛ kunna.

²⁹N'a tun te ten, mɔgɔ minw b'u yɛrɛ di n'u b'o batize suuw tɔgɔ la, olu be mun le ɲinina? Ni suuw tena kunun fewu, mun na olu b'u yɛrɛ di u k'u batize suuw tɔgɔ la?

³⁰Mun na anw be kojugu ɲakɔrɔ tuma bɛɛ la?

³¹Loon bɛɛ ne be saya sira kan, o ye tiɲɛ ye n balimaw, aw kɛra ne ka yɛrɛboɲa sababu ye an Matigi Yezu Krista barika la.

³² Ne ye tɔɔrɔ min sɔrɔ mɔgɔjuguw bolo Efɛzi dugu kɔnɔ, n'o tun kɛra adamaden sago ye, o bena mun ɲa ne ye sa? Ni suuw tena kunun, o tuma na: «An ka dumuni kɛ ka minni kɛ, bari sini an bena sa,» i ko u b'a fɔ cogo min na.

³³Aw kana aw yɛrɛ nigɛ. Tagamaɲɔgɔnjugu b'a taamaɲɔgɔnɲuman cogo cɛn.

³⁴Aw k'aw ɲaa yɛlɛ ka taama tilenninya la. Aw kana to ka hakɛ kɛ tugu. Aw dɔw te Ala lɔn tiɲɛ na, ne y'o fɔ waasa aw ka maloya.

³⁵Mɔgɔ dɔ bena ɲiningali kɛ ko suuw bena kɛ cogo di ka kunun? U bena kunun ni farisogo sifa jumɛn ye?

³⁶Naloman, e be sumansi min dan, n'a ma don dugukolo kɔrɔ ka ɲigi, a be falen wa?

³⁷I te kala dan, nga kisɛ lo, ɲɔkisɛ, walima kisɛ dɔ wɛrɛ.

³⁸Ala le b'a kɛ kisɛ be falen ka kala sɔrɔ ka kɛɲɛ n'a yɛrɛ sago ye, ale lo be kɛ suman sifa bɛɛ be falen ka kala sɔrɔ ka kɛɲɛ n'u cogo ye.

³⁹Fɛɛn ɲanaman bɛɛ cogo te kelen ye. Adamaden farisogo be yen, sennaanifɛnw ta fana be yen, ni kɔnɔw ta fana, ani jigɛw ta.

⁴⁰Sankololafɛnw be yen, dugukolo kan fɛɛnw fana be yen. Sankololafɛnw nɔɔrɔ be danna ni dugukolo kan ta ye.

⁴¹Tile yeelen be danna ni kalo ta ye. Lolo ta fana be danna. Lolo dɔ yeelen be tɛmɛ dɔ ta kan.

⁴²O cogo kelen na fana, suuw kununko bena kɛ ten. Farisogo tolita be don, a ɲanaman be kunun.

⁴³A cɛjuguman be sutara, a ɲumaman be kunun. A be sutara barikatanya la, ka kunun ni fangaba ye.

⁴⁴A be sutara ni farisogo gwansan ye ka kunun ni nii ka farisogo ye. Ni farisogo gwansan be yen kɔni, nii ka farisogo fana be yen.

⁴⁵ A fɔra Ala ka kuma na ko Adama min kɛra mɔgɔ fɔlɔ ye, ale kɛra nimanfɛn ye, Adama laban fani be Nii Senuman na min be nii di.

⁴⁶Min kɛra fɔlɔ ye, o ye farisogo ye, o kɔ, nii ka sɔrɔ ka tugu.

⁴⁷Mɔgɔ min kɔnna ka dan, ale bɔra dugukolo la. Mɔgɔ filanan, ale bɔra sankolo la.

⁴⁸Mɔgɔ min bɔra dugukolo la, a kɔmɔgɔw kɛra i n'a fɔ ale, mɔgɔ min bɔra sankolo la, ale fana kɔmɔgɔw bena kɛ i n'a fɔ ale.

⁴⁹Mɔgɔ min bɔra dugukolo la, an ye ale cogo ta cogo min na, o cogo kelen na fana, mɔgɔ min bɔra sankolo la, an bena ale fana cogo ta.

⁵⁰Ne be min fɔ n balimaw, o ye nin ye, ko adamaden gwansan te se ka Ala ka masaya sɔrɔ, fɛɛn min ye tolita ye, o fana te se ka tolibaliya sɔrɔ fewu.

⁵¹Ne be kodogonin dɔ fɔ aw ye ko an bɛɛ tena sa, nga an bɛɛ cogo bena yɛlɛma le,

⁵² yɔrɔnin kelen dɔrɔn, ɲaa tugu n'a yɛlɛ cɛ, buru laban fiyɛtuma. Ni buru fiyɛra, suuw bena kunun ni farisogoɲuman ye, an bɛɛ cogo bena yɛlɛma.

⁵³Bari farisogo min be toli, ale ka kan ka kɛ fɛɛn tolibali ye, min be sa ale ka to sabaliya la.

⁵⁴ Farisogo min be toli, n'o sera ka kɛ fɛɛn tolibali ye tuma min na, min be sa, n'o sera ka sabaliya sɔrɔ, o waati la, min fɔra Ala ka kuma na, o bena kɛ. A ko: «See sɔrɔla saya kan.

⁵⁵ Saya, e ka see be min? Saya, e ka fariyayɔrɔ be min?»

⁵⁶Saya ka fariyayɔrɔ ye hakɛ ye, hakɛ ka fanga sɔrɔyɔrɔ ye sariya ye fana.

⁵⁷An ka barika la Ala ye, ale min be kɛ an be see sɔrɔ an Matigi Yezu Krista barika la.

⁵⁸O kosɔn, ne balima kanunlenw, aw ye jija kosɔbɛ, aw kana siran, aw ye taga ɲa Matigi ka baara la tuma bɛɛ, ka l'a la ko aw be baara min kɛra Matigi ye, k'o tena kɛ gwansan ye.