Read dyu Korɛntikaw fɔlɔ 16 Bible Online

Korɛntikaw fɔlɔ 16 - dyu bible

Korɛntikaw fɔlɔ 16

¹ Min kɛra bolomafara koo ye, min be kɛ ka ci Ala ka jama ma min be Zeruzalɛmu, ne ye min fɔ Krista ka jamakuluw ye Galati mara la, aw k'o kɛ fana.

²Lɔgɔkun loon fɔlɔ bɛɛ, mɔgɔ kelen kelen bɛɛ ka fɛɛn dɔ bɔ a ka sɔrɔta la k'o mara gɛrɛfɛ. Aw kana ne kɔnɔ, ni ne nana tuma min na, an ka sɔrɔ k'o bolomafara minɛ.

³Ni ne sera aw fɛ yen, n bena bataki sɛbɛn k'o di aw ka jigilamɔgɔw ma aw ye minw woloma, k'u ci ka taga ni bolomafara nin ye Zeruzalɛmu.

⁴N'a kɛra fɛɛn ye min be ne taakun bɔ fana, ne bena taga n'u ye.

⁵ Ne bena tɛmɛ Maseduwani mara la ka sɔrɔ ka na aw fɛ yen. Bari ne ka kan ka tɛmɛ o yɔrɔ la.

⁶N'a sɔrɔ n bena waati dɔɔni kɛ aw fɛ, walima n bena samiɲa bɛɛ kɛ n'aw ye, janko aw ka se ka ne dɛmɛ, ne ka se ka n ka taama bɛɛ kɛ.

⁷Ne t'a fɛ ka kɛ tɛmɛbaga dama ye aw fɛ sisan. Ne jigi b'a kan ka to aw fɛ waati dɔɔni, ni Matigi sɔnna.

⁸ Nga n bena to Efɛzi fɔɔ *Pantekɔti ka se,

⁹ bari n y'a ye ko n be se ka baara caaman kɛ, n juguw fana ka ca.

¹⁰ Ni Timote nana se aw fɛ tuma min na, aw ka koo bɛɛ kɛ k'a jaa gwɛlɛya aw cɛma, bari ale fana ye Matigi ka baarakɛla dɔ ye i n'a fɔ ne.

¹¹Mɔgɔ si kan'a dɔgɔya. Aw k'a dɛmɛ a ka se ka segi ka na ne fɛ yan hɛrɛ la. Ne n'an balima tɔw b'a kɔnɔna.

¹²Min ye an balima Apolɔsi ciko ye, ne y'a ɲini a fɛ kosɔbɛ ko a ka taga aw fɛ n'an balimaw ye. A ma sɔn taali ma sisan fewu, nga n'a nana waati sɔrɔ tuma min na, a bena taga aw fɛ.

¹³Aw labɛnnin ka to, aw ye jija aw jigi ka to Ala kan kosɔbɛ, aw ka kɛ mɔgɔ jagwɛlɛnw ye, ani ka barika don aw yɛrɛ la.

¹⁴N'aw be fɛɛn o fɛɛn kɛ, aw k'o kɛ ni kanuya ye.

¹⁵ Aw b'a lɔn ko Sitefana n'a ka somɔgɔw le kɔnna ka sɔn Krista ma Akayi mara la, ko u y'u yɛrɛ di ka Ala ka mɔgɔw dɛmɛ.

¹⁶Ne b'a ɲini aw fɛ ko aw ka mɛnni kɛ o mɔgɔ suguw fɛ, ani mɔgɔ minw bɛɛ be baara kɛ ka sigɛn n'u ye.

¹⁷Ne nisɔn diyanin be Sitefana ni Fɔritunatusi ani Akayikusi nunu ka nako la ne fɛ, olu ye ne dɛmɛ aw nɔɔ na.

¹⁸Bari u ye ne jigi tugu k'aw fana jigi tugu. O la, aw k'o mɔgɔ sifa nunu tɔgɔɲuman fɔcogo lɔn.

¹⁹ Krista ka jamakulu minw be Azi mara la, olu b'aw fo. Akilasi ni Pirisili ani Krista ka jama min be ɲɔgɔn lajɛn u fɛ, u bɛɛ b'aw fo kosɔbɛ Matigi tɔgɔ kosɔn.

²⁰N balimaw bɛɛ b'aw fo, aw ka ɲɔgɔn fo kosɔbɛ ni kɔnɔgwɛ ye.

²¹Ne Pɔli yɛrɛ le be foli kuma nin sɛbɛnna aw ye.

²²Ni Matigi ka koo man di mɔgɔ dɔ ye, o tigi danganin lo. Maranata. An Matigi be na.

²³An Matigi Yezu ka nɛɛma ka kɛ n'aw ye.

²⁴Yezu Krista barika la, aw bɛɛ koo ka di ne ye.