Read dyu Korɛntikaw fɔlɔ 4 Bible Online

Korɛntikaw fɔlɔ 4 - dyu bible

Korɛntikaw fɔlɔ 4

¹O la, mɔgɔw ka kan k'anw jati Krista ka baaradenw ye, ani mɔgɔ minw be Ala ka koo dogoninw ɲa yira.

²N'u ye baara dɔ kalifa mɔgɔ ma, u be min ɲini a fɛ, o ye tilenninya ye.

³Ne kɔni fɛ, hali n'aw lo, walima kititigɛla dɔw, ye ne jalaki, o te foyi ye ne ɲana. Ne te n yɛrɛ jalaki fana.

⁴Hali ni ne dusu te ne jalaki, a ma kɛ k'o le kosɔn ne ye jalakibali ye, nga ne jalakibaga ye Matigi ye.

⁵O le kosɔn aw kana kɔn ka mɔgɔ jalaki waati latigɛnin ɲa, aw k'a to, Matigi ben'a ka koo dogonin bɛɛ bɔ kɛnɛma, ani ka mɔgɔw bɛɛ kɔnɔnakow yira. O waati la, mɔgɔ kelen kelen bɛɛ ka kan ni boɲa min ye, a bena o sɔrɔ Ala fɛ.

⁶Ne balimaw, aw le kosɔn, ne ye kuma nin yɛlɛma k'a fɔ aw ye cogo wɛrɛ la, k'o kɛɲɛ ne ni Apolɔsi taamacogo ye, waasa n'aw ye anw cogo filɛ, aw kana se k'aw yɛrɛ boɲa, ka nɔrɔ mɔgɔ kelen na ka tɔɔ kelen kɔniya.

⁷Jɔn le y'a kɛ i fisayara ni tɔw ye? Mun le b'i fɛ ni Ala m'o d'i ma? N'i do y'o sɔrɔ Ala fɛ, mun na e b'i yɛrɛ boɲa i n'a fɔ i yɛrɛ seko lo?

⁸Aw wasara ka ban, aw kɛra fɛntigiw ye, aw ye faamaw ye k'a sɔrɔ anw te o ye! Ne b'a fɛ aw ka banba ka kɛ faamaw ye janko anw fana ka kɛ faamaw ye n'aw ye.

⁹Bari ne be miiri ko Ala y'an cidenw kɔni bila mɔgɔ bɛɛ kɔfɛ, i n'a fɔ mɔgɔ minw ka kan ka faga. O la, an kɛra diɲɛ bɛɛ ka tolonkɛfɛn ye, k'a ta mɛlɛkɛw ma fɔɔ ka taga bila adamadenw ma.

¹⁰An kɛra fatɔw ye Krista kosɔn, nga aw kɛra hakilitigiw ye Krista barika la! An kɛra barikatanw ye, aw kɛra fangatigiw ye! Aw be boɲa sɔrɔ, an ta ye dɔgɔya ye!

¹¹Waati nin yɛrɛ la halibi, kɔngɔ b'an na, minnɔgɔ b'an na, fani yɛrɛ t'an fɛ, u b'an tɔɔrɔla, an be taamatagamana yɔrɔ bɛɛ la.

¹² An yɛrɛ le be baara kɛ ka sɛgɛn ka sɔrɔ k'an ka balo sɔrɔ. U b'an nɛni, an be duba kɛ an nɛnibagaw ye, u b'an tɔɔrɔ, an b'o muɲu.

¹³N'u b'an tɔgɔ cɛn, an b'u ladi ni kumaɲuman ye. Halibi u b'an jati ɲamaɲama ye diɲɛ na, ani fɛɛn kasagoman.

¹⁴Ne ma nin fɔ aw ye waasa k'aw maloya, nga ne b'a fɛ k'aw lasɔmi i n'a fɔ n ka deenw.

¹⁵Hali ni kalanfa waa tan le be aw fɛ, k'aw to Krista ka sira la, aw faa te mɔgɔ caaman ye. Ne lo ye kibaru diman fɔ aw ye, aw ka sɔrɔ ka la Yezu Krista la.

¹⁶ Ne b'aw daali ko aw ka kɛ ne ladegebagaw ye.

¹⁷O le kosɔn, n deen min koo ka di n ye n'o ye Timote ye, n y'o ci aw fɛ. Mɔgɔsɔbɛ lo Matigi ka sira la. Ale bena aw hakili jigi ne ka taamacogo la Krista ka sira la, i n'a fɔ ne be Krista ka jamakuluw kalan yɔrɔ bɛɛ cogo min na.

¹⁸Mɔgɔ dɔw b'aw cɛma minw b'a miiri ko ne tena na aw fɛ tugu, o le y'a to u b'u yɛrɛ boɲa.

¹⁹Nga ne bena na aw fɛ yanni dɔɔni, ni Matigi sɔnna. O la, ne bena se ka yɛrɛboɲala nunu ka kɛwali yɛrɛ ye, a kana dan u ka kuma ma,

²⁰bari Ala ka masaya te kuma dama ye, nga a b'a yira kɛwali la fana.

²¹Mun le ka di aw ye? Ne ka taga aw fɛ ni bere ye wa, walima ni kanuya, ni dususuma ye?