Read dyu Korɛntikaw fɔlɔ 9 Bible Online

Korɛntikaw fɔlɔ 9 - dyu bible

Korɛntikaw fɔlɔ 9

¹Ne te n yɛrɛ ta ye wa? Ne te ciden ye wa? Ne ma an Matigi Yezu ye wa? Aw te ne ka baara nɔɔ ye Matigi Yezu barika la wa?

²Hali ni mɔgɔ dɔw te ne lɔn ko n ye ciden ye, aw ka kan ka ne lɔn bari aw kɛra ne ka cidenya baara nɔɔ ye Matigi barika la.

³O le ye ne ka kuma ye k'o fɔ n jalakibagaw ye.

⁴An man kan ka dumuni kɛ ani ka minni kɛ fana wa?

⁵An man kan ka balimamuso dɔ ta a k'an bila sira an ka taamaw na wa, i n'a fɔ Matigi dɔgɔcɛw ni Piyɛri ani ciden tɔw?

⁶Walima ne ni Barinabasi dama ka kan ka baara kɛ janko k'an daladumuni sɔrɔ wa?

⁷Mɔgɔ jumɛn le be yen n'a be sɔlidasiya kɛ n'a te sara sɔrɔ? Mɔgɔ jumɛn be yiriforo bɔ n'o tigi t'a deenw nɛnɛ? Walima mɔgɔ jumɛn be begɛnw mara n'o tigi t'o nɔnɔ sɔrɔ ka min?

⁸Aw kan'a miiri k'o ye adamaden miiriya dama ye, Ala ka sariya t'o koo kelen fɔ fana wa?

⁹ Bari a fɔra Musa ka sariyasɛbɛ la ko: «Ni misi be suman gosira, kan'a daa siri.» [1] Ala be hami misi koo la fana wa?

¹⁰Kuma min fɔra, o ma fɔ anw le kosɔn wa? Ɔnhɔn, o koow sɛbɛnna an le kosɔn, bari sɛnɛkɛla ka kan ka l'a la ko a ben'a niyɔrɔ sɔrɔ, ani sumangosibaga fana be l'a la ko a ben'a niyɔrɔ sɔrɔ.

¹¹ N'an ye Ala ka baara kɛ aw cɛma, n'anw b'o baara nin tɔnɔ sɔrɔla aw fɛ tuma min na, o ye kojugu ye wa?

¹²Ni mɔgɔ dɔw b'o tɔnɔ minɛna aw fɛ, anw do? Anw ka kan n'o ye ka tɛmɛ olu kan, nga anw m'o jati. Anw be koo bɛɛ muɲu, waasa sababu dɔ kana Krista ka kibaru diman ɲataga bali.

¹³ Aw b'a lɔn ko mɔgɔ minw be baara kɛ Alabatosoba kɔnɔ, olu ka dumuni be bɔ o yɔrɔ la le, ani minw ye sarakalasebagaw ye, olu niyɔrɔ be bɔ sarakaw la.

¹⁴ O cogo la fana, Matigi y'a fɔ ko mɔgɔ minw be kibaru diman fɔ, olu ka balo kibaru diman barika la.

¹⁵Nga ne kɔni m'o tɔnɔ nin si sɔrɔ. A fana ma kɛ ko ne b'a fɛ k'o sɔrɔ aw fɛ, k'o le y'a to ne be nin koo sɛbɛn aw ye dɛ. Yanni ne b'o koo ɲini, ne ka sa o ka fisa n ma,

¹⁶bari kibaru diman fɔko te tɔgɔɲiniko ye ne fɛ, wajibiko lo ne ma. Bɔnɛ ye ne ta ye ni ne ma kibaru diman fɔ.

¹⁷Ni ne y'o baara kɛ ni dusudiya ye, n bena o sara sɔrɔ, nga ni ne b'o kɛ ni jagoya ye, o ye karabako ye n ma.

¹⁸Ne ka tɔnɔ ye jumɛn ye sa? O ye nin ye: ne ka kibaru diman fɔ gwansan n kana miiri a tɔnɔ na.

¹⁹Ne te jɔɔn ye mɔgɔ si fɛ, nga ne ye n yɛrɛ kɛ jɔɔn ye mɔgɔ bɛɛ faan fɛ, waasa ne ka se ka mɔgɔ caaman sɔrɔ u ka sɔn kibaru diman ma.

²⁰Ka ne to zuwifuw cɛma, ne tun kɛra i n'a fɔ olu, waasa ne ka se ka zuwifuw sɔrɔ. Ni ne be ni Ala ka sariya sira taamabagaw ye, n kɛra i n'a fɔ olu, waasa n ka se ka olu sɔrɔ fana k'a sɔrɔ n t'u dɔ ye.

²¹Ka ne to siya wɛrɛw cɛma, Ala ka sariya te minw fɛ, ne tun kɛra i n'a fɔ olu, waasa n ka se k'olu sɔrɔ. Nga a ma kɛ i n'a fɔ ne te Ala ka sariya kɔrɔ! Krista le ye ne ka sariya ye.

²²Barika te mɔgɔ minw na, ka ne to olu cɛma, ne tun be n yɛrɛ kɛ barikatan ye, waasa ka olu sɔrɔ. Ne ye n yɛrɛ kɛ bɛɛ ka mɔgɔ ye waasa cogo o cogo n ka se ka dɔw kisi.

²³Ne b'o bɛɛ kɛ kibaru diman kosɔn, waasa ne ka se ka n niyɔrɔ sɔrɔ.

²⁴Aw b'a lɔn ko mɔgɔ minw be ɲɔgɔndanboli kɛ farikolo tolonkɛyɔrɔ la, u bɛɛ be boli, nga mɔgɔ kelen le be sara nin sɔrɔ dɛ. Aw ka boli ten fana ka o sara nin sɔrɔ.

²⁵Farikolo tolonkɛlaw b'u yɛrɛ tanga fɛɛn caaman ma, waasa u ka se ka sara sɔrɔ min bena ban, nga an kɔni b'a kɛ sara kosɔn min te ban ka ye.

²⁶O le y'a to ne fana b'o boli nin na, nga ne te boli n kunfɛ. N be i n'a fɔ bolokuru tolonkɛla, n te bugɔli kɛ fu.

²⁷Nga ne be sɔn ka n yɛrɛ farikolo tɔɔrɔ ani ka n yɛrɛ minɛ waasa ni ne ye kibaru diman fɔ ka ban mɔgɔ wɛrɛw ye, o kɔ, Ala kana ban ne yɛrɛ la.