Read dyu Korɛntikaw filanan 10 Bible Online

Korɛntikaw filanan 10 - dyu bible

Korɛntikaw filanan 10

¹U b'a fɔ ko ne Pɔli kɛra mɔgɔmajiginin ye ni ne be aw cɛma, nga ni n te aw cɛma, n ka fari. Ne yɛrɛ le b'aw daali Krista ka makari n'a ka ɲumanya kosɔn,

²ko aw kan'a to ne be fariya aw ma ni n sera aw fɛ tuma min na, bari, mɔgɔ minw b'a miiri ko an be adamadenya baara le kɛra dɔrɔn, ne be se ka fariya olu ma.

³Hali k'an t'o adamadenya la, an te kɛlɛ kɛ adamaden cogo la.

⁴An ka kɛlɛkɛminanw te adamaden ta ye, Ala ta lo, barika b'u la ka juguw ka fanga cɛn k'u ka miirijuguw cɛn,

⁵ani yɛrɛboɲala minw be muruti Ala sago ma, ne be olu bɛɛ majigi. An be mɔgɔw ka miiri bɛɛ yɛlɛma k'o sin Krista ma u k'a ka kuma bato.

⁶N'aw sɔnna ka mɛnni kɛ an fɛ tuma min na, an labɛnnin lo ka murutibagaw bɛɛ jalaki.

⁷An be koow filɛ o kɔɔ kan dama. Ni mɔgɔ dɔ lanin b'a la ko ale ye Krista ta ye, o tigi ka kan k'a lɔn fana ko ni ale ye Krista ta ye, an fana ye a taw ye.

⁸Matigi ye see min d'an ma k'aw dɛmɛ ka taga ɲa, o ma d'an ma aw ka makosa kama. Hali ni ne ye n yɛrɛ boɲa o kosɔn ka tɛmɛ dɔɔni, ne te maloya n'o ye.

⁹A ma kɛ ko ne b'a fɛ ka siranya bila aw la ni ne ka batakiw ye dɛ,

¹⁰bari u b'a fɔra ko ne Pɔli be kuma gwɛlɛmanw n'a farimanw le fɔ n ka batakiw kɔnɔ, nga ko ni ne yɛrɛ le nana, fanga te n ka kuma na ani ko mɔgɔ be se k'o kɔɔ kari.

¹¹Mɔgɔ min b'o kuma ɲɔgɔn fɔ, o tigi k'a faamu fana ko k'an to yɔrɔ wɛrɛ la, an ka kuma be bataki kɔnɔ cogo min na, o cogo la fana n'an b'aw cɛma, an ka kɛwali be ten.

¹²An tena an ka koo suma, walima k'o kɛɲɛ ni mɔgɔ dɔ wɛrɛw ta ye, olu minw b'u yɛrɛ koo fɔ. Nalomanw lo, u b'u yɛrɛ ka koo suma ani k'o kɛɲɛ n'u yɛrɛ ye.

¹³An kɔni, an t'an yɛrɛ boɲa ka tɛmɛ an lɔyɔrɔ kan, nga Ala ye lɔyɔrɔ min d'an ma, min kɛra sababu ye, an sera aw fɛ, an b'an yɛrɛ boɲa ka kɛɲɛ n'o ye.

¹⁴An sera aw fɛ ka Krista ka kibaru diman dama fɔ aw ye, an ma tɛmɛ an lɔyɔrɔ kan i n'a fɔ a latigɛra cogo min na.

¹⁵An te tɛmɛ an lɔyɔrɔ kan. An t'an yɛrɛ boɲa mɔgɔ wɛrɛ ka baara kosɔn. Nga an b'a fɛ aw ka taga ɲa Krista ka koo la, an ka se ka baara caaman dɔ wɛrɛw kɛ aw cɛma, ka kɛɲɛ ni lɔyɔrɔ ye min dira an ma

¹⁶janko an ka se ka taga ɲa ni kibaru diman fɔko ye fɔɔ ka tɛmɛ aw la ka taga yɔrɔ wɛrɛ la. An tena an yɛrɛ boɲa mɔgɔ wɛrɛ ka baara kosɔn.

¹⁷ A fɔra ko: «Ni min be wanso, o ka wanso Matigi barika la.»

¹⁸A ma kɛ ko mɔgɔ min b'a yɛrɛ koo fɔ, k'o tigi ta le ye tiɲɛ ye, nga mɔgɔ min koo ka di Matigi ye.