Read dyu Korɛntikaw filanan 11 Bible Online

Korɛntikaw filanan 11 - dyu bible

Korɛntikaw filanan 11

¹Ayiwa, n'aw tun be se ka ne ka fatɔyakuma muɲu dɔɔni tugu. Aw be se k'o muɲu.

²Ne be keliya aw kosɔn, o keliya nin bɔra Ala fɛ, bari aw kɛra i n'a fɔ sungurusɔbɛ, ne ye min maminɛ cɛɛ kelen ye, o ye Krista ye.

³ Nga ne be siran ko aw hakili kana ɲagami, k'aw yɔrɔ jaɲa Krista ka kɔnɔgwɛ la, i n'a fɔ saa ye Awa namara n'a ka cekuya ye cogo min na.

⁴Mɔgɔ wɛrɛ be na ka Yezu wɛrɛ koo fɔ aw ye, a ka fɔta be danna an ta la, aw be sɔn o ma, ka sɔn nii wɛrɛ ma, min be danna Nii Senuman na, ka sɔn kibaru diman wɛrɛ ma, min be danna ni aw tun sɔnna min na.

⁵Ne ka miiri la, ne k'o cidenbaba nunu man fisa ni ne ye foyi si la.

⁶Hali ni ne te se kuma na, lɔnniya faan fɛ kɔni, ne be se, an y'o bɛɛ yira aw la ka gwɛ tuma bɛɛ, koo bɛɛ la.

⁷Ne tun ye n yɛrɛ majigi ka kibaru diman fɔ aw ye gwansan waasa aw mako ka ɲa, o tuma na ne ye hakɛ kɛ wa?

⁸Ne ye Krista ka jama dɔw bololafɛnw le minɛ ka sɔrɔ ka baara kɛ aw cɛma.

⁹ Tuma min na ne tun b'aw fɛ yen, ni fɛɛn dɔ makoya tun be ne la, ne tun t'o minɛ aw si fɛ, bari an balima minw bɔra Maseduwani mara la ka na, olu le lɔra ni ne ka koo ye. Ne banbana janko ne kana kɛ aw si ka doni ye koo si la, a fana tena kɛ aw ta ye.

¹⁰Krista ka tiɲɛ kosɔn, ne b'a fɔ ko boɲa min be ne kan, o tena bɔ ne kan Akayi mara la fewu.

¹¹Mun na ne y'o fɔ aw ye? Bari ne t'aw kanu wa? Ayi, Ala yɛrɛ b'o lɔn.

¹²Ne ye baara min kɛ, ne bena o ɲɔgɔn kɛ tugu, janko minw be cogoya ɲini k'u yɛrɛ boɲa k'a fɔ k'olu b'an ka baara ɲɔgɔn le kɛra, u kana se k'o kɛ.

¹³O mɔgɔ nunu be galon tigɛ k'olu ye cidenw ye, u kɛra galontigɛlaw ye, k'u yɛrɛ kɛ Krista ka cidenw ye.

¹⁴O te kabako ye, bari, hali Sutana b'a yɛrɛ kɛ i n'a fɔ mɛlɛkɛɲuman. [1]

¹⁵O la, n'a ka baaradenw fana b'u yɛrɛ kɛ i n'a fɔ koɲumankɛlaw, o te kabako ye. Nga u ka koo bɛɛ bena laban ka kɛɲɛ n'u ka baara ye.

¹⁶Ne b'a fɔ tugu ko mɔgɔ si kana miiri ko ne ye fatɔ ye. Nga n'o be dɔ kɔnɔ, o tuma na, aw ka ne kɛ fatɔ ye, ne ka se ka n yɛrɛ boɲa dɔɔni fana.

¹⁷Ne be kuma min fɔra sisan, o te Matigi sago ye, nga sababu le y'a to, ne be n yɛrɛ boɲa, o la, ne be kuma i n'a fɔ fatɔ.

¹⁸Mɔgɔ dɔw b'u yɛrɛ boɲa ka kɛɲɛ ni adamadenya ye minkɛ, o la, ne fana be n yɛrɛ boɲa.

¹⁹Aw minw ɲamalɔnin bɛ, aw be sɔn ka fatɔw ka koo muɲu!

²⁰Aw be sɔn u b'aw minɛ i n'a fɔ jɔɔnw, ani u ka ben aw kan k'aw tɔɲɔ, ani k'aw dɔgɔya, hali n'u b'aw tulo ci, aw b'o bɛɛ muɲu.

²¹Ne yɛrɛ be maloya ka kuma nin fɔ, a kɛra i n'a fɔ an ye barikatanw ye. Ni mɔgɔ wɛrɛw b'u jaa gwɛlɛya k'u yɛrɛ boɲa, ne fana be sɔn k'o ɲɔgɔn kɛ, ne be kumana i n'a fɔ fatɔ.

²²Olu ye eburu ye kɛ? Ne fana ye dɔ ye. Olu ye Isirayɛlidenw ye wa? Ne fana ye dɔ ye! U ye Ibrayima ka deenw ye. Ne fana ye dɔ ye!

²³ U ye Krista ka baarakɛlaw ye. Ne bena kuma i n'a fɔ ne fatɔyara le. Ne tɛmɛna olu kan o baara la yɛrɛ, ne donna kaso la ka tɛmɛ olu kan, u ye ne bugɔ ka tɛmɛ olu kan fana. Waati caaman na ne tun be ɲini ka sa,

²⁴ Zuwifuw ye ne minɛ ka golokami ɲaa bi saba ni kɔnɔntɔn bɔ ne la, siɲɛ duuru bɛɛ.

²⁵ U ye ne bugɔ ni bere ye siɲɛ saba, ka ne bon ni kabakuruw ye siɲɛ kelen, kurun cɛnna ni ne ye siɲɛ saba. Ne ye suu kelen ni tile kelen kɛ jii kɔnɔ.

²⁶ Ne ye n ka taama caaman kɛ seen na. Ka ne to taama na, waati caaman na gwɛlɛya sera ne ma, baji tun be ɲini ka n ta, benkannikɛlaw fana fɛ, gwɛlɛya sera ne ma, ne ka siya yɛrɛ ye gwɛlɛya lase ne ma, ani siya wɛrɛw fana, ne ye gwɛlɛya sɔrɔ dugubabaw kɔnɔ, ani kongo kɔnɔ fana, gwɛlɛya fana sera ne ma kɔgɔji kan, ani ne balimajuguw y'a kɛ gwɛlɛya sera ne ma fana.

²⁷Ne sigɛnna baara gwɛlɛman bolo, ne ma sinɔgɔ siɲɛ caaman, ne tɔɔrɔla kɔngɔ ni minnɔgɔ bolo, tuma caaman ne tun te dumuni sɔrɔ, ne tɔɔrɔla nɛnɛ bolo kosɔbɛ, ne tun te fani sɔrɔ k'a don fana.

²⁸Ka fara o bɛɛ kan, loon o loon ne be hami ni Krista ka jamakuluw bɛɛ ka koo ye.

²⁹Ni mɔgɔ dɔ dɛsɛra, a be kɛ ne kɔnɔ i n'a fɔ ne yɛrɛ le dɛsɛra. Ni dɔ ye kojugu kɛ, ne hakili bɛɛ be cɛn.

³⁰Ni ne ka kan ka n yɛrɛ boɲa, ne bena n yɛrɛ boɲa ne ka dɛsɛyɔrɔ le la.

³¹Ala min ye an Matigi Yezu Faa ye, ale min tɔgɔ ka kan ka boɲa tuma bɛɛ, ale b'a lɔn ko ne te galon tigɛra.

³²Ka ne to Damasi dugu kɔnɔ, masacɛ Aretasi ka lasigiden ye sira di k'u ka dugu dondaw bɛɛ kɔlɔsi, waasa u ka ne minɛ.

³³ Nga n balimaw ye n dɛmɛ ka n jigi ni kogo woo ye dugu kɔfɛ sinsin kɔnɔ. A kɛra ten, ne kisira u ma.