Read dyu Korɛntikaw filanan 12 Bible Online

Korɛntikaw filanan 12 - dyu bible

Korɛntikaw filanan 12

¹Ne ka kan ka ne yɛrɛ boɲa, hali n'o ma ɲi. O n'a ta bɛɛ, Matigi ye fɛɛn minw yira ne la ani ne ye koo minw ye, ne bena olu koo fɔ.

²Ne be mɔgɔ dɔ lɔn min lara Krista la, a saan tan ni naani filɛ nin ye, o tigi nin tara ka taga fɔɔ sankolo dan na. A yɛrɛ le yɛlɛla yen wa, walima fɛɛn yirata lo wa, ne kɔni m'o lɔn, Ala kelen le b'o lɔn.

³Tiɲɛ lo, ne y'a lɔn k'o mɔgɔ nin tun tara ka taga yen, a yɛrɛ yɛrɛ le tara ka taga wa, walima fɛɛn yirata lo wa, ne m'o lɔn, Ala kelen le b'o lɔn.

⁴O tigi nin tara ka yɛlɛ fɔɔ arijana na. O yɔrɔ la, a ye kuma dɔ mɛn, min te se ka segi ka fɔ tugu, ani mɔgɔ man kan k'a min baro bɔ.

⁵Ne be se ka n yɛrɛ boɲa o mɔgɔ sugu le kosɔn, nga ne kɔni, ne te n yɛrɛ boɲa n yɛrɛ ka kɛta kosɔn, fɔɔ ne ka dɛsɛ kosɔn.

⁶Ni ne tun b'a fɛ ka n yɛrɛ boɲa, ne tun tena jati fatɔ ye, bari ne tun bena tiɲɛ dama le fɔ. Nga ne banna k'o kɛ min kama, o ye nin ye, ne t'a fɛ mɔgɔ si ka ne boɲa fɛɛn wɛrɛ la ni ne ka kuma ni n ka kɛwali tɛ.

⁷Balabu dɔ ye ne sɔrɔ, a nana i n'a fɔ Sutana ka ciden waasa ne ye kabako minw ye, ne kana se ka ne yɛrɛ boɲa olu kosɔn.

⁸O balabu nin kosɔn ne ye Matigi daali siɲɛ saba ko a ka ne kɛnɛya.

⁹Nga a ye ne jaabi ko: «N ka nɛɛma b'i wasa, ne be n ka sebagaya yira i ka dɛsɛwaati la.» O le y'a to ne bena n yɛrɛ boɲa ne ka tɔɔrɔkow le la, waasa Krista ka sebagaya ka to ne fɛ.

¹⁰O le kosɔn, ne be nisɔndiya ne ka dɛsɛ koow la, u be ne nɛnina wo, ne dusu kasira wo, u be ne tɔɔrɔla wo, ne be nisɔndiya hali ni nisɔngoyako lo Krista kosɔn, bari ne y'a lɔn ko waati min na ne barika dɛsɛra, o waati yɛrɛ la ne be fanga sɔrɔ.

¹¹Aw k'a filɛ, ne be kumana i n'a fɔ ne kuun wilila, o bɔra aw le la. Aw le tun ka kan ka kuma ne nɔɔ na. Bari hali ni ne te foyi ye, aw ka cidenbaba nunu man fisa ni ne ye.

¹²Kɛwali minw b'a yira ko ne ye ciden ye, olu bɛɛ yera aw cɛma. Ne ye kabako sifa bɛɛ kɛ. Ka fara o kan, ne muɲuna koo bɛɛ la.

¹³Ne ma se k'aw minɛ ka ɲa koo jumɛn le la, ni ne y'o ɲɔgɔn kɛ Krista ka jama tɔw ye? Ne ma sɔn aw ka lɔ ni ne ka kunko ye minkɛ, n'o dɔrɔn tɛ. Aw ye yafa ne ma o fili nin la.

¹⁴Ayiwa, nin le bena kɛ a sabanan ye, ne labɛnnin lo ka taga aw fɛ. Ne kunko tena la aw kan, bari ne mako b'aw yɛrɛ le la, ne mako te aw ka bololafɛnw la. Facɛman le b'a deenw ka sini ɲasigi labɛn, deenw te facɛ ta labɛn.

¹⁵Ne kɔni fɛ, ne labɛnnin lo ka n bololafɛnw bɛɛ ban aw kosɔn, ka tila ka n yɛrɛ di k'aw dɛmɛ. Ni ne y'aw kanu ten, o le ben'a to aw te ne kanu sɛbɛ la wa?

¹⁶Aw y'a lɔn ko ne ma dɛmɛ sɔrɔ aw fɛ. Nga dɔw b'a fɔ ko ne ka cekuya kosɔn, ne ye namara kɛ ka dɔ sɔrɔ sira wɛrɛ fɛ.

¹⁷Ne ye mɔgɔ minw ci aw fɛ, ne ye tɔnɔ dɔ sɔrɔ aw kun olu dɔ barika la wa?

¹⁸Ne ye Titi daali k'a ci aw fɛ n'an balimacɛ ye, ne ye min koo fɔ ka tɛmɛ. O tuma na, Titi y'a ka doni dɔ la aw kan wa? Ne ni Titi jogo n'an ka miiriya te kelen ye wa?

¹⁹Aw be miiri kabini tumajan, ko an be tiɲɛ le ɲinina, o tɛ wa? Ayi dɛ, ne terisɔbɛw, an b'a fɛ aw ka se ka taga ɲa le. O le y'a to Krista barika la, an b'an ka kuma fɔ Ala ɲakɔrɔ.

²⁰Ne be siran ko ni ne sera aw fɛ waati min na, ne b'aw jati cogo min na, ne kana taga aw sɔrɔ cogo wɛrɛ la, aw tun be ne jati cogo min na, aw fana kana ne ye cogo wɛrɛ la. N be siran ko kɛlɛ ni keliya, ni dimi, ni sɔnjuguya ni ɲɔgɔnnɛni, ni kumakolonfɔ, ni yɛrɛboɲa ni koferekenin kana sɔrɔ aw cɛma.

²¹Ne be siran fana ko ne mana se aw fɛ tuma min na, ne ka Ala kana ne majigi aw cɛma. Mɔgɔ minw tun ye hakɛ kɛ n'u ma sɔn ka nimisa ka faran u ka kakalaya la, n'u ka mɔgɔkolonya n'u ka malobaliya la, ne dusu kana kasi olu kosɔn.