Read dyu Korɛntikaw filanan 2 Bible Online

Korɛntikaw filanan 2 - dyu bible

Korɛntikaw filanan 2

¹Ne y'a latigɛ ko ne tena kɔsegi aw fɛ k'aw dusu kasi.

²Ni ne y'aw dusu kasi, ne bena nisɔndiya sɔrɔ min, n'aw fɛ tɛ?

³Ne ye bataki ci aw ma waasa ni ne nana se aw fɛ, ne dusu kana kasi aw kosɔn aw minw ka kan ka ne nisɔn diya. Ne fana lanin b'a la ko ne ka nisɔndiya, o le y'aw bɛɛ ka nisɔndiya ye.

⁴Ne tun b'o bataki cira aw ma tuma min na, ne y'o ci ni hakiliɲagami, ani dusucɛn ye, ne tun kasira kosɔbɛ. O ma kɛ k'aw dusu kasi dɛ, nga waasa aw ka se k'a lɔn ko ne b'aw kanu kosɔbɛ.

⁵Ni mɔgɔ dɔ ye dusukasiko dɔ kɛ, a ma ne dusu kasi, a y'aw bɛɛ le dusu kasi, walima aw dɔw.

⁶Jama ye min kɛ a la ka ban, o b'a bɔ.

⁷Sisan, aw ka yafa a ma k'a jigi tugu, waasa dusukasi kan'a sɔrɔ fɔɔ a hakili be ɲagami ka dama tɛmɛ.

⁸O la, ne b'aw daali ko aw ka banba k'a yira a la ko a koo ka d'aw ye.

⁹Ne y'o koo sɛbɛn k'o ci aw ma, k'a filɛ n'aw be se ka mɔgɔ ka kuma bɛɛ bato.

¹⁰N'aw yafara mɔgɔ dɔ ma, ne fana be yafa o tigi ma. N'aw y'a ye ne y'o ɲɔgɔn kɛ, ne y'o kɛ aw le kosɔn, Krista ɲakɔrɔ,

¹¹waasa an kana sira di Sutana ma a ka see an kɔrɔ bari an b'a ka miiriya lɔn.

¹²Ne sera Torowasi tuma min na ko n bena Krista ka kibaru diman fɔ yen, Matigi tun ye cogo di ne ma ka se ka baara kɛ kosɔbɛ.

¹³ O n'a ta bɛɛ, ne hakili tun ma sigi, bari ne ma n balimacɛ Titi sɔrɔ yen. O la, ne ye sira daali u fɛ ka taga Maseduwani mara la.

¹⁴Barika ka la Ala ye ale min b'a to an be niyɔrɔ sɔrɔ Krista ka sesɔrɔko la tuma bɛɛ, ale lo b'an ta ka baara kɛ n'an ye ka Krista yira yɔrɔ bɛɛ, i n'a fɔ wusulan min kasa be taga yɔrɔ bɛɛ.

¹⁵Mɔgɔ minw be kisili sira kan, ani minw be halaki sira kan, olu fɛ an kɛra i ko wusulan kasadiman Krista be min di Ala ma.

¹⁶Ala ye mɔgɔ minw kisi an kɛra kasadiman ye olu ye min be nii di. Minw be halaki sira kan, an kɛra kasagoma ye min be na ni saya ye.

¹⁷Mɔgɔ caaman be Ala ka kuma kɛ jagokun ye. An te i n'a fɔ olu. Ala le y'an ci, o la, an be kuma a ɲakɔrɔ ni kɔnɔgwɛ ye Krista barika la.