Read dyu Korɛntikaw filanan 4 Bible Online

Korɛntikaw filanan 4 - dyu bible

Korɛntikaw filanan 4

¹Ala ka ɲumanya kosɔn a ye baara nin kalifa an ma, o la, an jigi te tigɛ fewu.

²An banna dibidibiko ma maloya be min na, an te koo kɛ ni namara ye, an fana te Ala ka kuma kɔrɔ yɛlɛma fewu. An kɔni, an be tiɲɛ yɛrɛ yɛrɛ le fɔ, janko mɔgɔw k'u jigi la an kan Ala ɲakɔrɔ.

³Halibi anw be kibaru diman min fɔ, n'ale gwɛnin tɛ mɔgɔ minw fɛ, olu be halaki sira kan.

⁴Minw te la Ala la, diɲɛ kuntigi Sutana ye olu hakili dibi waasa u ka na se ka kibaru diman yeelen ye min be Krista ka nɔɔrɔ yira, ale min ye Ala jaa ye.

⁵An t'an yɛrɛ koo fɔra aw ye dɛ, Yezu Krista min ye Matigi ye, an be ale lo koo fɔra. Anw kɔni be baara kɛ aw ye Yezu kosɔn.

⁶ Bari Ala min tun y'a fɔ ko kɛnɛ ka bɔ dibi cɛma, ale kelen le ye yeelen bɔ an dusu la, waasa mɔgɔw k'a ka nɔɔrɔ ye, min be manamana Krista ɲada kan.

⁷Nga o baara nafaman dira an ma, an minw fanga ka dɔgɔ i n'a fɔ bɔgɔdaga, waasa mɔgɔw k'a lɔn k'o sebagaya kabakoman nin ma bɔ an na, fɔɔ Ala.

⁸An dɛrɛnin be tɔɔrɔw fɛ faan bɛɛ la, o bɛɛ n'a ta, an be yen. An hakili ɲagaminin be, nga an jigi ma tigɛ.

⁹U y'an tɔɔrɔ kosɔbɛ, nga Ala m'an bila. U y'an bugɔ k'an ben, nga an tɔɔ ma laban.

¹⁰Tuma o tuma Yezu ka tɔɔrɔ ɲɔgɔn b'an kan, an be sɔn ka sa.

¹¹K'an to nii na, an kɔni labilanin lo saya kama tuma bɛɛ Yezu kosɔn. O la Yezu nii be yira farisogo sara la.

¹²O la, saya be n'an ye, nii be n'aw ye.

¹³ A fɔra Ala ka kuma na ko: «Ne lar'a la, o le y'a to ne kumana.» O jigi kelen nin le y'a to an fana lar'a la, o le y'a to an be kuma.

¹⁴An lanin b'a la ko ale min ye an Matigi Yezu kunun, ale fana bena an kunun ni Yezu ye, ani k'an bɛɛ jɛn ɲɔgɔn fɛ a ɲakɔrɔ.

¹⁵O koo nunu bɛɛ kɛra aw le kosɔn, o la, Ala be nɛɛma kɛ mɔgɔ caaman ye, waasa u k'a tanu ani ka boɲa la a kan.

¹⁶O le y'a to an jigi te tigɛ fewu, hali n'an yɛrɛ farisogo be cɛn ka taga, an nii be lakuraya loon o loon.

¹⁷Waati dɔɔni tɔɔrɔ minw b'an sɔrɔ, o te foyi ye. An bena boɲa min sɔrɔ o tɔɔrɔ nin kosɔn, o ka bon haali.

¹⁸An ka miiriya te fɛɛn yetaw kan, fɔɔ fɛɛn yebaliw. Fɛɛn minw be ye, olu be tɛmɛ, nga fɛɛn yebaliw te tɛmɛ abada.