Read dyu Korɛntikaw filanan 6 Bible Online

Korɛntikaw filanan 6 - dyu bible

Korɛntikaw filanan 6

¹An be baara kɛra ni Ala ye, o le kosɔn an b'aw daali ko Ala ye nɛɛma min kɛ aw ye, aw kan'a to o be kɛ gwansan ye,

² bari a fɔra Ala ka kuma na ko: «Waati bɛnnin na, ne y'i lamɛn. Kisili loon na, ne y'i dɛmɛ.» Ayiwa, o waati bɛnnin ye sisan le ye, kisili loon le ye bii ye.

³An t'a fɛ mɔgɔ si k'an ka baara lɔgɔbɔyɔrɔ sɔrɔ, o la, an t'a fɛ ka mɔgɔ si kunna cɛn koo si la.

⁴An kɔni b'a yira koo bɛɛ la ko an ye Ala ka baarakɛlaw ye. An be tɔɔrɔ caaman ni hakiliɲagamikow ani dusucɛnko muɲu.

⁵ U y'an bugɔ, u y'an don kaso la, u ye mɔgɔw kɔnɔnasu an kama, an ye baara gwɛlɛmanw kɛ, sinɔgɔ m'an labɔ, kɔngɔ y'an minɛ.

⁶An y'an yɛrɛ yira a ka baarakɛlaw ye an ka mɔgɔsɔbɛya fɛ, n'an ka lɔnniya, n'an ka muɲuli, n'an ka ɲumanya fɛ, Nii Senuman barika la, ani an ka kanuyasɔbɛ fɛ,

⁷an ka tiɲɛ fɔli, ni Ala ka sebagaya fɛ. An be kotilennin ta k'o kɛ i n'a fɔ an ka maramafɛn, ka kɛlɛ kɛ n'o ye ani k'an yɛrɛ mara n'o ye fana.

⁸N ye n yɛrɛ yira Ala ka baarakɛla ye n boɲatuma ni n dɔgɔyatuma na. U b'an tɔgɔjugu fɔ, k'an tɔgɔɲuman fana fɔ. U be miiri ko an ye galontigɛlaw ye, k'a sɔrɔ an ye tiɲɛfɔlaw ye.

⁹U b'a jati ko mɔgɔ t'an lɔn, k'a sɔrɔ an lɔnnin lo, u b'a jati ko an sanin lo, k'a sɔrɔ an be nii na, u b'an ɲaa gwan, nga u t'an faga.

¹⁰U b'an dusu cɛn, nga an be nisɔndiya sɔrɔ tuma bɛɛ. U b'an jati fantanw ye, nga an be mɔgɔ caaman kɛ fɛntigiw ye. U be miiri ko foyi t'an fɛ, k'a sɔrɔ fɛɛn bɛɛ b'an fɛ.

¹¹Korɛntikaw, an y'an kɔnɔ gwɛ aw ye, ka kuma aw fɛ ni kɔnɔgwɛ ye.

¹²An kɔni, an m'an kɔnɔ dogo aw la, aw le y'aw kɔnɔ dogo an na.

¹³Ne be kumana aw fɛ i n'a fɔ ne ka deenw, an y'aw minɛ cogo min na, aw fana k'aw kɔnɔ gwɛ an ye ten.

¹⁴Minw ma la Krista la, aw kana jɛn ni olu ye u ka koo si la. Bɛɛn sifa jumɛn le be se ka sɔrɔ tilenninya ni kojugu cɛ? Yeelen ni dibi be se ka bɛn wa?

¹⁵Bɛɛn jumɛn le be sɔrɔ Krista ni Sutana cɛ? Min lara Krista la ni min ma l'a la, jɛnɲɔgɔnya jumɛn bɛ sɔrɔ olu ni ɲɔgɔn cɛ?

¹⁶ Bɛɛn jumɛn le be sɔrɔ Ala ka soo ni joow cɛ? Bari an ye Nitigi Ala ka soo ye i ko Ala yɛrɛ y'a fɔ cogo min na, a ko: «Ne bena sigi u cɛma ka to n'u ye. Ne bena kɛ u ka Ala ye, u bena kɛ ne ka mɔgɔw ye.»

¹⁷ Matigi ko: «Aw ye bɔ u cɛma, ka faran u la, aw kana maga fɛɛn nɔgɔnin si la, ne bena aw ladon n fɛ.»

¹⁸ Matigi, min ye Setigi ye, ale tun y'a fɔ ko ale bena kɛ aw Faa ye, aw fana bena kɛ a dencɛw n'a denmusow ye.