Read dyu Korɛntikaw filanan 8 Bible Online

Korɛntikaw filanan 8 - dyu bible

Korɛntikaw filanan 8

¹Ne balimaw, Ala ye nɛɛma min kɛ Krista ka jama ye Maseduwani mara la, an b'a fɛ aw k'o lɔn.

²K'u to tɔɔrɔba la, u n'u ka fantanyajugu bɛɛ, u nisɔndiyaninba y'u tigɛ yɛlɛ kosɔbɛ.

³Ne y'u seere ye ko a diyara u ye, u ye dili kɛ n'u seko ye, ani fɔɔ ka tɛmɛ u seko yɛrɛ kan.

⁴ U y'an daali kosɔbɛ ko an ka sira d'u ma fana u ka se k'u niyɔrɔ ta Ala ka mɔgɔw dɛmɛko la o min be Zude mara la.

⁵U kɔnna k'u yɛrɛ di Matigi ma, ka mɛnni kɛ an fana fɛ ka kɛɲɛ ni Ala sago ye, fɔɔ u sera ka koo kɛ an yɛrɛ ka miiriya tun ma se min ma.

⁶O cogo la fana, an ye Titi daali ko a ye baaraɲuman min daminɛ aw cɛma, a ka taga ɲa k'o laban.

⁷Aw ka ɲi: jigi b'aw fɛ, aw fana be se kuma na, aw be koo lɔn, aw fana jijanin lo kosɔbɛ, ani an koo ka d'aw ye. O la, anw b'a fɛ aw k'aw sɔnɲuman yira dɛmɛko nin na.

⁸A ma kɛ ko ne b'a fɔ aw ye ko wajibi lo aw k'a kɛ o cogo la dɛ, nga ne b'aw tɔɲɔgɔnw ka jijali fɔ aw ɲana, janko aw ka se k'a yira ko kanuya b'aw la tiɲɛ na.

⁹Bari aw b'an Matigi Yezu Krista ka ɲumanya lɔn, ale min tun ye fɛntigi ye, a y'a yɛrɛ kɛ fantan ye aw kosɔn, waasa aw ka se ka kɛ fɛntigiw ye.

¹⁰Nin ye ne ka miiriya ye o la, a fana be bɛn aw ma, kabini salon, aw minw kɛra fɔlɔ ye k'o koo ŋaniya ta, o dama tɛ, aw y'aw bolo don o baara la fana.

¹¹Sisan aw ye taga ɲa k'o baara nin laban. Aw y'o ŋaniya ni timinadiya min ye, aw ye taga ɲa k'a laban k'o kɛ ni seko damayira ye.

¹²Bari see min b'i ye, n'i y'i yɛrɛ di ka sɔnni kɛ ka kɛɲɛ n'o ye, o le ka ɲi. Ni fɛɛn t'i bolo, baasi tɛ.

¹³A ma kɛ ko an b'a fɛ aw k'aw tɔɲɔgɔnw dɛmɛ, ka tila ka nimisa dɛ, nga an b'a fɛ aw bɛɛ ka kɛ kelen ye.

¹⁴O la, aw ye sɔrɔli caaman min kɛ, aw k'o kɛ ka dɛsɛbagatɔw dɛmɛ. N'aw nana dɛsɛ loon dɔ la, olu fana ka se k'aw dɛmɛ n'u ta ye, o la aw bɛɛ ka koo be kɛ kelen ye,

¹⁵ i ko a fɔra Ala ka kuma na cogo min na ko: «Mɔgɔ min ye caaman cɛ, ale ta ma tɛmɛ a daan kan. Min ye dɔɔni cɛ, ale ta fana ma dɛsɛ.»

¹⁶An be Ala tanu bari a y'aw koo diya Titi ye i n'a fɔ anw.

¹⁷Bari a sɔnna an ka daalikan ma. A diyara a ye kosɔbɛ, a sɔnna ka taga aw fɛ tugu.

¹⁸An balimacɛ min tɔgɔ bɔra Krista ka jama cɛma kibaru diman fɔli baara kosɔn, an y'ale fara Titi kan k'u ci aw fɛ.

¹⁹Krista ka jama dɔw y'a woloma k'a fara an kan, a ka kɛ an taamaɲɔgɔn ye baaraɲuman nin na, an be min kɛra Matigi tɔgɔ boɲa kama, ani an ka dusuɲuman kosɔn.

²⁰An b'o kɛ janko an kana tɔgɔcɛn sɔrɔ baaraɲuman nin kɛli la min ye bolomafara ye.

²¹ An t'a fɛ ka tilenninya kɛ Matigi dama ɲakɔrɔ, an b'a fɛ k'a kɛ mɔgɔw ɲakɔrɔ fana.

²²Mɔgɔ minw wolomana ka ci aw ma, an y'an balimacɛ nin fana fara u kan, an y'ale min lɔn mɔgɔ timinadiyanin ye baara caaman seen fɛ. A fana y'o yira an na sisan tugu, bari a y'a jigi la aw kan kosɔbɛ.

²³Titi kɔni, ale kɛra ne taamaɲɔgɔn ani baarakɛɲɔgɔn ye aw cɛma. An balima minw be n'a ye, olu ye Krista ka jama ka cidenw ye, minw kɛra Krista ka boɲafɛnw ye.

²⁴Aw k'olu minɛ ka ɲa ni kanuya ye, janko Krista ka jamakuluw k'o ye k'a lɔn ko tiɲɛ b'an fɛ n'an y'an yɛrɛ boɲa aw kosɔn.