Read dyu Korɛntikaw filanan 9 Bible Online

Korɛntikaw filanan 9 - dyu bible

Korɛntikaw filanan 9

¹Min ye bolomafarako ye, min be kɛra Ala ka mɔgɔ kosɔn, kuun t'a la ne ka bataki ci aw ma o la.

²Ne b'a lɔn ko aw sɔnnin lo, o le y'a to ne ye n yɛrɛ boɲa aw kosɔn Krista ka jamakuluw cɛma minw be Maseduwani mara la. Ne y'a fɔ u ye ko aw Akayikaw ka bolomafara labɛnna ka ban kabini salon. O la, aw ka jijali y'a kɛ Krista ka jama caaman banbana.

³Ne y'an balima nunu ci aw fɛ, janko an b'an yɛrɛ boɲa aw kosɔn koo minw na, o kana kɛ gwansan ye, ani aw labɛnnin ka sɔrɔ i ko ne tun y'a fɔ cogo min na.

⁴Ne be siran ni Maseduwanika dɔw tagara ni ne ye aw fɛ, u kana taga sɔrɔ n'aw labɛnnin tɛ, o bena kɛ maloya ye an fɛ, n t'a fɛ k'aw ta fɔ.

⁵Ne y'a ye ko a ka fisa ne k'an balima nunu daali u be taga an ɲa aw fɛ. Aw y'aw daa di bolomafara min la, aw k'o labɛn an ɲafɛ, janko a kana kɛ i n'a fɔ jagoyako ye, nga diyanako.

⁶Aw k'a lɔn ko ni mɔgɔ min ye danni kɛ dɔɔni dɔrɔn, o tigi bena suman dɔɔni le sɔrɔ. Ni min ye danni kɛ caaman, ale be suman caaman sɔrɔ fana.

⁷Mɔgɔ kelen kelen bɛɛ ka dili kɛ a yɛrɛ sago la, u kan'a kɛ ni nisɔngoya ye, a kana kɛ jagoyako ye, bari mɔgɔ min be sɔnni kɛ ni nisɔndiya ye, o tigi koo le ka di Ala ye.

⁸See be Ala ye ka fɛɛn bɛɛ d'aw ma aw mako be minw na, n'aw y'olu sɔrɔ, aw ka se ka jija ka baaraɲuman sifa bɛɛ kɛ tuma bɛɛ,

⁹ i ko a fɔra Ala ka kuma na cogo min na ko: «A y'a ka fɛɛn caaman tilan fantanw cɛ, a ka tilenninya te ban abada.»

¹⁰ Ala min be sumansi di sɛnɛkɛla ma, ale min be dumuni di, ale kelen le bena aw sɔn fana k'a caya, ani k'aw ka baaraɲuman nin sabati.

¹¹Ale lo bena aw kɛ fɛntigiw ye tuma bɛɛ, o min sababu la, an bena se ka ɲumanya kɛ, mɔgɔ caaman ka barika la Ala ye aw ka bolomafara barika la.

¹²Bari aw be baara min kɛ, o te dan Ala ka mɔgɔw ka makoɲa dama ma, o fana be kɛ sababu ye mɔgɔ caaman be barika la Ala ye.

¹³N'u y'aw ka dɛmɛ nin ye tuma min na, u ben'a lɔn ko aw ye mɔgɔ sifa min ye, o la, u bena Ala tanu aw kosɔn, bari aw sɔnna Krista ka kibaru diman ma ka mɛnni kɛ a fɛ, ani aw ka timinadiya kosɔn, aw sɔnna ka olu dɛmɛ ani tɔ nunu bɛɛ.

¹⁴Olu fana bena Ala daali aw ye, ani k'u ka kanuya yira aw la, Ala ka nɛɛmaba kosɔn, a ye min kɛ aw ye.

¹⁵An be Ala tanu a ka nɛɛma kosɔn min ɲɔgɔn tɛ.