Read dyu Galatikaw 1 Bible Online

Galatikaw 1 - dyu bible

Galatikaw 1

¹Ne Pɔli min ye ciden ye, o ma kɛ mɔgɔw sababu la, walima adamaden dɔ barika la, nga o ye Yezu Krista sago ye n'a Faa Ala min y'a kunun a sanin kɔ.

²Ne n'an balima minw bɛɛ be yan, an le be bataki nin cira Krista ka jamakulu ma minw be Galati mara la.

³An Faa Ala n'an Matigi Yezu Krista ka nɛɛma ni hɛrɛ kɛ aw ye.

⁴Ale Krista min y'a yɛrɛ nii di k'an kunmabɔ an ka hakɛw la, waasa k'an tila ka bɔ bii diɲɛ juguman nin bolo, ka kɛɲɛ n'an Faa Ala sago ye.

⁵Boɲa ka la ale kan waati bɛɛ la. Amiina.

⁶Ala min y'aw wele Krista ka nɛɛma barika la, aw banna ale la joona joona, ka tugu kibaru diman wɛrɛ kɔ, o ye ne kabakoya kosɔbɛ.

⁷Tiɲɛ lo, kibaru diman wɛrɛ te yen, nga mɔgɔ dɔw be sɔrɔ aw cɛma minw b'aw ɲagami. U b'a fɛ ka Krista ka kibaru diman yɛlɛma.

⁸Ni mɔgɔ dɔ, hali anw yɛrɛ, walima Ala ka mɛlɛkɛ dɔ, ye kibaru diman wɛrɛ fɔ aw ye, min be danna an ka fɔlɔta la, o tigi danganin lo.

⁹An tun y'o fɔ ka kɔrɔ, ne fana b'a fɔ tugu ko ni mɔgɔ dɔ ye kibaru diman wɛrɛ fɔ aw ye, n'o ma kɛ kelen ye n'an ka fɔlɔta ye aw tun sɔnna min ma, o tigi danganin lo.

¹⁰O tuma na, sisan a fɔra ko ne b'a fɛ ne koo ka diya mɔgɔ ye wa, walima Ala ye? Walima ne b'a fɛ ka mɔgɔ diyanako le kɛ? Ni ne tun b'a fɛ k'o kɛ, ne tun tena kɛ Krista ka baarakɛla ye.

¹¹N balimaw, ne b'a fɛ aw k'a lɔn ko ne ye kibaru diman min fɔ aw ye, o ma bɔ adamaden na.

¹²Ne m'o sɔrɔ mɔgɔ si fɛ, mɔgɔ si fana ma ne kalan o la, nga Yezu Krista yɛrɛ le y'o yira ne la.

¹³ Ne tun be cogo min na fɔlɔfɔlɔ, zuwifu ka Alasira taama na, aw y'o mɛn! Minw lara Ala la ne tun be olu tɔɔrɔ kosɔbɛ. Hali ne tun b'a fɛ o koo ka dabila pewu.

¹⁴ Zuwifuw ka Alasira taamako faan fɛ, ne fana tun tɛmɛna n tɔɲɔgɔn caaman kan, bari ne jijanin tun be ne faaw ka landakow la kosɔbɛ.

¹⁵Sanni ne baa ka ne wolo, Ala ye ne woloma ka bila, a diyara a ye ka ne wele fana a ka nɛɛma barika la.

¹⁶ A y'a Dencɛ yira ne la, waasa ne k'a koo fɔ siya wɛrɛw ye. O la, o yɔrɔnin bɛɛ, ne ma adamaden ka ladili kɔnɔ.

¹⁷N fana ma taga Zeruzalɛmu, ka ciden fɔlɔw ye. Ne ye sira minɛ ka taga Arabi jamana na fɔlɔ, o kɔ, n segira ka na Damasi tugu.

¹⁸ O kɔ, saan saba tɛmɛna ne ka sɔrɔ ka taga Zeruzalɛmu, waasa n ka se ka Piyɛri [1] lɔn. Ne ye tile tan ni duuru dama kɛ n'a ye.

¹⁹Ni ale tɛ, ne ma ciden wɛrɛ ye tugu, n'a ma kɛ Matigi dɔgɔcɛ Zaki dama ye.

²⁰Ne be koo minw bɛɛ fɔra aw ye, Ala b'a lɔn ko ne te galon tigɛra.

²¹O kɔ, n tɛmɛna ka taga Siri ni Silisi jamana na.

²²Krista ka jamakulu minw tun be Zude mara la, olu tun te ne lɔn.

²³U tun y'a mɛn dɔrɔn ko mɔgɔ min tun be olu tɔɔrɔla fɔlɔfɔlɔ n'a tun b'a fɛ o koo ka dabila pewu, ko ale fana b'o koo fɔra sisan.

²⁴A kɛra ten, u tun be Ala tanu ne kosɔn.