Read dyu Galatikaw 3 Bible Online

Galatikaw 3 - dyu bible

Galatikaw 3

¹Aw Galatika nalomanw, mɔgɔ jumɛn le y'aw ɲaa ɲini ten? K'a sɔrɔ Yezu Krista ka sayako lɔgɔ kan fɔra ka gwɛ aw ye kosɔbɛ.

²Ne b'a fɛ ka fɛɛn min faamu aw fɛ, o ye nin ye: Aw ye Nii Senuman sɔrɔ aw ka sariya batoli barika la wa, walima aw sɔnna kibaru diman ma minkɛ, o kosɔn lo?

³Aw ka nalomanya nin sera o bɛɛ ma wa? Aw daminɛna ni Nii Senuman ye, aw b'a fɛ k'o koo laban adamadenya la wa?

⁴Aw y'o koo ye k'o lɔn gwansan wa? N'o ye gwansan ye,

⁵Ala min b'a ka Nii Senuman d'aw ma ani ka kabakow kɛ aw cɛma, ale b'o kɛ aw ka sariya batoli le kama wa? Walima aw sɔnna kibaru diman ma minkɛ, o le kosɔn?

⁶ A fɔra Ala ka kuma na ko: «Ibrayima lara Ala la, o la, a y'a jati mɔgɔtilennin ye.»

⁷ Aw k'a lɔn ko mɔgɔ minw lara Yezu la, olu le ye Ibrayima deenw ye.

⁸ O la, Ala tun kɔnna ka kibaru diman nin fɔ ko: «Siyaw bɛɛ bena hɛrɛ sɔrɔ e le barika la,» bari Ala tun y'a latigɛ ko a bena siya wɛrɛw jati mɔgɔtilenninw ye jigi barika la.

⁹Ibrayima lara Ala la, o la, a ye duba sɔrɔ. O cogo la, mɔgɔ o mɔgɔ mana la Ala la, o tigi be duba sɔrɔ fana.

¹⁰ Mɔgɔ minw jigi be sariya kan, olu bɛɛ danganin lo. Bari a fɔra Ala ka kuma na ko: «Mɔgɔ minw te sariya bɛɛ bato, olu bɛɛ danganin lo.»

¹¹ A fana gwɛnin lo ko Ala ɲakɔrɔ mɔgɔ si te se ka jati mɔgɔtilennin ye sariya barika la, bari a fɔra Ala ka kuma na ko: «Mɔgɔtilennin bena kisi lanaya barika la.»

¹² Nga sariya ta, ni jigi ta te kelen ye. A fana fɔra Ala ka kuma na ko: «Mɔgɔ min be sariya bɛɛ bato, o tigi be balo o barika la.»

¹³ A fɔra Ala ka kuma na ko ni mɔgɔ o mɔgɔ dulonna yiri la, k'o tigi ye dangaden ye. Krista yɛrɛ sɔnna ka kɛ dangaden ye an kosɔn, waasa k'an kisi sariya ka danga ma.

¹⁴A kɛra ten, Ala tun ye hɛrɛ min koo fɔ Ibrayima ye, o ka se ka kɛ siya wɛrɛw ye Yezu Krista barika la, ani Ala tun y'a daa di Nii Senuman min koo la, an k'o sɔrɔ jigi barika la.

¹⁵N balimaw, ne be nin koo nin kɛɲɛ ni adamadenya ye. Ni mɔgɔ dɔ y'a ka koo dɔ latigɛ ka ɲa sanni a ka sa, mɔgɔ wɛrɛ te se k'o cɛn, walima ka dɔ fara o kan.

¹⁶ Ala tun y'a daa di Ibrayima n'a kɔmɔgɔ le ma. O kɔmɔgɔ nin ye Krista le ye. O la, a tun y'a fɔ ko: «E n'i kɔmɔgɔ.» A m'a fɔ ko: «E n'i kɔmɔgɔw.»

¹⁷ Ne b'a fɛ ka fɛɛn min fɔ, o ye nin ye: Ala ye dadili min kɛ o tena yɛlɛma. Saan kɛmɛ naani ni bi saba tɛmɛnin kɔ sariya min nana sigi, ale te se ka dadili nin yɛlɛma fewu.

¹⁸ Bari Ala b'a daa di koo min na, n'ale be sɔrɔ sariya batoli barika la, o te dadili ye tugu. Nga Ala ka dadili kosɔn, a ye nɛɛma kɛ Ibrayima ye.

¹⁹Sariya do sigira mun le kama? A sigira janko filiw ka lɔn, yanni Ibrayima Kɔmɔgɔ ka na. Dadili tun kɛra min ye. Mɛlɛkɛw le y'o sariya nin di soronanikɛla dɔ le barika la.

²⁰Nga ni soronanikɛla koo be fɔ yɔrɔ min na, o te mɔgɔ kelen koo ye tugu, Ala do ye kelen ye.

²¹O tuma na, sariya ni Ala ka dadili be ɲɔgɔn kɛlɛ wa? Ayi, ni sariya tun dira min be se k'a to mɔgɔ be kisi, o tuma na mɔgɔ fana tun be se ka jati mɔgɔtilennin ye sariya barika la.

²²A fɔra Ala ka kuma na ko mɔgɔ bɛɛ be hakɛ ka fanga kɔrɔ, waasa mɔgɔ minw lara Yezu Krista la, olu ka Ala ka dadili nɛɛma sɔrɔ.

²³Mɔgɔw k'u jigi la Krista kan, yanni o waati ka se, an tun be sariya bolo fɔlɔ, k'o waati makɔnɔ.

²⁴O le y'a to, sariya tun kɛra an kɔlɔsibaga ye, ka Yezu Krista makɔnɔ, waasa an ka se ka jati mɔgɔtilenninw ye jigi barika la.

²⁵Sisan lanaya waati le be yen, an te kɔlɔsibaga nin bolo tugu.

²⁶Bari aw minw lara Yezu Krista la, aw bɛɛ ye Ala deenw ye jigi barika la.

²⁷Aw minw bɛɛ batizera waasa ka jɛn ni Krista ye, aw sɔnna ka jɛn n'a ye ka kɛ kelen ye.

²⁸Danfara te zuwifu ni siya wɛrɛ cɛ tugu, jɔɔn ni hɔrɔn cɛ, cɛɛ ni muso cɛ. Bari aw bɛɛ kɛra kelen ye Yezu Krista barika la.

²⁹ N'aw kɛra Krista ta ye, aw ye Ibrayima kɔmɔgɔw ye, aw fana bena niyɔrɔ sɔrɔ Ala ka dadili la.