Read dyu Galatikaw 4 Bible Online

Galatikaw 4 - dyu bible

Galatikaw 4

¹Ne b'a fɛ ka min fɔ, o ye nin ye: Ni deen min ka kan k'a facɛ cɛɛn ta, k'a to denmisɛnya la, ale ni jɔɔn bɛɛ ka kan, hali ni fɛɛn bɛɛ y'a ta ye cogo o cogo.

²A be to a marabagaw bolo, fɔɔ ka taga se a facɛ ka waati latigɛnin ma.

³Anw fana, an tun be i n'a fɔ denmisɛnw waati min na, an tun be tugura diɲɛ koow kɔ, ka kɛ u ka jɔɔnw ye.

⁴Nga Ala ka waati latigɛnin dafara tuma min na, a y'a Dencɛ ci, muso y'a wolo sariya kɔrɔ,

⁵waasa mɔgɔ minw tun be sariya bolo, a k'olu hɔrɔnya janko an ka se ka kɛ Ala deenw ye.

⁶Aw ye Ala deenw ye sɔbɛ la. Ala yɛrɛ y'a Dencɛ Nii don an na, ale min b'a to an b'a fɔ ko: «Baba, an Faa.»

⁷ A kɛra ten, e te jɔɔn ye tugu, nga Ala deen. E y'a deen ye, o la, Ala bena niyɔrɔ d'i ma i n'a fɔ a b'a di a ka deen tɔw ma cogo min na fana.

⁸Fɔlɔfɔlɔ, aw tun te Ala lɔn tuma min na, aw tun be fɛɛn wɛrɛw bato minw te Ala ye ka kɛ u ka jɔɔnw ye.

⁹Nga sisan aw ye Ala lɔn, walima Ala le y'aw lɔn. Fɛɛn minw te foyi ɲa, a kɛra di aw be kɔsegi ka kɛ olu ka jɔɔnw ye tugu?

¹⁰Aw be janto loonw, ni kalow la, ani waatiw ni saanw na kosɔbɛ ka olu bato.

¹¹Sisan, ne be siran ko ne ye baara min kɛ aw cɛma, o kana kɛ gwansan ye.

¹²N balimaw, ne b'aw daali ko aw k'aw yɛrɛ kɛ i n'a fɔ ne be cogo min na, bari ne ye n yɛrɛ kɛ i ko aw be cogo min na. Aw ma kojugu si kɛ ne la.

¹³Aw y'a lɔn ko ne ka bana koo le kɛra sababu ye ne ka sɔrɔ ka kibaru diman fɔ aw ye.

¹⁴Ka ne to o bana bolo, o tun ye kɔrɔbɔli ye aw ma, nga o bɛɛ n'a ta, ne nigɛ ma bɔ aw la, aw ma ne dɔgɔya fana. Nga aw ye ne minɛ i n'a fɔ mɛlɛkɛ, walima Yezu Krista yɛrɛ.

¹⁵Aw minw tun nisɔndiyara kosɔbɛ, aw ka nisɔndiya nin tora min? Ne ba fɔ tiɲɛ na ko n'aw tun be se k'aw ɲaa wɔgɔbi k'o di ne ma, aw tun bena o kɛ.

¹⁶Sisan ne kɛra aw jugu ye bari ne be tiɲɛ fɔra aw ye wa?

¹⁷Mɔgɔ nunu jijanin be aw kosɔn cogo min na, u ka miiri ma ɲi, u b'a fɛ k'aw faran ka bɔ ne la, waasa u ka se k'u yɛrɛ diya bɔ.

¹⁸N'aw be jija koɲuman kɛli kama tuma bɛɛ, o ka ɲi. A kana kɛ ne ɲanako dama ye.

¹⁹Ne deenw halibi, ne be tɔɔrɔ muɲuna aw kosɔn, tɔɔrɔ min ni muso jigibagatɔ ta ye kelen ye, janko Krista ka sigiyɔrɔ sɔrɔ aw kɔnɔ.

²⁰A tun ka di ne ye ka sɔrɔ aw cɛma sisan yɛrɛ, ka se ka ne ka kuma fɔcogo yɛlɛma, bari ne hakili ɲagaminin lo aw kosɔn.

²¹Aw minw b'a fɛ ka to sariya kɔrɔ tugu, aw ka ne jaabi. Min fɔra Ala ka kuma na, aw m'o mɛn wa?

²² A fɔra Ala ka kuma na ko Ibrayima tun ye deen fila sɔrɔ, kelen sɔrɔla jɔnmuso fɛ, kelen fana sɔrɔla hɔrɔnmuso fɛ.

²³Deen min sɔrɔla jɔnmuso fɛ, ale sɔrɔla adamaden sago la, nga deen min sɔrɔla hɔrɔnmuso fɛ, ale tun ye dadili dafa deen ye.

²⁴Kɔrɔ b'o koo nin na, bari muso nunu kɛra bɛɛn fila dafananw ye. Bɛɛn min sɔrɔla Sinayi kulu kan, ale be mɔgɔ kɛ jɔɔn ye. O ye Agari ye.

²⁵Agari ye Sinayi kulu ye min be Arabi jamana na. Agari fana be i n'a fɔ Zeruzalɛmu min be yen bii, bari ale n'a deenw ye jɔɔnw ye.

²⁶Nga Zeruzalɛmu min be sankolo la, ale ye hɔrɔn ye, ale lo y'an bamuso ye.

²⁷ Bari a fɔra Ala ka kuma na ko: «E muso wolobali, e ka nisɔndiya. Ele min ma denwolo tɔɔrɔ lɔn, e ka nisɔndiya kosɔbɛ, bari gwalemuso deenw bena caya ka tɛmɛ baaramuso taw kan.»

²⁸N balimaw, aw kɔni, aw ye dadili deenw ye i n'a fɔ Isiyaka.

²⁹ Deen min sɔrɔla adamaden sago la, ale tun be Nii Senuman deen tɔɔrɔ cogo min na, a b'o cogo kelen na sisan fana.

³⁰ Nga Ala ka kuma ye mun le fɔ? A ko: «Jɔnmuso n'a dencɛ gwɛn, bari jɔnmuso deen ni hɔrɔnmuso deen tena jɛn cɛɛn kan.»

³¹O le y'a to ne balimaw, an te jɔnmuso ka deenw ye, nga hɔrɔnmuso ka deenw.