Read dyu Galatikaw 5 Bible Online

Galatikaw 5 - dyu bible

Galatikaw 5

¹Krista y'an hɔrɔnya janko an ka kɛ hɔrɔnw ye sɔbɛ la, o la, aw ye jija, aw kana tila ka don jɔnya la tugu.

²Ayiwa, ne Pɔli yɛrɛ b'a fɔ aw ye ko n'aw ye aw yɛrɛ kɛnɛkɛnɛ, Krista tena foyi ɲa aw ye tugu.

³Ne be tila k'a fɔ tugu ko ni mɔgɔ o mɔgɔ y'a yɛrɛ kɛnɛkɛnɛ, a kɛra wajibi ye o tigi ma ka sariya bɛɛ bato.

⁴Aw minw b'a fɛ ka tilenninya sɔrɔ Ala ɲakɔrɔ sariya barika la, aw faranna ka bɔ Krista la. Ala ka nɛɛma t'aw kan tugu.

⁵An kɔni jigi b'a la ko Nii Senuman barika la, Ala bena an jati mɔgɔtilenninw ye, an b'o le kɔnɔna.

⁶N'an lanin be Yezu Krista la, i kɛnɛkɛnɛna wo, i ma kɛnɛkɛnɛ wo, o si te foyi ye. Min ye koo kuun ye, o ye jigi ye, min b'a to an be koo kɛ kanuya la.

⁷Aw ka koo tun ɲana. Jɔn le y'aw bɔ tiɲɛsira kan?

⁸U ye fɛɛn min kɛ k'aw bali n'a ye, o ma bɔ aw welebaga Ala fɛ.

⁹ Kofitini le be koba wili. [1]

¹⁰Ne kɔni, ne jigi be Matigi kan aw ka koo la ko cogo o cogo, aw tena miiriya wɛrɛ ta, nga mɔgɔ min b'aw ɲagami, a kɛra mɔgɔ o mɔgɔ ye, o tigi ben'a ta ye.

¹¹N balimaw, n'a tun kɛra ko ne be kɛnɛkɛnɛko le waajuli kɛra halibi, k'a fɔ k'o ye wajibi ye, mun na u be ne tɔɔrɔ tugu? Tiɲɛ na, ni ne tun be kɛnɛkɛnɛko waajuli le kɛra, Krista ka sayako lɔgɔ kan tun tena kɛ baasi ye.

¹²Mɔgɔ minw b'aw ɲagami, olu kana dan kɛnɛkɛnɛni dama ma, u k'u ta bɛɛ tigɛ!

¹³N balimaw, aw welela hɔrɔnyali le kama. O hɔrɔnyali nin kana kɛ sababu ye aw b'aw farikolo sago kɛ. Nga aw ka ɲɔgɔn kanu ka ɲɔgɔn dɛmɛ.

¹⁴ Bari sariya kuma bɛɛ be sɔrɔ kuma kelen nin le la ko: «E k'i tɔɲɔgɔn kanu i n'a fɔ i yɛrɛ.»

¹⁵Nga n'aw tora ɲɔgɔnɲimi na ni ɲɔgɔnmandimini na i n'a fɔ kongosogow, aw k'aw yɛrɛ kɔlɔsi. N'o tɛ, aw bena ɲɔgɔn ban.

¹⁶Ne b'a fɔ aw ye ko aw ka taama Nii Senuman sago la. O la, aw tena farisogo sago kɛ tugu.

¹⁷ Bari farisogo sago, ni Nii Senuman be ɲɔgɔn kɛlɛ. U te bɛn. O kama, n'aw b'a fɛ ka koo min kɛ, aw te se k'o kɛ.

¹⁸Ni Nii Senuman le be baara kɛ i kɔnɔ, e te kɛ sariya bolo tugu.

¹⁹Farisogo sago ye min ye, an b'o lɔn, o ye: ɲamɔgɔya, nɔgɔtɔya, ni kakalaya,

²⁰josɔn, ni subagaya, ani juguya, kɛlɛ ni keliya, dimi ni sɔsɔli, ani tilanni, ani ka faran ka kɛ jɛnkuluw ye,

²¹wasabaliya, dɔrɔtɔya, ni nugubatɔya, ani o ɲɔgɔnna koow. Ne be kɔn k'o fɔ aw ye, i n'a fɔ n delila k'a fɔ aw ye cogo min na ko mɔgɔ minw b'o koow kɛ, k'olu tena Ala ka masaya sɔrɔ fewu.

²²Nga Nii Senuman be fɛɛn minw di, o ye nin ye: kanuya, nisɔndiya, hɛrɛ, muɲuli, ɲumanya, hinɛ, tilenninya, sabali, ni yɛrɛminɛ.

²³Sariya t'o koo nunu kɛlɛ.

²⁴Mɔgɔ minw ye Krista ta ye, olu ye farisogo n'a diyanako bɛɛ gwengwen lɔgɔ kan.

²⁵N'an be balo Nii Senuman barika la, an ka taama Nii Senuman sago la.

²⁶An kana kɛ tɔgɔɲinilaw ye gwansan, ka to k'an tɔɲɔgɔnw darabɔ. An ɲaa kana bɔ an tɔɲɔgɔnw ka fɛɛnw na.