Read dyu Galatikaw 6 Bible Online

Galatikaw 6 - dyu bible

Galatikaw 6

¹N balimaw, ni mɔgɔ minɛna fili dɔ la, Nii Senuman be aw minw na, aw k'o tigi dɛmɛ ni dusuɲuman ye a ka kɔsegi siraɲuman kan. Nga aw kelen kelen bɛɛ k'aw yɛrɛ kɔlɔsi, janko a ɲɔgɔn kana aw sɔrɔ.

²Aw ka ɲɔgɔn doni ta. O la, aw bena Krista ka sariya bato.

³Bari ni mɔgɔ dɔ be miiri ko ale ka fisa, k'a sɔrɔ a te foyi ɲa, a b'a yɛrɛ nigɛra le.

⁴Mɔgɔ kelen kelen bɛɛ k'a yɛrɛ sɛgɛsɛgɛ, n'i ye koo dɔ ye n'i be se k'i yɛrɛ boɲa o la, e k'i yɛrɛ boɲa, o ka kɛ i yɛrɛ ka koo la, mɔgɔ si kan'a ta kɛɲɛ n'a tɔɲɔgɔn ta ye ka sɔrɔ k'a yɛrɛ boɲa.

⁵Bari mɔgɔ kelen kelen bɛɛ bena lɔ n'a yɛrɛ kunko ye.

⁶Ni mɔgɔ dɔ b'i kalan Ala ka koo la, o tigi ka kan k'a niyɔrɔ sɔrɔ i bololafɛnw na.

⁷Aw kana aw yɛrɛ nigɛ. Mɔgɔ te se ka yɛlɛ Ala ma. Mɔgɔ o mɔgɔ mana fɛɛn min dan, a bena o le tigɛ.

⁸Mɔgɔ min y'a ka koo bɛɛ kɛ farisogo koo ye, o tigi bena halaki. Nga min ta kɛra Nii Senuman ka koo ye, o tigi bena nii banbali sɔrɔ.

⁹An kana sigɛn koɲuman kɛli la, bari n'an ma dɛsɛ k'o dabila, an ben'a tɔnɔ sɔrɔ n'a waati sera tuma min na.

¹⁰O la, ni koɲumankɛ see b'an ye tuma min na, an k'o kɛ mɔgɔ bɛɛ ye kɛrɛkɛrɛ ni y'a la Krista kɔmɔgɔw.

¹¹Aw k'a filɛ yan yɔrɔ sɛbɛnɔ ka bonbon cogo min na, ne yɛrɛ bolo le y'o sɛbɛn.

¹²Yɛrɛyirabagaw le b'a fɛ aw ka kɛnɛkɛnɛ wajibi. U ka koo bɛɛ kuun ye nin ye: waasa u kana tɔɔrɔ sɔrɔ Krista kosɔn. [1]

¹³Bari minw kɛnɛkɛnɛna, olu yɛrɛ te sariya bato. Nga u b'a fɛ aw ka kɛnɛkɛnɛ janko u ka tɔgɔ sɔrɔ aw kosɔn.

¹⁴Ne yɛrɛ ta faan fɛ kɔni, ne be n yɛrɛ boɲa an Matigi Yezu Krista ka saya koo le la lɔgɔ kan. Ne kɔni fɛ, Krista ka saya barika la, diɲɛ te foyi ye ne fɛ, ani ne fana te foyi ye diɲɛ fɛ.

¹⁵Kɛnɛkɛnɛko, walima kɛnɛkɛnɛbaliya, o si te foyi ye. Min ye fɛɛn ye, o ye i ka kɛ danfɛnkura ye.

¹⁶Mɔgɔ minw bɛɛ b'o koo nin sira taama, Ala ka makari ni hɛrɛ kɛ olu ye, an'a ka mɔgɔw bɛɛ ye.

¹⁷Ayiwa, mɔgɔ si kana ne tɔɔrɔ tugu, bari jolinɔ minw be ne fari la, olu b'a yira ko ne ye Yezu ka baarakɛla ye.

¹⁸N balimaw, an Matigi Yezu Krista ka nɛɛma kɛ aw ye. Amiina.