Read dyu Efɛzikaw 1 Bible Online

Efɛzikaw 1 - dyu bible

Efɛzikaw 1

¹ Ne Pɔli min kɛra Yezu Krista ka ciden ye ka kɛɲɛ ni Ala sago ye, ne be bataki nin ci Ala ka mɔgɔw ma, minw be Efɛzi dugu kɔnɔ. Aw minw kɛra mɔgɔsɔbɛw ye Yezu Krista ka jɛnɲɔgɔnya barika la,

²an Faa Ala, ni an Matigi Yezu Krista ka nɛɛma ni hɛrɛ kɛ aw ye.

³An ka barika la Ala ye, ale min ye an Matigi Yezu Krista Faa ye. A y'an ta ɲa k'a ka sankolo ɲumanya bɛɛ kɛ an ye Krista barika la.

⁴Bari, ale Krista le barika la Ala y'an woloma kabini diɲɛ ma dan fɔlɔ, waasa an ka kɛ mɔgɔɲumanw ye a ɲakɔrɔ, jalakiyɔrɔ te minw na kanuya barika la.

⁵Ala tun kɔnna k'a latigɛ k'an kɛ a ka deenw ye Yezu Krista barika la, ka kɛɲɛ n'a yɛrɛ diyanako ye.

⁶An ka Ala tanu a ka nɛɛma kosɔn a ye min kɛ an ye, a Deen kanunin barika la.

⁷ Ale Krista ka saya barika la an kunmabɔra, an ka filiw yafara ka kɛɲɛ ni Ala ka nɛɛma dafanin ye.

⁸Ala y'o kɛ an ye fɔɔ ka ɲa ka lɔnniya dafanin ani hakilitigiya d'an ma.

⁹A tun y'o koo dogonin latigɛ kabini fɔlɔfɔlɔ, sisan a y'o yira an na. A tun y'o koɲuman nin latigɛ ka kɛ Krista barika la.

¹⁰A y'a latigɛ n'o koo kɛwaati sera tuma min na, a ka fɛɛn bɛɛ lajɛnnin, minw be sankolo la ani minw be dugukolo kan, Krista ka kɛ u bɛɛ kuntigi ye.

¹¹Ale Krista barika la, anw ye niyɔrɔ sɔrɔ a fɛ. Ala y'o latigɛ kabini fɔlɔfɔlɔ la. Ale be koo bɛɛ kɛ ka kɛɲɛ n'a yɛrɛ sago ye. A y'an woloma,

¹²an minw kɔnna k'an jigi la Krista kan, waasa an k'a tanu.

¹³Aw ye tiɲɛkuma nin mɛn tuma min na, o min ye kibaru diman ye, aw fana lar'a la ka kisi o barika la, ka Nii Senuman sɔrɔ, min ye taamasiɲɛ ye an kan, Ala tun y'a daa di min na.

¹⁴Ale lo b'a yira an na ko an bena niyɔrɔ sɔrɔ Ala fɛ n'an kunmabɔra pepewu loon min na, janko Ala ka tanu!

¹⁵O le y'a to, kabini ne y'a mɛn ko aw jigi lanin bɛ Matigi Yezu kan ani ko aw be Ala ka mɔgɔw bɛɛ kanu,

¹⁶ne ka Ala daali waatiw la, ne be to k'a dali aw ye ka barika la a ye tuma bɛɛ aw kosɔn.

¹⁷An Matigi Yezu Krista ka Ala, min ye Faa Nɔɔrɔtigi ye, n b'ale daali a ka Nii Senuman di aw ma, min bena lɔnniya di aw ma, k'a ka koo gwɛ aw ye aw ka se k'o lɔn kosɔbɛ,

¹⁸ani k'aw hakili yɛlɛ, aw welela fɛɛn min kama, aw ka se k'o faamu. A ye fɛnɲuman min labɛn a ka mɔgɔw ye, aw k'o nafa lɔn,

¹⁹k'a ka sebagaya kabakoman fana lɔn an faan fɛ, an minw lara Yezu la. O sebagaya kelen nin barika la

²⁰ a ye Krista kunun, ani ka sigiyɔrɔ d'a ma arijana na a kinibolo fɛ.

²¹A siginin be fangatigi yebaliw ni kuntigiw ani setigiw ni masaw bɛɛ kunna, ani tɔgɔ wɛrɛ min be se ka wele bii diɲɛ, ani diɲɛ nata la, a b'u bɛɛ kunna.

²² Ala ye fɛɛn bɛɛ majigi a ye, k'a sigi a ka jama kunna,

²³ min ye ale Krista yɛrɛ fari ye. Krista yɛrɛ dafanin be sɔrɔ ale lo la. Ala be ale Krista min na.