Read dyu Efɛzikaw 2 Bible Online

Efɛzikaw 2 - dyu bible

Efɛzikaw 2

¹Aw minw tun be i n'a fɔ suuw Ala fɛ aw ka kojuguw n'aw ka hakɛw kosɔn,

²aw tun be minw kɛ fɔlɔfɔlɔ, ka kɛɲɛ ni adamadenya ye, ani sanfɛ jinaw kuntigi ta ye fana, min be baara kɛ ni mɔgɔmurutininw ye halibi.

³An fana, an bɛɛ tun kɛra i ko olu, an tun b'an ta farisogo nigɛlakow fɛ, k'a sago kɛ, ani k'an yɛrɛ ka miiriya kɛ. Ka kɛɲɛ n'an cogo ye, Ala tun be dimi an kɔrɔ i n'a fɔ tɔw fana.

⁴Nga Ala ka makari te ban, an koo diyar'a ye kosɔbɛ.

⁵ O la, an minw tun sara an ka kojuguw kosɔn, Ala y'an kunun ni Krista ye. Aw kisira nɛɛma le barika la.

⁶Ala y'an kunun ni Yezu Krista ye k'an kɛ kuntigiw ye n'a ye a ka mara la.

⁷O le y'a to, a tun y'a latigɛ k'a ka nɛɛma dafanin kɛ waati nataw la an faan fɛ, min ɲɔgɔn tɛ, a ka ɲumanya kosɔn Yezu Krista barika la.

⁸Aw lar'a la minkɛ, o le y'a to aw kisira nɛɛma barika la, o te aw yɛrɛ seko ye, o ye Ala ka nili ye.

⁹O ma kɛ aw ka kɛwali sababu la, janko mɔgɔ si kana se k'a yɛrɛ boɲa.

¹⁰An ye Ala bulonɔ ye, a y'an dan Yezu Krista barika la kɛwaliɲumanw kama, Ala ye minw latigɛ kabini fɔlɔfɔlɔ janko an k'o kɛ.

¹¹Aw tun be cogo min na fɔlɔ la, aw k'aw hakili jigi n'o ye. Aw te zuwifuw ye. Zuwifuw b'aw wele ko kɛnɛkɛnɛbaliw, k'u yɛrɛ wele ko kɛnɛkɛnɛninw, k'a sɔrɔ u ka kɛnɛkɛnɛko kɛra adamaden bulonɔ ye.

¹²O waati la, aw tun te Krista lɔn, niyɔrɔ tun te aw fɛ Isirayɛlidenw cɛma. Ala tun y'a daa di bɛɛn min la, aw niin tun t'o la. Aw tun be yen ten, jigi layɔrɔ tun t'aw fɛ, aw tun te Ala lɔn fana.

¹³Aw yɔrɔ tun ka jan Ala la, nga sisan, aw gwɛrɛla a la Yezu Krista kosɔn a joli barika la.

¹⁴Bari ale lo y'an ka hɛrɛ ye, ale min ye zuwifuw ni siya tɔw jɛn k'u kɛ kelen ye, ani ɲɔgɔnkɔniya min tun kɛra kogo ye u cɛ, a y'a yɛrɛ di k'o ci.

¹⁵ A y'a kɛ sariya n'a ka ladiliw bɔra seen kan. A kɛra ten, a y'a latigɛ ka zuwifuw ni siya wɛrɛw jɛn k'u kɛ kelen ye a ka jɛnɲɔgɔnya barika la, ka hɛrɛ don u ni ɲɔgɔn cɛ,

¹⁶ k'u fila bɛɛ jɛn ka kɛ kelen ye, k'u bɛn ni Ala ye, a ka saya sababu la lɔgɔ kan. O yɔrɔ la, a ye see sɔrɔ ɲɔgɔnkɔniya kan k'o ban.

¹⁷ A nana hɛrɛkuma fɔ aw yɔrɔjan mɔgɔw, ani yɔrɔsurun mɔgɔw ye.

¹⁸Ale sababu la, an kelen kelen bɛɛ be se ka se an Faa Ala fɛ, Nii Senuman kelen barika la.

¹⁹A kɛra ten, aw te lonanw ye tugu, walima jamana wɛrɛ mɔgɔw, nga aw ye Ala ka mara mɔgɔw le ye, Ala ka somɔgɔw.

²⁰Kiraw ni cidenw ye soo juu min sigi, ni Yezu Krista le y'o juu nin kabakuru barikaman ye, boon nɔnkɔn ta, aw lɔra o le kan i n'a fɔ boon.

²¹Ale Yezu Krista barika la, kogo tɔɔ be lɔ ka ɲa, ani ka kɛ Matigi Ala ka soo ye.

²²Ale sababu la, aw fana ni tɔw sera ka lɔ ka kɛ Ala ka boon ye Nii Senuman barika la.