Read dyu Efɛzikaw 3 Bible Online

Efɛzikaw 3 - dyu bible

Efɛzikaw 3

¹O le y'a to ne Pɔli min be kaso la Yezu Krista kosɔn aw siya wɛrɛw kama,

²Ala ye nɛɛma kɛ ne ye ka baara min kalifa ne ma aw ka hɛrɛ kama, aw y'o koo mɛn.

³A y'a ka koo dogonin yira ne la. N y'o koo fɔ aw ye dɔɔni ka tɛmɛ.

⁴N'aw b'o kalan tuma min na, aw ben'a ye ko ne be Krista ka koo dogonin nin lɔn.

⁵O koo dogonin ma se ka yira adamaden si la waati tɛmɛninw na, i n'a fɔ a yirala Ala ka cidenw, n'a ka kiraw la cogo min na sisan Nii Senuman barika la.

⁶ O kɔrɔ ko siya wɛrɛw ye Isirayɛlidenw ka niyɔrɔ ɲɔgɔn sɔrɔ Ala ka koo, ni dadili koo la, ani ka jɛn ka kɛ kelen ye, kibaru diman kosɔn Yezu Krista barika la.

⁷Ala ye nɛɛma kɛ ne ye a ka sebagaya barika la, ka ne kɛ kibaru diman nin fɔbaga ye.

⁸Ne min ye Ala ka mɔgɔw bɛɛ la kɔmɔgɔ ye. O bɛɛ n'a ta, Ala ye nɛɛma kɛ ne ye waasa ne ka Krista ka ɲumanya fɔ siya wɛrɛw ye, daan te ɲumanya min na.

⁹Ala min ye fɛɛn bɛɛ dan, ale ye koo min dogo kabini waatijan, ne k'o koo kɛcogo fɔ ka gwɛ.

¹⁰O la, sankolo kɔnɔ fangatigiw ni setigiw na se ka Ala ka hakilitigiya cogo bɛɛ lɔn, Krista ka jama barika la bii,

¹¹ka kɛɲɛ n'a ka koo latigɛnin ye kabini fɔlɔfɔlɔ, a ye min kɛ an Matigi Yezu Krista barika la.

¹²N'an lara ale la ka jɛn n'a ye, sira dinin b'an ma ka gwɛrɛ Ala la ni jigi ye.

¹³O la, ne b'aw daali ko aw kana aw jigi tigɛ ne ka tɔɔrɔko kosɔn, ne be minw kɛ aw kama, o le ye aw ka yɛrɛboɲa sababu ye.

¹⁴O le kosɔn, ne be n kunbiri gwan Faa Ala ɲakɔrɔ,

¹⁵sankololafɛn ni dugukolo kan fɛɛnw bɛɛ b'u tɔgɔ sɔrɔ ale min fɛ.

¹⁶A ka ɲumanya ka bon. O la, ne b'a daali a ka fanga di aw ma k'aw jaa gwɛlɛya a ka Nii Senuman barika la,

¹⁷janko Krista ka koo ka se ka sigi aw kɔnɔ jigi barika la, kanuyasɔbɛ ka se ka sɔrɔ aw kɔnɔ fɔɔ ka ɲa.

¹⁸O la, daan te Krista ka kanuya min na, aw ni Ala ka mɔgɔw bɛɛ bena se k'o faamu. [1]

¹⁹Krista ka kanuya min tɛmɛna lɔnniya bɛɛ kan, aw bena se k'o faamu, ka fa Ala la.

²⁰An be fɛɛn minw daali, walima ka miiri minw la, Ala min be se k'o d'an ma, hali ka tɛmɛ o kan yɛrɛ, a ka sebagaya barika la min be baara kɛ an kɔnɔ,

²¹boɲa ka la ale kelen kan, a ka jama cɛma Yezu Krista kosɔn, waati bɛɛ la! Amiina!