Read dyu Efɛzikaw 5 Bible Online

Efɛzikaw 5 - dyu bible

Efɛzikaw 5

¹Aw ka banba ka Ala ladege, bari aw y'a deenw ye minw koo ka d'a ye.

² Aw ka koo bɛɛ kɛ ni kanuya ye, i n'a fɔ Krista, ale min y'an kanu k'a yɛrɛ di ka kɛ saraka ye an kosɔn min diyara Ala ye i n'a fɔ wusulan.

³Kakalaya, walima mɔgɔkolonya, ani wasabaliya, o koo si kana mɛn aw cɛma, bari Ala ka mɔgɔw man kan k'o kɛ.

⁴Malobaliyakuma, ni kumakolon ani kumanɔgɔnin fana ma ɲi. Aw ka to ka Ala tanu dɔrɔn.

⁵Aw k'a faamu kosɔbɛ ko kakalaw ni mɔgɔnɔgɔninw, ni wasabaliw tena don Krista ni Ala ka masaya la. Wasabaliya ni josɔn bɛɛ ye kelen ye.

⁶Aw kana sɔn mɔgɔ si k'aw ɲagami n'a ka kuma fufafu ye, bari o ɲɔgɔn le b'a to Ala be dimi a ka kuma batobaliw fɛ.

⁷Aw kana jɛn n'u ye fewu.

⁸Fɔlɔfɔlɔ, aw kɔnɔ tun finnin lo, sisan aw kɔnɔ gwɛnin lo Matigi barika la. Mɔgɔ minw kɔnɔ gwɛnin lo, aw ka taama i n'a fɔ olu,

⁹bari mɔgɔ minw kɔnɔ gwɛnin lo, olu ka kɛwaliw ye nin ye: ɲumanya, tilenninya, ani tiɲɛko.

¹⁰Fɛɛn min ka di Matigi ye, aw ka banba k'o lɔn.

¹¹Aw kana dibidibiko kɛ, tɔnɔ te o la. Aw ka ban o ma k'o koo fɔ ka gwɛ mɔgɔw ye,

¹²bari u be koo minw kɛ dogo la, o fɔko yɛrɛ ye maloya ye.

¹³Nga ni fɛɛn o fɛɛn bɔra kɛnɛ kan, o be faamu.

¹⁴Bari ni koo o koo bɔra kɛnɛ kan ka ban, o be faamu. O le y'a to a fɔra ko: «Wili, e min be sinɔgɔ la, wili ka bɔ suuw cɛma, Krista ben'a ka yeelen bɔ i ye.»

¹⁵Aw k'aw yɛrɛ kɔlɔsi kosɔbɛ, aw kana kɛ nalomanw ye, nga hakilitigiw.

¹⁶ Waati min b'aw bolo, aw ka banba ka koɲuman kɛ, n'o tɛ, juguya ye fanga sɔrɔ bii tile la.

¹⁷O la, aw kana kɛ kolɔnbaliw ye, nga aw ka Matigi sago ɲini k'o lɔn.

¹⁸Aw kana fa duvɛn na, o be mɔgɔ mako sa, aw ka fa Nii Senuman na.

¹⁹Aw ka ɲɔgɔn jija ni Ala tanuli dɔnkiliw ye minw be Ala ka kuma kɔnɔ, ni dɔnkili wɛrɛw ye, ani Nii Senuman ye minw d'aw ma. Aw ka dɔnkili la, ka barika la Matigi ye n'aw dusu bɛɛ ye.

²⁰ Aw ka barika la an Faa Ala ye an Matigi Yezu Krista tɔgɔ kosɔn, waati bɛɛ ani koo bɛɛ la.

²¹Krista ɲasiran kosɔn, aw k'aw yɛrɛ majigi ɲɔgɔn ye.

²² O la, musow, aw k'aw yɛrɛ majigi aw cɛɛw ye, i n'a fɔ aw b'a kɛ Matigi ye cogo min na.

²³Bari cɛɛ le y'a ka muso kuntigi ye, i n'a fɔ Krista ye a ka jama kuntigi ye cogo min na, min y'a farisogo ye, a kɛra min kisibaga ye.

²⁴Krista ka jama b'a yɛrɛ majigi Krista ye cogo min na, o cogo kelen na, muso ka kan k'a yɛrɛ majigi a cɛɛ ye koo bɛɛ la.

²⁵ Cɛɛw, aw k'aw ka musow kanu, i n'a fɔ Krista ye a ka jama kanu cogo min na, fɔɔ k'a nii di a kosɔn,

²⁶waasa k'a saniya batizeli barika la jii kɔnɔ ni kuma ye,

²⁷a ka jama dafanin ka sɔrɔ a yɛrɛ ɲakɔrɔ, nɔɔ si kana ye a kan, ni kurukuruyɔrɔ ani dɛsɛyɔrɔ si kana ye a la. A b'a fɛ a ka jama ka kɛ a ɲanaman ye, jalakiyɔrɔ kana sɔrɔ a la.

²⁸O cogo kelen na, cɛɛw ka kan k'u ka musow kanu i n'a fɔ u yɛrɛ farisogo. Cɛɛ min b'a ka muso kanu, o tigi b'a yɛrɛ le kanu,

²⁹bari mɔgɔ si t'a yɛrɛ kɔniya fewu, nga a b'a yɛrɛ balo ani k'a yɛrɛ mara ka ɲa, i n'a fɔ Krista b'a ka jama kɛ cogo min na,

³⁰bari an ye Krista farisogo yɔrɔ dɔ ye.

³¹ «O le y'a to, cɛɛ ben'a faa n'a baa to yen ka nɔrɔ a ka muso la, u fila bena jɛn ka kɛ kelen ye.»

³²O koo nin kɔrɔ ka bon kosɔbɛ, ne ye kuma min fɔ, o ɲasinnin be Krista n'a ka jama ka koo ma.

³³O kɔ, aw kɔni, aw kelen kelen bɛɛ k'a ka muso kanu i n'a fɔ aw yɛrɛ, musow fana k'u ka cɛɛw boɲa.