Read dyu Efɛzikaw 6 Bible Online

Efɛzikaw 6 - dyu bible

Efɛzikaw 6

¹ Matigi ɲasiran kosɔn denmisɛnw, aw k'aw wolobagaw boɲa, o le ka ɲi.

²«I k'i faa n'i baa boɲa,» (o le ye sariya fɔlɔ ye dadili tara ka la min kan),

³ «janko i ka se ka hɛrɛ ni sijan sɔrɔ dugukolo kan.»

⁴ Wolobagaw, aw fana, aw kana fariya aw deenw ma fɔɔ u be muruti, nga aw k'u kolo k'u ladi, ani k'u kalan ka kɛɲɛ ni Matigi sago ye.

⁵Jɔɔnw, aw k'aw kuntigiw boɲa kosɔbɛ ni kɔnɔgwɛ ye, ka siran u ɲa i n'a fɔ aw b'a kɛ Krista ye cogo min na.

⁶Aw kana o kɛ u ɲana dɔrɔn k'aw koo diya u ye, nga aw k'o kɛ i n'a fɔ Krista ka jɔɔnw, ka Ala sago kɛ sɔbɛ la.

⁷Aw ka baara kɛ u ye ni dusuɲuman ye, i n'a fɔ aw be Matigi ka baara kɛ cogo min na. Aw kan'a kɛ i n'a fɔ aw b'o kɛra mɔgɔ ye,

⁸ bari aw b'a lɔn ko mɔgɔ kelen kelen bɛɛ bena u ka baaraɲuman tɔnɔ sɔrɔ Matigi fɛ, jɔɔn fara hɔrɔnw kan.

⁹ Kuntigiw, aw fana k'o koo ɲɔgɔn kɛ u ye. Aw kana fariya u ma, bari aw b'a lɔn k'u Kuntigi n'aw fana ta ye kelen ye min be sankolo la, ani ale te mɔgɔ woloma ka bɔ mɔgɔ la.

¹⁰Ayiwa, aw k'aw jija Matigi ka koo la a ka sebagaya dafanin barika la.

¹¹Aw ka Ala ka kɛlɛkɛminanw bɛɛ ta waasa aw ka se ka lɔ ka ɲa ka Sutana ka namaraw kunbɛn.

¹²Bari an te kɛlɛ kɛ ni adamadenw ye, nga an be kɛlɛ kɛ ni diɲɛjugu kuntigiw ye, ni sanfɛ fangatigiw, ni setigi minw be dibi la, ani nijugu minw be sankolo la.

¹³O la, aw ka Ala ka kɛlɛkɛminanw bɛɛ ta waasa ni lonjugu sera, aw ka se ka lɔ kelen kan fɔɔ ka se a laban ma.

¹⁴ Aw ye jija ka tiɲɛ kɛ aw ka cɛsirilan ye, ani tilenninya ka kɛ aw ka nigɛkunbɛnnan ye.

¹⁵ Aw ye jija ka kibaru diman fɔ, min ye hɛrɛkuma ye, o ka kɛ i n'a fɔ aw ka sennasanbara.

¹⁶Lanaya min b'aw la, aw k'o kɛ i n'a fɔ kɛlɛden ka nigɛkunbɛnnan, ka se ka Sutana ka biɲɛ tasumaman bɛɛ faga n'o ye.

¹⁷ Aw ka kisili nigɛfugulan biri, ani ka Nii Senuman ka murujan ta min ye Ala ka kuma ye.

¹⁸Aw ka Ala daali kosɔbɛ tuma bɛɛ Nii Senuman barika la ni daalili sifa bɛɛ ye. Aw ye jija o la kosɔbɛ ka daalili kɛ Ala ka mɔgɔw bɛɛ ye.

¹⁹Aw ka Ala daali ne fana ye, waasa ni ne b'a fɛ ka kibaru diman [1] fɔ tuma min na, ne ka se ka jagwɛlɛya sɔrɔ k'a fɔ ka gwɛ,

²⁰min kosɔn ne kɛra Krista ka lasigiden ye ni n be kaso la. Aw ka Ala daali ne ye, waasa ne ka se k'a ka koo fɔ ni jagwɛlɛya ye i n'a fɔ ne ka kan k'a fɔ cogo min na.

²¹ An balimacɛ Tisiki, min koo ka di ne ye kosɔbɛ, ani a kɛra Matigi ka baarakɛlasɔbɛ ye, ale bena ne ka koo bɛɛ fɔ aw ye, janko aw fana k'o faamu.

²² O le kosɔn, ne b'a ci aw fɛ, janko a k'an ka kibaruya fɔ aw ye, ani k'aw jigi tugu.

²³An Faa Ala n'an Matigi Yezu Krista ka hɛrɛ, ni kanuya ani jigi di an balimaw ma.

²⁴An Matigi Yezu Krista koo ka di mɔgɔ minw ye, n'u b'a kanu kanuya banbali la, Ala ka nɛɛma kɛ olu bɛɛ ye.