Read dyu Filipikaw 1 Bible Online

Filipikaw 1 - dyu bible

Filipikaw 1

¹ Ne Pɔli ani Timote, Yezu Krista ka jɔɔnw, an be nin sɛbɛ nin ci aw ma, aw minw ye Ala ka mɔgɔw ye Filipi dugu kɔnɔ Yezu Krista barika la, an b'a ci aw ka ɲamɔgɔw n'u dɛmɛbagaw ma fana.

²An Faa Ala, n'an Matigi Yezu Krista ka nɛɛma ni hɛrɛ kɛ aw ye.

³Tuma o tuma ni ne hakili jigira aw kɔ, ne be barika la n ka Ala ye.

⁴Ni ne be Ala daali aw ye tuma min na, ne b'o kɛ ni nisɔndiya ye tuma bɛɛ,

⁵bari kabini ne y'a daminɛ ka kibaru diman fɔ aw fɛ, fɔɔ ka na se bii ma, aw be ne dɛmɛna k'aw niyɔrɔ ta o baara la.

⁶Ne lanin b'a la ko Ala min ye baaraɲuman nin daminɛ aw dusu la, ko ale bena taga ɲa k'aw dɛmɛ o la fɔɔ ka taga se Yezu Krista kɔsegilon ma.

⁷Tiɲɛ be ne fɛ ka miiri aw la tuma bɛɛ, bari aw koo be ne dusu la. Ka ne to kaso la, walima ne tun be kibaru diman fɔra ka gwɛ mɔgɔw ye tuma min na, janko u k'u jigi l'a kan kosɔbɛ, Ala ye boɲa min la ne kan, aw y'aw niyɔrɔ ta o baara la.

⁸Ala yɛrɛ b'a lɔn ko aw bɛɛ koo ka di ne ye i n'a fɔ aw koo ka di Yezu Krista ye cogo min na.

⁹Ne be Ala daali aw ye ko a ka dɔ fara aw ka kanuya kan tuma bɛɛ, o ka kɛ lɔnniya ni hakilitigiya la,

¹⁰waasa aw ka se ka koɲuman lɔn, ka kɛ mɔgɔɲuman jalakibaliw ye Krista kɔsegilon na,

¹¹ani janko aw ka kɛwaliɲuman kɛ sɛbɛ la, min see be sɔrɔ Krista barika la, waasa boɲa ni tanuli ka kɛ Ala ye.

¹²Ne balimaw, ne b'a fɛ aw ka min faamu, o filɛ nin ye: koo minw ye ne sɔrɔ, o kɛra sababu ye kibaru diman tagara ɲa.

¹³ A kɛra ten, sɔlidasi minw be masacɛ ka lasigiden ka luu kɔnɔ, ani mɔgɔ tɔw bɛɛ, olu bɛɛ y'a lɔn ko ne be kaso la Krista ka baara kosɔn.

¹⁴Ne minɛko kɛra sababu ye an balimaw caaman ye jagwɛlɛya sɔrɔ Matigi barika la. Olu be tagara ɲa ka Ala ka kuma fɔ ni siranya t'o la.

¹⁵Tiɲɛ na, mɔgɔ dɔw be Krista ka kibaru fɔ ni keliya ani kɔnɔnajuguya ye, nga dɔw kɔni b'a fɔra ni kɔnɔgwɛ ye.

¹⁶Olu b'o kɛ ni kanuya ye, bari u y'a lɔn ko ne be yan kibaru diman fɔli kosɔn.

¹⁷Nga minw kɔnɔ gwɛnin tɛ, n'u be Krista ka kibaru fɔra ni kɔnɔnajuguya ye, olu b'a fɛ ka dɔ fara ne ka sigɛn kan kaso la.

¹⁸Hali n'u b'a kɛra ni kɔnɔnajuguya ye, walima ni kɔnɔgwɛ ye wo, o si te baasi ye. Ne kɔni be nisɔndiya bari Krista ka kibaru diman be fɔra cogo bɛɛ la, o la, ne bena taga ɲa ni n ka nisɔndiya ye.

¹⁹Bari ne lanin b'a la ko aw ka Ala daali, ni Yezu Krista ka nii barika la, o koo bɛɛ laban na, Ala bena ne kunmabɔ.

²⁰Ne jigi be min kan kosɔbɛ, ni n b'a makɔnɔna sɔbɛ sɔbɛ la, ale kama ne tena maloya fɔɔ ne be jagwɛlɛya sɔrɔ le. K'a ta sisan ma ani tuma bɛɛ, ne be nii na wo, ne sara wo, ne b'a fɛ ka boɲa la Krista tɔgɔ kan,

²¹bari ni ne be nii na, ne be nii na Krista ka baara kosɔn, nga ni ne sara, o fana ye ne ka tɔnɔ ye.

²²Nga ka ne to nii na, ni ne bena se ka baaraɲuman kɛ tugu, o la ne kɔni m'a lɔn ne bena min ta.

²³Ne ka miiriya be a faan fila bɛɛ la, nga min ka fisa kosɔbɛ ne fɛ, o ye ne ka bɔ nin diɲɛ na ka taga to Krista fɛ.

²⁴Nga ni ne tora nii na, o le ka fisa aw ma kosɔbɛ,

²⁵o la, ne lanin b'a la ko ne bena to nii na aw gɛrɛfɛ, k'aw bɛɛ dɛmɛ ka taga ɲa ani ka nisɔndiya sɔrɔ aw ka lanaya la Yezu la.

²⁶Ni ne kɔsegira aw fɛ tuma min na, aw bena se k'aw yɛrɛ boɲa Krista barika la ne kosɔn.

²⁷Min ka gwɛlɛ, o ye nin ye: Aw ka taamacogo ka kan ka bɛn Krista ka koo ma, waasa hali ni ne nana aw fɛ, walima ne ma se ka na wo, ne k'a mɛn ko aw jijanin lo, ka bɛn ka baara kɛ ni miiriya kelen ye ani dusu kelen ye kibaru diman kosɔn aw y'aw jigi la min kan.

²⁸Aw kana sɔn aw juguw ka siranya bila aw la cogo si la. Ni aw jaa ma tigɛ fewu, u ben'a lɔn ko olu ta ye halakili ye, ani ko aw ta ye kisili ye min bɔra Ala fɛ.

²⁹Aw minw kɛra Krista ta ye, Ala ye nɛɛma min kɛ aw ye, o ye nin ye: A y'a kɛ aw y'aw jigi la a kan, o dama tɛ, aw be sigɛn sɔrɔ a kosɔn fana.

³⁰ O sigɛn min b'aw kan, aw ye ne ye o le la, aw b'a lɔn ko halibi, n b'o la fana.