Read dyu Filipikaw 2 Bible Online

Filipikaw 2 - dyu bible

Filipikaw 2

¹Ni jigitugu be sɔrɔ Krista fɛ, ni jagwɛlɛya be sɔrɔ a ka kanuya la, ni jɛnɲɔgɔnya be aw ni Nii Senuman cɛ, ni ɲumanya ni hinɛ be sɔrɔ a la,

²aw k'aw ka miiriya kɛ kelen ye kanuya la, ani k'aw kɔnɔ kɛ kelen ye ka bɛn koo bɛɛ la, o la, ne ka nisɔndiya be taga ɲa kosɔbɛ.

³Aw kana foyi kɛ ni kɔnɔnajuguya ye, ani yɛrɛboɲa ye, nga aw k'aw yɛrɛ majigi k'aw tɔɲɔgɔn filɛ ko a ka fisa n'aw ye.

⁴Aw la, mɔgɔ si kana miiri a yɛrɛ la dɔrɔn, aw ka miiri aw tɔɲɔgɔn na fana.

⁵Sɔɔn min tun be Yezu Krista la, o ɲɔgɔn ka sɔrɔ aw fana na.

⁶Ale min ni Ala ye kelen ye, a ma sɔn k'o jati.

⁷Nga a sɔnna k'o bɛɛ to yen, ka na jɔɔn cogo ta, ka kɛ i n'a fɔ mɔgɔ, mɔgɔw y'a jati adamaden dama ye.

⁸A sɔnna k'a yɛrɛ majigi ka Ala sago kɛ fɔɔ ka taga se saya ma lɔgɔ yɛrɛ kan.

⁹O le y'a to, Ala ye boɲa la a kan kosɔbɛ, tɔgɔ min ka fisa ni tɔgɔ bɛɛ ye, a y'o d'a ma,

¹⁰waasa Yezu tɔgɔ kosɔn, fɛɛn minw be sankolo kɔnɔ, ni dugukolo kan ani dugukolo jukɔrɔ, olu bɛɛ k'u kunbiri gwan,

¹¹ ani bɛɛ k'a fɔ ko Yezu Krista ye Matigi ye, ka boɲa la an Faa Ala tɔgɔ kan.

¹²Ne teriw, aw tun be ne ka kuma bato ka ne to aw fɛ, halibi aw ka taga ɲa ka dɔ fara o kan, aw ka jija ka baara kɛ aw ka kisili kosɔn ni Alaɲasiran ye kosɔbɛ.

¹³Bari Ala ye koɲuman min latigɛ, a be aw dɛmɛna tuma bɛɛ k'o kɛli nigɛ don aw la k'a kɛ see di aw ma.

¹⁴Aw ka koo bɛɛ kɛ, ŋunuŋunu ni sɔsɔli kana sɔrɔ a si la,

¹⁵ waasa aw ka kɛ mɔgɔ jalakibaliw ni mɔgɔɲumanw, ani Ala deenw ye, juguya te minw kɔnɔ fewu diɲɛ mɔgɔw cɛma, olu minw ka jugu ani u tilennin tɛ. Aw ka kɛ yeelen ye u cɛma i n'a fɔ lolow.

¹⁶U be se ka kisi kuma min barika la, aw k'o fɔ u ye. N'o kɛra, o bena kɛ ne fɛ kunkɔrɔta ye Krista nalon na, o la, ne ye baara min kɛ ani ka sigɛn minw muɲu, o tena kɛ fuu ye.

¹⁷Hali ni ne joli ka kan ka bɔn ka kɛ saraka ye ka fara aw jigi ta kan, o be diya ne ye, ani o be ne nisɔndiya n'aw bɛɛ ye.

¹⁸O la, aw fana ka nisɔndiya kosɔbɛ ni ne ye.

¹⁹N'a kɛra an Matigi Yezu sago ye, ne jigi b'a la ko ne bena Timote ci aw fɛ, waasa n'a kɔsegira ka na tuma min na, ne ka se ka nisɔndiya aw ka kibaruya kosɔn.

²⁰Ale kelen le be hami aw ka koo la i n'a fɔ ne.

²¹Mɔgɔ tɔɔ nunu, olu bɛɛ be miiri u yɛrɛ ka koo la dama, u te miiri Yezu Krista ka koo la.

²²A y'a ka mɔgɔsɔbɛya yira cogo min na, aw b'o lɔn. A y'a yɛrɛ di ka baara kɛ ni ne ye, kibaru diman ka ɲataga kosɔn, i n'a fɔ deen be baara kɛ n'a faa ye cogo min na.

²³Ni ne nana ɲaa ye ne ka koo la tuma min na, ne jigi b'a la k'ale ci aw fɛ,

²⁴ne jigi be Matigi kan ko yanni dɔɔni ne yɛrɛ fana bena na aw fɛ.

²⁵Ne y'a miiri ko a ka fisa ne ka n balimacɛ Epaforaditi ci aw fɛ, ale min kɛra ne tɔɲɔgɔn ye baara nin na ani bondori nin na. Aw tun y'a ci ka na ne dɛmɛ, o kɛra koɲuman ye ne ma.

²⁶A b'a fɛ ka aw bɛɛ ye teliya la, bari a hakili ɲagaminin lo ko aw y'a ka bana koo mɛn.

²⁷Tiɲɛ na, a tun banana kosɔbɛ fɔɔ a tun be ɲini ka sa, nga Ala makarila a la. A ma kɛ ko a makarila ale kelen dɔrɔn na dɛ, a makarila ne la fana, waasa dɔ kana fara ne ka dusukasi kan.

²⁸Ne kɔrɔtɔnin le b'a ci, waasa n'aw segira k'a ye, aw ka nisɔndiya, ani dɔ ka bɔ ne ka dusukasi la.

²⁹Aw k'a minɛ ni nisɔndiya ye balimaya la Matigi kosɔn. A daganin lo aw ka o mɔgɔ sugu nin ɲɔgɔn minɛ ka ɲa,

³⁰bari a tun be ɲini ka sa Krista ka baara kosɔn, a m'a yɛrɛ nii jati fɛɛn ye, aw tun te se ka dɛmɛ min ɲɔgɔn kɛ ne ye, a y'o le kɛ ne ye.