Read dyu Filipikaw 3 Bible Online

Filipikaw 3 - dyu bible

Filipikaw 3

¹Ayiwa n balimaw, sisan kɔni aw ka nisɔndiya Matigi kosɔn. Ne ye koo minw fɔ aw ye, a ma gwɛlɛ ne ma ka kɔsegi olu kan. O be aw fana dɛmɛ kosɔbɛ.

²Aw k'aw yɛrɛ kɔlɔsi wulu nunu na, baarakolonkɛlaw, minw ka kɛnɛkɛnɛko te sɔbɛ koo ye.

³Bari mɔgɔ minw kɛnɛkɛnɛna sɔbɛ la, o ye anw le ye, an minw be Ala bato a ka Nii barika la, k'an ka boɲa sɔrɔ Yezu Krista barika la, an minw t'an jigi la an yɛrɛ kan.

⁴Ni mɔgɔ dɔ be miiri ko ale be se k'a jigi la a yɛrɛ kan, ne fana be se k'a fɔ ko ne be se k'o kɛ ka tɛmɛ o tigi kan, bari cogoya bɛɛ la, ne be se ka n jigi la n yɛrɛ kan.

⁵ Ne wolola, a tile seeginan loon, n kɛnɛkɛnɛna. Ne ye Isirayɛliden ye ka bɔ Bɛnzamɛn kɔmɔgɔw la. Ne ye eburu ye, ne wolobagaw bɛɛ ye eburuw ye. Ala ka sariya batoli faan fɛ, ne ye *Fariziɲɛ ye.

⁶ Ne jijanin tun be fɔɔ ka kɛ Krista ka jama tɔɔrɔbaga ye. Ka taga tilenninya faan fɛ, ne ye sariya bato fɔɔ jalakiyɔrɔ tun te ne la.

⁷O fɛɛn nunu bɛɛ tun kɛra tɔnɔ ye ne fɛ, nga sisan ne be olu filɛ fɛnfu ye Krista kosɔn.

⁸Tiɲɛ na, ne sera ka n Matigi Yezu Krista lɔn minkɛ, n'o ye koba ye, o le kama, ne b'o koo bɛɛ filɛ fuu ye. Ale lo kosɔn ne sɔnna ka fɛɛn bɛɛ ye k'o to yen. Ani ne be fɛɛn bɛɛ filɛ i n'a fɔ ɲamaɲama, waasa ne ka Krista sɔrɔ,

⁹ka jɛn n'a ye. A ma kɛ ko ne tilennin be Ala ɲakɔrɔ sariya batoli kosɔn. Nga ne tilennin be a ɲakɔrɔ bari ne ye n jigi la Krista kan. O tilenninya nin be sɔrɔ jigi barika la Ala fɛ.

¹⁰Ne be min ɲini, o ye nin ye: ka Krista lɔn, ani k'a ka kununni sebagaya lɔn fana, ka tɔɔrɔ i n'a fɔ ale tɔɔrɔla cogo min na, ani a y'a nii di cogo min na, ne fana ka n nii di ten ka sa,

¹¹waasa ne fana ka se ka kunun.

¹²A ma kɛ ko ne sera koo bɛɛ daan na ka sara sɔrɔ, ka kɛ mɔgɔdafanin ye dɛ, nga ne be n jija ka taga ɲa, waasa ne ka se ka kɛ mɔgɔdafanin ye, bari o le kama Yezu Krista ye ne wele.

¹³N balimaw, ne te miiri ko ne ye mɔgɔdafanin ye ka ban, nga ne be fɛɛn kelen dama le kɛ: ne tɛmɛna fɛɛn minw kan, ne be ne hakili bɔ olu bɛɛ la, ka jija ka taga ɲafɛ.

¹⁴Ne be boli fɔɔ ka se boli daan na, waasa ne ka sini sara sɔrɔ Ala b'an wele min kosɔn Yezu Krista barika la.

¹⁵An minw ye faamuli sɔrɔ ka taga ɲa Krista ka sira la, an bɛɛ ka kan ka miiri ten. N'a kɛra ko aw ka miiriya be cogo wɛrɛ la fɛɛn dɔ la, Ala bena o gwɛya aw ye.

¹⁶Cogo o cogo, an ye koo minw kɛ fɔɔ ka na se sisan ma, an ka banba ka taga ɲa n'o koow ye.

¹⁷ N balimaw, aw ka kɛ ne ladegebagaw ye, anw ye cogoɲuman min yira aw la, aw ka tugu o kɔ i n'a fɔ tɔw.

¹⁸Ne ye nin fɔ ka ban aw ye siɲɛ caaman, ne be kɔsegi k'a fɔ aw ye tugu ni ɲaji ye, ko Krista ka saya kuun lɔgɔ kan, mɔgɔ caaman taamacogo ma bɛn o ma.

¹⁹Olu laban ye halakili ye. U kɔnɔbara le ye u ka Ala ye. Koo minw be maloya lase u ma, o le kɛra u ka yɛrɛboɲako ye. U be miiri koo minw na, o ye diɲɛ koo dama ye.

²⁰Nga an kɔni, an faso be sankolo la. An kisibaga, Matigi Yezu Krista bena bɔ o yɔrɔ la ka na, an be ale min ɲanafilɛla.

²¹Ale lo bena an farikolo dɛsɛnin yɛlɛma, k'a kɛ farisogo ye nɔɔrɔ be min kan i n'a fɔ ale ta ɲɔgɔn. A bena o kɛ n'a ka sebagaya ye, min barika la a be see sɔrɔ fɛɛn bɛɛ kan.