Read dyu Kɔlɔsikaw 1 Bible Online

Kɔlɔsikaw 1 - dyu bible

Kɔlɔsikaw 1

¹Ne Pɔli min kɛra Yezu Krista ka ciden ye ka kɛɲɛ ni Ala sago ye, ani an balimacɛ Timote,

²an be bataki nin ci Krista ka jama ma Kɔlɔsi dugu kɔnɔ, aw minw kɛra balimasɔbɛw ye Krista barika la, an Faa Ala ka nɛɛma ni hɛrɛ kɛ aw ye.

³An be Ala daali aw ye tuma o tuma, ka barika la a ye ale min ye an Matigi Yezu Krista Faa ye.

⁴Bari an y'a mɛn ko aw fana lara Yezu Krista la ani ko aw be Ala ka mɔgɔw kanu.

⁵Aw jigi lanin be fɛɛn min kan arijana na, aw ye o jigi nin sɔrɔ kibaru diman barika la, min ye tiɲɛkuma ye, aw kɔnna k'o le mɛn.

⁶O le sera diɲɛ yɔrɔ bɛɛ la, n'a be baara kɛra yen kosɔbɛ, i n'a fɔ a b'a kɛra aw fɛ cogo min na. Kabin'a sera aw fɛ, aw sɔnn'a ma, o le y'aw dɛmɛ ka Ala ka nɛɛma lɔn sɔbɛ la.

⁷ An baarakɛɲɔgɔn Epafarasi, min koo ka gwɛlɛ an ma, n'ale ye Krista ka baarakɛlaɲuman ye anw fɛ aw cɛma, ale lo y'aw kalan o koo la.

⁸Aw be ɲɔgɔn kanu cogo min na Nii Senuman barika la, ale lo y'o fɔ an ye.

⁹O le y'a to, kabini an ye aw koo mɛn, an be Ala daali aw ye tuma bɛɛ. An b'a daali ko a ka hakilitigiya di aw ma Nii Senuman barika la, janko aw ka se k'a sago lɔn kosɔbɛ.

¹⁰O la, aw taamacogo ka se ka bɛn ni Matigi sago ye, ani aw koo ka diya a ye tuma bɛɛ, aw ka se ka baaraɲuman sifa bɛɛ kɛ, ani ka Ala lɔn kosɔbɛ.

¹¹An b'a daali ko a ka fanga d'aw ma kosɔbɛ a ka sebagayaba barika la, o la, aw bena se k'aw jija ka koo bɛɛ muɲu ni nisɔndiya ye.

¹²Aw ka barika la Faa ye ale min y'a kɛ aw be se ka niyɔrɔ sɔrɔ, min labɛnnin be Ala ka mɔgɔw ye yeelen yɔrɔ la.

¹³A y'an tila ka bɔ dibi ka fanga bolo, ani k'an don a Deen ka masaya la, deen min koo ka di a ye kosɔbɛ.

¹⁴ Deen min barika la, an ka hakɛw yafara, an kisira.

¹⁵Ale lo ye Ala jaa ye, an te se ka Ala min ye. Ale fana le kɔnna danfɛn bɛɛ ɲa, ani a ka bon n'u bɛɛ ye.

¹⁶Bari fɛɛn bɛɛ danna ale lo barika la. Sankololafɛnw ni dugukolo kan fɛɛnw, danfɛn minw be se ka ye, ani minw te se ka ye, a masaya fara a kuntigiw kan, a fangatigi fara a setigiw kan, o bɛɛ lajɛnnin danna ale lo barika la, ani u danna ale lo kosɔn.

¹⁷Ale lo kɔnna fɛɛn bɛɛ ɲa, fɛɛn bɛɛ fana be yen ale lo barika la.

¹⁸ Ale lo ye Krista ka jama kuntigi ye, min y'a farisogo ye. A daminɛna ni ale ye, ale lo kɛra suu fɔlɔ ye ka kunun, waasa a ka kɛ bɛɛ ɲafɛ.

¹⁹Bari a diyara Ala ye k'a yɛrɛ ka Alaya dafanin dɔn a la.

²⁰ Ani ka bɛn ni danfɛnw bɛɛ ye a deen nin barika la, dugukolo kan fɛɛnw, ni sankololataw, ka hɛrɛ kɛ a deen nin ka saya barika la lɔgɔ kan.

²¹Aw minw yɔrɔ tun ka jan Ala la fɔlɔfɔlɔ, ani aw tun ye Ala juguw ye aw ka miiriya, n'aw ka kɛwalijuguw kosɔn,

²²sisan Ala bɛnna n'aw ye a Dencɛ ka saya barika la, waasa aw saniyanin, n'aw jalakibali ka se ka lɔ a ɲakɔrɔ.

²³Nga aw ka jija ka l'a la kosɔbɛ, fɛɛn si kana aw ka miiriya ɲagami k'aw jigi bɔ kibaru diman kan aw ye min mɛn, ale min fɔra danfɛnw bɛɛ ye diɲɛ kɔnɔ. Ne Pɔli kɛra min baarakɛla ye.

²⁴Ne be nisɔndiya n ka tɔɔrɔkow la aw kosɔn, Krista ka sigɛn tɔɔ min tun tora, ne b'o la Krista ka jama kosɔn min y'a farisogo ye.

²⁵Ne kɛra jama nin ka baarakɛla ye, ka kɛɲɛ ni Ala ka weleli ye aw dɛmɛ kama. A ye ne wele k'a ka kuma fɔ ka ɲa kosɔbɛ.

²⁶O ye Ala ka koo dogonin ye, a tun dogora kabini waatijan, mɔgɔw ye. Nga sisan Ala y'a yira a ka mɔgɔw la.

²⁷A b'a fɛ ka o koo dogonin ɲumanya yira siyaw cɛma, min ye nin ye: Krista be aw cɛma, ale kɛra aw jigi ye ko aw bena nɔɔrɔ sɔrɔ sini.

²⁸An be ale Krista le koo fɔra mɔgɔ bɛɛ ye, k'u ladi, ani k'u kalan ni hakilitigiya bɛɛ ye, waasa an ka se ka mɔgɔ kelen kelen bɛɛ labɛn u dafanin ka lɔ Ala ɲakɔrɔ Krista barika la.

²⁹O le kosɔn ne be baara kɛ, ani ne be bondori kɛ n'a ka fanga ye, min be baara kɛra ne kɔnɔ kosɔbɛ.