Read dyu Kɔlɔsikaw 2 Bible Online

Kɔlɔsikaw 2 - dyu bible

Kɔlɔsikaw 2

¹Ne b'a fɛ aw k'a faamu ko ne be bondorigwɛlɛn lo kɛra aw ni Lawodisekaw fana kosɔn ani mɔgɔ minw ɲaa ma la ne kan ka ye,

²waasa olu ka se ka jigitugu sɔrɔ, ani u ka se ka kɛ kelen ye kanuya la, fɛɛn min dogonin tun be Ala fɛ, ka hakili ɲanaman sɔrɔ ka se k'o lɔn, o min ye Krista ye.

³Mɔgɔ be se ka koo min bɛɛ lɔn Ala faan fɛ, Krista ye o le yira.

⁴Ne ye kuma nin fɔ aw ye janko mɔgɔ si kana aw lafili ni manamanakuma ye.

⁵Tiɲɛ lo, ne te aw cɛma, nga ne hakili be aw la, ne nisɔndiyanin be k'a ye ko aw bɛnnin lo kosɔbɛ, ani ko aw jijanin lo ɲɔgɔn fɛ k'aw jigi la Krista kan.

⁶Aw lara an Matigi Yezu Krista la cogo min na, aw ka taama ka kɛɲɛ n'ale sago ye.

⁷Aw k'aw yɛrɛ d'a ma, ka nɔrɔ a la, ka jija k'aw jigi la a kan ka kɛɲɛ ni kalan ye aw ye min kɛ, ani aw ka barika la Ala ye kosɔbɛ.

⁸Aw k'aw yɛrɛ kɔlɔsi mɔgɔ si kana aw kunna cɛn n'a ka lɔnniyafu ye u be min sɔrɔ adamaden ka landa la, ani diɲɛ setigiw ta, o lɔnniya nin te Krista ta ye.

⁹Bari alaya dafanin le be ale farisogo la.

¹⁰Fɛɛn bɛɛ b'aw fɛ ale lo barika la, ale lo be setigi ni fangatigi yebaliw bɛɛ kunna.

¹¹Ale barika la aw kɛnɛkɛnɛna. O kɛnɛkɛnɛ nin ma kɛ mɔgɔ sababu la, nga o kɛra Krista ta ye, o kɔrɔ ko aw jogojugu yɛlɛmana.

¹² Aw batizera tuma min na, o waati la aw suu donna n'a ye, ani ka kunun n'a ye, aw jigi lanin kosɔn setigi Ala kan, ale min y'a kunun.

¹³ Aw minw tun ye suuw ye aw ka kojugu kosɔn, ani aw ka kɛnɛkɛnɛbaliya kosɔn, Ala y'aw kunun n'a ye. A y'an ka kojugu bɛɛ yafa.

¹⁴ Sariya min tun sigira an kama n'a be jalaki ben an kan, a y'o ta ka bɔ yen. A y'o ban a ka saya barika la lɔgɔ kan.

¹⁵Ala ye fangatigiw, ni setigi yebaliw ka sebagaya cɛn, k'u minɛ ka kɛ jɔɔnw ye k'u yira kɛnɛ kan bɛɛ ɲakɔrɔ, a ye see sɔrɔ u kan Krista ka saya barika la lɔgɔ kan.

¹⁶ Aw kan'a to mɔgɔ si k'aw jalaki dumuniko ni minnifɛnko la, walima sankura ni kalokura ɲanagwɛko la, ani lafiɲɛlonko la.

¹⁷Olu ye koo nataw jaaw ye, nga u yɛrɛ yɛrɛ be Krista le la.

¹⁸Mɔgɔ minw b'a kɛ i n'a fɔ u majiginin lo ani minw be to ka mɛlɛkɛw bato, aw kan'a to u si k'aw ɲagami. U jijanin lo u ka fɛɛn yetaw fɔko la. U b'u yɛrɛ boɲa ni adamaden ka miiriya dama ye.

¹⁹ Olu ma sɔn ka nɔrɔ Krista la ale min kɛra kungolo ye, ale min barika la farisogo be kɛ kelen ye k'a ka makoɲafɛnw sɔrɔ fasajuru ni joli siraw fɛ, ka sɔrɔ ka boɲa ka kɛɲɛ ni Ala sago ye.

²⁰N'aw sara ni Krista ye ɲɔgɔn fɛ ka faran diɲɛ setigiw ka koow la, olu minw be diɲɛ kunna, mun na aw be sɔn k'u ka landaw bato tugu i n'a fɔ aw ye diɲɛ ta ye?

²¹U ko aw kana nin dumu, aw kan'a nɛnɛ, aw kana maga a la yɛrɛ.

²²O fɛɛn nunu bɛɛ be laban ni cɛnni ye, ani u fana juu sigira adamadenw ka landa n'u ka ladili le kan,

²³o kɛra i n'a fɔ u ka ɲi. Ka batoli kɛ u yɛrɛ sago la, k'u yɛrɛ majigi, ka tɔɔrɔ la u farisogo kan, u b'o koo nunu boɲa, k'a sɔrɔ u man kan ni boɲa ye, olu ye adamaden diyanako dama le ye.