Read dyu Tesalonikaw fɔlɔ 1 Bible Online

Tesalonikaw fɔlɔ 1 - dyu bible

Tesalonikaw fɔlɔ 1

¹ Ne Pɔli ni Silivɛn ani Timote be bataki nin ci Ala ka jama ma, min be Tesaloniki, aw minw jigi be an Faa Ala, ani Matigi Yezu Krista kan, Ala ka nɛɛma ni hɛrɛ kɛ aw ye.

²An be to ka barika la Ala ye tuma bɛɛ aw kosɔn, ani k'a daali aw ye an ka daalili tuma na.

³Aw lara Ala la ka jija ka baara kɛ a ye, baara gwɛlɛman, kanuya kosɔn cogo min na, ani aw be muɲuna cogo min na Matigi Yezu Krista kosɔn, an hakili b'o bɛɛ la an Faa Ala ɲakɔrɔ.

⁴N balimaw, aw minw koo diyara Ala ye, an y'a lɔn ko a ye aw woloma.

⁵An be kibaru diman min fɔra, an m'o fɔ aw ye i n'a fɔ kuma gwansan dama, nga an y'a fɔ ni Nii Senuman ka sebagaya ye. An ye fɛɛn minw kɛ aw ka ɲa kama, aw b'o lɔn.

⁶ Aw kɔni, aw ye an cogo dege ni Matigi ta fana, aw sɔnna Ala ka kuma ma ni nisɔndiya ye min ye Nii Senuman ta ye, k'aw to tɔɔrɔba cɛma.

⁷A kɛra ten, mɔgɔ minw lara Yezu la Maseduwani ni Girɛsi mara la, aw ka koo kɛra ladegeta ye olu bɛɛ fɛ.

⁸Ala ka koo boɲana aw fɛ fɔɔ o tagara mɛn Maseduwani ni Girɛsi maraw la. O dama fana tɛ, aw jigi be Ala kan cogo min na, o sera yɔrɔ bɛɛ, fɔɔ kuun t'a la an yɛrɛ ka kuma a la.

⁹Bari an tun sera aw fɛ tuma min na, aw y'an ladon cogo min na, ani ka josɔn dabila cogo min na ka Nitigi Ala kelen bato, mɔgɔ bɛɛ b'o fɔra.

¹⁰Aw y'o kɛ ka to ka Ala dencɛ Yezu kɔsegitɔ makɔnɔ, a y'ale min kunun a sanin kɔ. Yezu le b'an kunmabɔ Ala ka dimi nata ma.