Read dyu Tesalonikaw fɔlɔ 2 Bible Online

Tesalonikaw fɔlɔ 2 - dyu bible

Tesalonikaw fɔlɔ 2

¹Ne balimaw, aw yɛrɛ y'a lɔn ko an ka taali aw fɛ, o ma kɛ gwansan ye.

² Sanni an ka se aw fɛ Tesaloniki, u y'an tɔɔrɔ k'an nɛni kosɔbɛ Filipi, aw yɛrɛ y'o lɔn. An ye jagwɛlɛya sɔrɔ Ala fɛ, k'an ka Ala ka kibaru diman fɔ aw ye gwɛlɛya caaman cɛma.

³An be kuma min fɔra mɔgɔw ye, o te galon ye, walima namarakow ye, an fana te mɔgɔ si lafili.

⁴Nga Ala yɛrɛ y'a ye ko an be se, o la, a y'o kibaru diman fɔko kalifa an ma, an fana b'a fɔ a cogo la. An te mɔgɔ diyanako ɲinina, nga Ala min b'an kɔnɔnakow lɔn, an be ale ta le kɛ.

⁵A kɛra ten, aw b'a lɔn ko an ka kuma ma kɛ namarakuma ye fewu. An fana m'o fɔ aw ye an yɛrɛ ka tɔnɔ kosɔn. Ala yɛrɛ b'o lɔn.

⁶An ma boɲa ɲini mɔgɔ si fɛ, an m'a ɲini aw fɛ, walima mɔgɔ wɛrɛw fɛ.

⁷An tun be se ka kuntigiya kɛ aw kan, bari an ye Krista ka cidenw ye. Nga an ka koo tun ka di k'an to aw cɛma yen, i n'a fɔ muso b'a deen mara cogo min na.

⁸Aw ka koo tun ka gwɛlɛ an ma kosɔbɛ, o le y'a to, an tun labɛnnin lo ka Ala ka kibaru diman fɔ aw ye, hali k'an yɛrɛ nii di aw kosɔn. Bari aw koo tun b'an dusu la kosɔbɛ.

⁹N balimaw, an ye baara min kɛ k'o sigɛn muɲu, aw hakili b'o la. K'an to aw cɛma n'an be Ala ka kibaru diman fɔ aw ye, an ye baara kɛ suu fara tile kan waasa an ka doni kana la aw dɔ kan.

¹⁰Aw yɛrɛ b'a lɔn ni Ala fana, ko aw minw lara Yezu la, an taamacogo tun ka ɲi aw cɛma, a tilennin tun lo, jalakiyɔrɔ tun te an na.

¹¹Aw b'a lɔn fana ko an y'aw kelen kelen bɛɛ minɛ i n'a fɔ faa b'a deenw minɛ cogo min na.

¹²An y'aw ladi, k'aw jaa gwɛlɛya, ani an y'a ɲini aw fɛ kosɔbɛ ko aw k'aw taamacogo bɛn ni Ala sago ye, ale min b'aw wele janko aw ka don a ka masaya la, ani k'a nɔɔrɔ sɔrɔ.

¹³O kama, an be barika la Ala ye tuma bɛɛ, bari, an ye Ala ka kuma min fɔ aw ye, aw m'o minɛ i n'a fɔ mɔgɔ dalakuma, nga i ko Ala ka kuma yɛrɛ yɛrɛ, a do ye o le ye tiɲɛ na, min be baara kɛ aw kɔnɔ, aw minw lara Yezu la.

¹⁴ N balimaw, Krista ka jama minw be Zude mara la minw fana ye Yezu Krista ta ye, aw ni olu tɛmɛna sira kelen kan, bari aw ye tɔɔrɔ sɔrɔ kosɔbɛ aw balimaw bolo, i n'a fɔ olu fana tɔɔrɔla zuwifuw bolo cogo min na.

¹⁵ O zuwifu nunu le ye Matigi Yezu ani kiraw faga, ani olu le y'an tɔɔrɔ fana, o koo man di Ala ye, mɔgɔ bɛɛ le ye olu jugu ye.

¹⁶Olu le b'an bali janko an kana kibaru diman fɔ siya wɛrɛw ye, min be se ka kɛ u be kisili sɔrɔ. A kɛra ten, u be dɔ farala u ka hakɛw kan. Nga a laban na, Ala dimina u kɔrɔ kosɔbɛ.

¹⁷An kɔni fɛ balimaw, kabini an faranna ɲɔgɔn na waati dɔɔni nin kɔnɔ, an kɔni t'aw cɛma, nga an be miiri aw koo la. An ye cogo bɛɛ ɲini, janko ka segi ka taga aw fɛ, bari an b'a fɛ k'aw ye.

¹⁸O le y'a to an b'a fɛ ka taga aw fɛ. Ne Pɔli yɛrɛ y'o ŋaniya ta siɲɛ damani, nga Sutana y'an bali.

¹⁹N'an Matigi Yezu segira ka na tuma min na, an jigi be jɔn le kan, an bena nisɔndiya jɔn le kosɔn, jɔn le bena kɛ an ka sesɔrɔjala ye an bena an yɛrɛ boɲa min kosɔn, aw tɛ wa?

²⁰Tiɲɛ na, an b'an yɛrɛ boɲa ani ka nisɔndiya aw le kosɔn.